ជាតិ
បទយកការណ៍ / បទសម្ភាសន៍
លោក យ៉ង សាំងកុមារ ៖ រដ្ឋាភិបាល គួរទម្លាក់ទុន១០០លានដុល្លារ ដើម្បីដោះស្រាយបញ្ហាស្រូវ និងទប់ស្កាត់អ្នកឆ្លៀតឱកាស
×![]()
ភ្នំពេញ៖ រដ្ឋាភិបាល គួរតែទម្លាក់ថវិកា១០០លានដុល្លារ ដើម្បីដោះស្រាយបញ្ហាតម្លៃស្រូវ និងជីវភាពរបស់ពលរដ្ឋ ។ នេះបើតាមលោក យ៉ង សាំងកុមារ អ្នកជំនាញកសិកម្ម និងជាអតីតប្រធានអង្គការសេដាក ដែលបានបន្ថែមថា ការបោះទុននេះ ក៏ជាផ្នែកមួយសំខាន់ ក្នុងការទប់ស្កាត់ឈ្មួញ ឬអ្នករកស៊ីវិស័យស្រូវ-អង្ករ ដែលឆ្លៀតឱកាសទម្លាក់តម្លៃថ្លៃស្រូវកម្ពុជា ខណៈដែលអង្ករកម្ពុជា ត្រូវបានសហភាពអឺរ៉ុប អនុវត្តគិតពន្ធកាលពីពេលថ្មីៗនេះ។
ការធ្លាក់តម្លៃស្រូវបច្ចុប្បន្ននេះ ត្រូវបានរដ្ឋាភិបាល អះអាងថា គ្មានជាប់ព័ន្ធនឹងករណីសហភាពអឺរ៉ុប យកពន្ធអង្ករពីកម្ពុជានោះទេ។ វាជាទស្សនៈរបស់រដ្ឋាភិបាលប៉ុណ្ណោះ។ សម្រាប់លោក យ៉ង សាំងកុមារ ការធ្លាក់តម្លៃស្រូវនេះ គឺជាចិត្តសាស្ត្ររបស់ឈ្មួញ និងអ្នករកស៊ី ដែលឆ្លៀតឱកាសនេះ ដើម្បីទទួលបានផលចំណេញសម្រាប់ពួកគេ។
សូមលោក-អ្នកនាង ស្ដាប់កិច្ចសម្ភាសរវាងលោក រំដួល ចិត្រា អ្នកសារព័ត៌មានថ្មីៗ និងលោក យ៉ង់ សាំងកុមារ អ្នកជំនាញកសិកម្ម និងជាអតីតប្រធានអង្គការសេដាកដូចតទៅ៖
សម្រាប់ទុន១០០លានដុល្លារនេះ រដ្ឋាភិបាល អាចប្រើប្រាស់ជួយទិញស្រូវ ពីកសិករប្រមាណ១០ទៅ២០ភាគរយ នៃចំនួនស្រូវជិត២លានតោនទូទាំងប្រទេស។ ហើយរដ្ឋាភិបាល ត្រូវហៅខាងម៉ាស៊ីនកិនស្រូវក្នុងប្រទេសមកប្រជុំ ដោយសម្រេចផ្ដល់ប្រាក់កម្ចីសម្រាប់ពួកគេក្នុងអាត្រាការប្រាក់ទាប ដើម្បីជំរុញឲ្យពួកគេទិញស្រូវស្តុកទុក ហើយត្រូវតាមដានលើពួកគេ ថាពិតជាបានអនុវត្តតាមគោលការណ៍រដ្ឋាភិបាលដែរទេ? បើតាមលោក យ៉ង សាំងកុមារ ការធ្វើបែបនេះ គឺដើម្បីជួយឲ្យតម្លៃស្រូវងើបឡើងវិញ ហើយអាចទប់ស្កាត់ពួកឈ្មួញ ឬអ្នករកស៊ីស្រូវ-អង្ករបានច្រើន។ ប៉ុន្តែបើរដ្ឋាភិបាល មិនអន្តរាគមន៍លើបញ្ហាស្រូវនេះ ឲ្យទាន់ពេលវេលាទេ នោះបញ្ហាស្រូវនឹងកាន់តែផ្ទុះឡើងធ្ងន់ធ្ងរ ដែលអាចប៉ះពាល់ដល់ជីវភាពកសិករយ៉ាងខ្លាំង ដោយសារតែកសិករ នឹងត្រូវប្រមូលផលស្រូវប្រាំងធំ នៅក្នុងខែកម្ភៈ។
ទាក់ទងនឹងយុទ្ធសាស្ត្ររបស់រដ្ឋាភិបាល ដែលទៅសុំអន្តរាគមន៍ពីវៀតណាម ឲ្យជួយទិញស្រូវពីកម្ពុជាវិញ លោក យ៉ងសាំងកុមារ យល់ថា វាជាយុទ្ធសាស្ត្រមួយល្អបណ្ដោះអាសន្នប៉ុណ្ណោះ ប៉ុន្តែវាមិនបានផ្ដល់ចំណេញច្រើនដល់កម្ពុជានោះទេ។ ផលចំណេញដល់កម្ពុជានោះ គឺការលើកកម្ពស់វិស័យស្រូវ-អង្ករនៅក្នុងប្រទេសឲ្យបានរឹងមាំ ជាជាងចាំពឹងពាក់លើអ្នកដទៃ។ នេះជាការបញ្ជាក់របស់លោក យ៉ង់ សាំងកុមារ៕
Tag:
យ៉ង់ សាំងកុមារ
ស្រូវ
© រក្សាសិទ្ធិដោយ thmeythmey.com
