ភ្នំពេញ៖ ការផ្គត់ផ្គង់ខុនដូ នៅក្នុងទីក្រុងភ្នំពេញមានចំនួនប្រហែល១៥,០០០យូនីត នៅក្នុងឆ្នាំ២០១៨។ ចំនួននេះត្រូវបានគេសម្មត់ថា នឹងកើនឡើងឱ្យទ្វេដងនៅក្នុងឆ្នាំ ២០១៩។ នេះយោងតាមរបាយការណ៍របស់ CBRE។ ប៉ុន្តែគេសួរថាតើខុនដូទាំងនេះមានអ្នកទិញដែរឬទេ? ឆ្លើយនឹងសំណួរនេះ អ្នកជំនាញបីនាក់នៅក្នុងវិស័យអចលនព្រទ្យ បានបង្ហាញពីទស្សនៈយល់ឃើញជុំវិញទីផ្សារខុនដូនៅកម្ពុជា។
លោក James Hewson ប្រធានផ្នែកស្រាវជ្រាវ និងប្រឹក្សាយោបល់របស់ក្រុមហ៊ុន CBRE ប្រចាំកម្ពុជា បានរំពឹងថា ទីផ្សារខុនដូនឹងមានការកែប្រែនៃតម្លៃ ក្នុងឆ្នាំ ២០១៩។ លោកបានសំដៅដល់អំពីការផ្គត់ផ្គង់ដ៏ច្រើនសម្រាប់ខុនដូកម្រិតមធ្យម និងកម្រិតខ្ពស់នៅក្នុងទីផ្សារ។
លោក James បានលើកឡើងថា អគារខុនដូ ដែលបញ្ចប់ថ្មីៗមានចំនួន២,២៣៤យូនី ក្នុងត្រីមាសទី៤ ឆ្នាំ២០១៨ ដែលបានជំរុញឱ្យការផ្គត់ផ្គង់សរុបកើនឡើងជិត១៩ភាគរយ ពីមួយត្រីមាសទៅមួយត្រីមាស។ ក្នុងនោះ៤០ភាគរយ គឺជាខុនដូកម្រិតធម្យម។ លោកបានបន្ថែមថា ខុនដូកម្រិតខ្ពស់ត្រូវបានរំពឹងថានឹងកើនដល់ ២៤៣ភាគរយ ក្នុងឆ្នាំ២០១៩។ការកើនឡើងយ៉ាងច្រើនទាំងខុនដូកម្រិតមធ្យម និងកម្រិតខ្ពស់នៅក្នុងទីផ្សារ អាចជំរុញឱ្យមានការ កែតម្រូវទីផ្សារនៃតម្លៃខុនដូនៅក្នុងត្រីមាសបន្តបន្ទាប់។
ដោយឡែក លោក Joe Phalen ប្រធានផ្នែកសេវាហិរញ្ញវត្ថុនៅធនាគារHong Leong បានបញ្ជាក់ថា ទីផ្សារនៃការផ្គត់ផ្គង់ខុនដូ នឹងមានច្រើនលើសតម្រូវការនៅពេលអនាគត។
លោក Phalen បាននិយាយថា ធនាគារ Hong Leong មិនផ្តល់កម្ចីសម្រាប់ការទិញខុនដូនោះទេ។ លោកបន្តថា អ្នកក្នុងស្រុកនៅតែមានសុទិដ្ឋិនិយមចំពោះកំណើននៃទីផ្សារបុរី។
អ្នកអភិវឌ្ឍន៍ [បុរី] ធំៗ បានលក់ដាច់គម្រោងរបស់ពួកគេស្ទើរតែទាំងអស់រួចទៅហើយ បន្ទាប់ពីបានដាក់លក់តែពីរ-បីសប្តាហ៍ប៉ុណ្ណោះ គឺលក់ដាច់លឿនខ្លាំងណាស់។
ផ្ទុយពីលោក Phalen លោក ខន គង្គា ជានាយកប្រតិបត្តិនៃក្រុមហ៊ុន ERA ប្រចាំកម្ពុជាមានសុទិដ្ឋិនិយមចំពោះទីផ្សារខុនដូកម្ពុជាដោយលោកថាអ្នកទិញក្នុងស្រុក និងវិនិយោគិនអន្តរជាតិ ជាអ្នកទិញខុនដូ។ លោកគង្គាបាននិយាយថាទោះបីជាអ្នកទិញក្នុងស្រុកមានមិនទាន់ច្រើនក៏ដោយ តែនិន្នាការខុនដូហាក់ទាក់ទាញមនុស្សជំនាន់ថ្មីបានច្រើន ចំណែកអ្នកទិញពីបរទេសវិញគឺជាទីផ្សារដ៏ធំសម្រាប់កម្ពុជា។
«ខ្ញុំគិតថាការនិយាយថាទីផ្សារខុនដូមានការផ្គត់ផ្គង់លើសតម្រូវការ គឺមិនត្រឹមត្រូវទេ»។ លោកបានអះអាងថា តម្លៃខុនដូនៅកម្ពុជាទាបជាងតម្លៃខុនដូនៅក្នុងប្រទេស តំបន់អាស៊ី ដូចជាសិង្ហបុរី ថៃ និងវៀតណាមជាដើម។ ជាក់ស្តែងខុនដូ [គិតជាម៉ែត្រការ៉េ] នៅកម្ពុជាមានតម្លៃទាបជាងចិនពី៧ ទៅ ៨ ដង ទាបជាងជប៉ុន និងកូរ៉េ ពី៧ ទៅ១០ ដង និងទាបជាងសិង្ហបុរី ១០ ដង។
លោកជឿថារាល់ការទិញខុនដូនៅកម្ពុជា វិនិយោគិនអាចទទួលបានផលចំណេញដ៏ច្រើន មិនថាឬការដាក់ជួលត្រលប់ ឬការលក់ចេញវិញនៅពេលអនាគត៕