កីឡាអន្តរជាតិ
អន្តរជាតិ
កាតាឡើងទៅដណ្តើមពាន Asian Cup ជាមួយជប៉ុន ក្រោយស៊ីម្ចាស់ផ្ទះ ៤-០ កីឡាករកាតាអបអរគ្រាប់បាល់នៅមុខអ្នកគាំទ្រម្ចាស់ផ្ទះ។ រូបភាពពី AFC Asian Cup
× ក្រុមកីឡាបាល់ទាត់ជម្រើសជាតិកាតាបានយកឈ្នះម្ចាស់ផ្ទះអេមីរ៉ាតអារ៉ាប់រួមដោយលទ្ធផល ៤-០ ដើម្បីឈានទៅកាន់ការប្រកួតវគ្គផ្តាច់ព្រ័ត្រពានរង្វាន់ AFC Asian Cup ឆ្នាំ២០១៩ ជាលើកដំបូងក្នុងប្រវត្តិសាស្ត្រ។
នាការប្រកួតវគ្គពាក់កណ្តាលផ្តាច់ព្រ័ត្រនៅកីឡដ្ឋាន Mohammed Bin Zayed Stadium ក្រុមភ្ញៀវកាតាបានបង្ហាញភាពលេចធ្លោខ្លាំងដោយអាចស៊ុតបញ្ចូលទីម្ចាស់ផ្ទះដល់៤គ្រាប់ ដែលធ្វើបានដោយ Boualem Khoukhi (២២) Almoez Ali (៣៧) Hassan Al Haidos (៨០) និង Hamid Ismail (៩០)។
ជ័យជម្នះដ៏លើសលុបនេះបាននាំក្រុមដែលមិនធ្លាប់ឈានដល់វគ្គពាក់កណ្តាល់ផ្តាច់ព្រ័ត្រព្រឹត្តិការណ៍នេះសូម្បីតែម្តង អាចបង្ហាញខ្លួននៅវគ្គផ្តាច់ព្រ័ត្រជាលើកដំបូងក្នុងប្រវត្តិសាស្ត្រប្រទេសក្នុងពិភពអារ៉ាប់មួយនេះ ដោយត្រូវតទល់ជាមួយម្ចាស់ជើងឯក៤ជំនាន់ជប៉ុននៅថ្ងៃទី១ ខែកុម្ភៈ ឆ្នាំ២០១៩។
ភាពខ្លាំងរបស់កាតាក្នុងព្រឹត្តិការណ៍ប្រចាំតំបន់អាស៊ីលើកទី១៧នេះ គឺមិនមានក្រុមណាអាចស៊ុតបញ្ចូលទីពួកគេបានមួយគ្រាប់នៅឡើយទេ (Clean Sheets) និងឈ្នះគ្រាប់ការប្រកួតទាំងអស់ ពោលគឺតាំងពីវគ្គចែកពូលមក។
កាតាដែលនឹងត្រៀមធ្វើម្ចាស់ផ្ទះ World Cup ឆ្នាំ២០២២ ផងដែរនោះ មានឱកាសបង្ហាញពិភពលោកនៅពេលនេះថា ខ្លួនកំពុងរីកចម្រើនក្នុងវិស័យកីឡាបាល់ទាត់ និងធ្វើយ៉ាងណាដណ្តើមពាន Asian Cup នេះឲ្យបាន។
ក្នុងការប្រកួតនោះដែរ ក្រុមអ្នកគាំទ្រម្ចាស់ផ្ទះបានបង្ហាញកាយវិការមិនសមរម្យដោយពួកគេបានគប់ដប និងស្បែកជើងទៅលើកីឡាករកាតាខណៈពួកគេអបអរគ្រាប់បាល់ស៊ុតបញ្ចូលទីលើក្រុមខ្លួន។
ប្រទេសជិតខាងទាំងពីកាតា និងអេមីរ៉ាតអារ៉ាប់រាប់មិនត្រូវគ្នាឡើងយ ដ្បិតមានជម្លោះនយោបាយនឹងគ្នា៕
© រក្សាសិទ្ធិដោយ thmeythmey.com