កីឡាអន្តរជាតិ
អន្តរជាតិ
កាតាយកឈ្នះជប៉ុន ៣-១ ដើម្បីលើកពាន Asian Cup ដំបូងក្នុងប្រវត្តិសាស្ត្រ ខ្សែប្រយុទ្ធកាតា Almoez Ali ប្រើក្បាច់ពិសេសស៊ុតបញ្ចូលទីជប៉ុន។ រូបភាពពី AFC Asian Cup
× ជ័យជម្នះ ៣-១ លើក្រុមជប៉ុន គ្រប់គ្រាន់ដើម្បីនាំកាតាក្លាយជាម្ចាស់ជើងឯកពានរង្វាន់ AFC Asian Cup ឆ្នាំ២០១៩ និងជាការឈ្នះពានប្រចាំតំបន់អាស៊ីជាលើកដំបូងក្នុងប្រវត្តិសាស្ត្រក្រុមពីពិភពអារ៉ាប់មួយនេះផង។
ជាលទ្ធផលមួយគួរឲ្យភ្ញាក់ផ្អើលផងដែរសម្រាប់ក្រុមជម្រើសជាតិកាតាជាមួយនឹងគ្រាប់បាល់ស៊ុតបញ្ចូលក្រុមជប៉ុនរហូតដល់ទៅ៣គ្រាប់ នាការប្រកួតវគ្គផ្តាច់ព្រ័ត្រដែលធ្វើឡើងនាកីឡដ្ឋាន ZSC Stadium នៅយប់ថ្ងៃទី១ ខែកុម្ភៈ ឆ្នាំ២០១៩នេះ។
ខ្សែប្រយុទ្ធឆ្នើម Almoez Ali ជាអ្នករកគ្រាប់បាល់ទី១ឲ្យកាតាជាមួយនឹងការប្រើក្បាច់បកចេក (bicycle kick) ដើម្បីបំប៉ោងសំណាញ់ទីរបស់ជប៉ុន នៅនាទី១២ មុនពេលខ្សែបម្រើ Abdulaziz Hatem បន្ថែមគ្រាប់បាល់ទី២ ដោយទាត់ពីចម្ងាយយ៉ាងល្អនៅ១៥នាទីបន្ទាប់។
ចូលដល់វគ្គទី២ ជប៉ុនបានបើកការវាយសម្រុករហូតធ្វើបានសម្រេច១គ្រាប់វិញនៅនាទី៦៩ ដោយកីឡាករ Takumi Minamino។ ក្រុមរហស្សនាំសាមូរ៉ៃនៅតែបន្តវាយសម្រុកលើគូប្រកួតដោយគ្រប់គ្រងបាល់យ៉ាងច្រើន ខណៈដែលកាតាបានបង្កើនការការពារនិងវាយបកដ៏ល្អវិញផងដែរ។
កាតាដែលស្រែកឃ្លានជ័យជម្នះបំផុតនោះទទួលបានឱកាសមាស ដោយលោកអាជ្ញាផ្តល់បាល់ពិន័យប៉េណាល់ទី១១ម៉ែត្រ បន្ទាប់ពីពិនិត្យ VAR ឃើញថាប្រធានក្រុម Maya Yoshida ធ្វើឲ្យបាល់ប៉ះដៃនៅតំបន់គ្រោះថ្នាក់។ ខ្សែប្រយុទ្ធ Akram Afif ជាអ្នករ៉ាប់រងការទាត់បាល់ពិន័យនេះ និងសម្រេចទីបាននៅនាទី៨៣។ ចប់ការប្រកួតកាតាឈ្នះជប៉ុន ៣-១។
ជ័យជម្នះរបស់កាតា ជាការបញ្ចប់ក្តីសុបិនរបស់ជប៉ុនក្នុងការបំបែកកំណត់ត្រាឈ្នះក្នុងវគ្គផ្តាច់ព្រ័ត្រ Asian Cup ទាំង៥លើក ខណៈដែលពួកគេគ្រងជើងឯក៤ជំនាន់លើសគេរួចហើយ តាមរយៈការឈ្នះនៅវគ្គផ្តាច់ព្រ័ត្រទាំង ៤ដង៕
© រក្សាសិទ្ធិដោយ thmeythmey.com