វិមានក្រេមឡាំង បដិសេធព័ត៌មានវ៉េណេស៊ុយអេឡាបញ្ជូនមាស២០តោនទៅរុស្ស៊ី

អន្តរជាតិ

វិមានក្រេមឡាំង បដិសេធព័ត៌មានវ៉េណេស៊ុយអេឡាបញ្ជូនមាស២០តោនទៅរុស្ស៊ី

31, Jan 2019 , 8:39 pm

រូបភាព

រូបភាព China Daily

ដោយ: តន ចាន់រិទ្ធារ៉ា

វិមានក្រេមឡាំងរបស់ប្រធានាធិបតីរុស្ស៊ី វ្ល៉ាឌីមៀ ពូទីន បានទាត់ចោលព័ត៌មានដែលផ្សាយថា មាសចំនួន២០តោនត្រូវដឹកទៅកាន់រុស្ស៊ីតាមយន្តហោះមួយគ្រឿង។ ព័ត៌មាននេះត្រូវបានបញ្ចេញដោយសមាជិកសភាវ៉េណេស៊ុយអេឡាម្នាក់។ លោក Dmitry Peskov អ្នកនាំពាក្យប្រធានាធិបតីរុស្ស៊ី នៅថ្ងៃទី៣០ ខែមករា អះអាងថា នេះជាព័ត៌មានក្លែងបន្លំ និងប្រាប់ឲ្យសាធារណជនប្រុងប្រយ័ត្នក្នុងការទទួលព័ត៌មាន។

នៅថ្ងៃទី៣០ ខែមករា លោក Jose Guerra សមាជិកសភាបក្សប្រឆាំង និងធ្លាប់ជាធនាគារិកនៅធនាគារកណ្ដាលរបស់វ៉េណេស៊ុយអេឡា លើកឡើងតាមបណ្ដាញសង្គម Twitter ថា លោកបានទទួលព័ត៌មានពីផែនការដឹកដុំមាសទៅកាន់រុស្ស៊ី។ អ្នកនយោបាយប្រឆាំងរូបនេះទម្លាយថា យន្តហោះរុស្ស៊ីមួយគ្រឿងដែលទៅដល់ព្រលានយន្តហោះក្រុងការ៉ាកាស់ក្នុងជើងហោះហើរពីទីក្រុងមូស្គូ ត្រៀមដឹកដុំមាសប្រមាណ២០តោនទៅកាន់ទឹកដីរុស្ស៊ីវិញ។

ការអធិប្បាយរបស់សមាជិកសភាខាងលើ ត្រូវបានផ្សាយយ៉ាងទូលាយដោយប្រព័ន្ធផ្សព្វផ្សាយលោកខាងលិច។ ក្រោយមកទៀត ក៏មានសេចក្ដីរាយការណ៍មួយទៀតថា យន្តហោះអាថ៌កំបាំងនេះ ជារបស់ក្រុមហ៊ុនអាកាសចរណ៍រុស្ស៊ី Nordwind ប្រភេទខ្នាតយក្ស Boeing 777 ដែលអាចផ្ទុកបានចំនួនជាង៤០០នាក់ឯណោះ។ នេះបើតាមការផ្សាយរបស់សារព័ត៌មាន RT ។

យ៉ាងណាមិញ រុស្ស៊ីបានទាត់ចោលព័ត៌មានទាំងអម្បាលម៉ាននេះ។ លោក Dmitry Peskov អ្នកនាំពាក្យប្រធានាធិបតីរុស្ស៊ីនិយាយថា វាគ្មានព័ត៌មានបែបនេះកើតឡើងឡើយ ហើយវាគ្រាន់តែជាការបោកបញ្ឆោតប៉ុណ្ណោះ។ ចំណែករដ្ឋមន្ត្រីហិរញ្ញវត្ថុនៃរដ្ឋាភិបាលប្រធានាធិបតីស្និទ្ធរុស្ស៊ី នីកូឡាស់ ម៉ាឌុយរ៉ូ វិញ មិននិយាយអ្វីឡើយចំពោះករណីដឹកជញ្ជូនមាសនេះ និងបានបដិសេធការចុះចតរបស់យន្តហោះរុស្ស៊ីផងដែរ។

ទន្ទឹមនឹងការបដិសេធនេះ មន្ត្រីវិមានក្រេមឡាំងដដែលនេះ ក៏បញ្ចេញជំហររុស្ស៊ីដែលត្រៀមខ្លួនជួយដោះស្រាយជម្លោះនយោបាយនៅវ៉េណេស៊ុយអេឡាដោយគ្មានការលូកលាន់ពីខាងក្រៅឡើយ។ ដោយមិននិយាយចំឈ្មោះអាមេរិក លោក Peskov ក៏សង្កត់ធ្ងន់ទៀតថា រុស្ស៊ីជំទាស់ដាច់ខាតការអន្តរាគមន៍របស់ប្រទេសទីបី។

សូមបញ្ជាក់ថា ក្នុងកាលៈទេសៈបច្ចុប្បន្ននេះ ក្រុងមូស្គូ ឈរខាងប្រធានាធិបតី ម៉ាឌុយរ៉ូ ដែលត្រូវអាចទាមទារឲ្យចុះចេញពីតំណែង។ ក្រុងមូស្គូ ក៏រិះគន់ក្រុងវ៉ាស៊ីនតោនដែលប្រកាសគាំទ្រមេដឹកនាំប្រឆាំង ហ័ន ក្វៃដូ ឲ្យធ្វើជាប្រធានាធិបតីបណ្ដោះអាសន្នជាសាធារណៈទៀតផង។ លោកប្រធានាធិបតី ពូទីន វិញ ក៏ថែមទាំងនិយាយថា ទង្វើអាមេរិកបើកចំហនៅវ៉េណេស៊ុយអេឡា ជាការបំពានច្បាប់អន្តរជាតិយ៉ាងកំរោល៕