ជាតិ
សុខភាព
ក្រសួងសុខាភិបាលរម្លឹកពលរដ្ឋឲ្យរក្សាអនាម័យខ្ពស់ ដើម្បីបង្ការជំងឺផ្តាសាយបក្សី,ពុលចំណី ឬស្រា
×![]()
ភ្នំពេញ៖ ក្រសួងសុខាភិបាល បានក្រើនរម្លឹកប្រជាពលរដ្ឋឲ្យរក្សាអនាម័យខ្ពស់ បង្ការការពុលចំណីអាហារ ឬស្រា ដើម្បីចៀសការឆ្លងមេរោគផ្សេងៗ ពិសេសជំងឺផ្តាសាយបក្សីលើមនុស្ស ។ ការណែនាំនេះ ដោយសាររដូវបុរណ្យចូលឆ្នាំចិន និងចូលឆ្នាំខ្មែរ ជិតឈានមកដល់ហើយជាពេលដែលពលរដ្ឋទូទៅតែងមានការជួបជុំទទួលទានភេសជ្ជៈ,ចំណីអាហារ ឬធ្វើដំណើរកម្សាន្តផ្សេងៗ។
តាមក្រសួងសុខាភិបាល ចាប់តាំងពីឆ្នាំ២០០៥ ដល់ឆ្នាំ២០១៤ កម្ពុជាធ្លាប់រកឃើញករណីជំងឺផ្តាសាយបក្សីចំនួន៥៦ករណី ក្នុងនោះ៣៧ករណីបានស្លាប់។ ទោះជាតាំងពីពេលនោះមកដល់បច្ចុប្បន្ន មិនមានករណីនេះកើតឡើងលើមនុស្សក៏ដោយ ហើយករណីពុលស្រា និងចំណីអាហារក៏កើតឡើងជាញឹកញាប់ ប៉ុន្តែពលរដ្ឋគ្រប់រូបត្រូវមានការប្រុងប្រយ័ត្នផ្ទាល់ខ្លួន។
តាមសេចក្តីណែនាំ និងបង្ការការពុលចំណីអាហារ ឬស្រា និងជំងឺផ្តាសាយបក្សី ក្រសួងណែនាឲ្យពលរដ្ឋកុំប៉ះពាល់ជាមួយសត្វនៅតាមកសិដ្ឋានចិញ្ចឹមសត្វ នៅលើទីផ្សារ ប៉ះពាល់លើផ្ទៃកខ្វក់ ឬប្រលាក់ដោយលាមកសត្វ និងហាមចូលកន្លែងសត្តឃាត បើគ្មានភារកិច្ច។ ត្រូវប្រកាន់ភ្ជាប់នូវអនាម័យផ្ទាល់ខ្លួន និងអនាម័យចំណីអាហារ ដែលអាចធានាសុវត្ថិភាព ក្នុងការបរិភោគបសុសត្វ និងស៊ុត។
ដោយឡែកវីធីការពារការពុលចំណីអាហារ និងស្រាវិញ គឺចាំបាច់រៀបចំចំណីអាហារឲ្យបានត្រឹមត្រូវ មានអនាម័យ និងចម្អិនឲ្យឆ្អិនល្អមុនបរិភោគ និងកុំបរិភោគសាច់ឆៅ។ នេះបើតាមការណែនាំដដែល ដោយបានបន្តប្រាប់ឲ្យពលរដ្ឋកុំបរិភោគអាហារដែលនៅយូរ ហើយត្រូវពិសាទឹកឆ្អិន ទឹកស្អាត និងត្រូវលាងដៃជាមួយសាប៊ូ ឲ្យបានញឹកញាប់។ ក្រសួងណែនាំកុំឲ្យពិសាស្រា ដែលផលិតមិនមានបច្ចេកទេសត្រឹមត្រូវ ឬយកមេតាណុលមកលាយធ្វើជាស្រា ស ដោយមិនមែនការត្រួតពិនិត្យត្រឹមត្រូវ៕
Tag:
សុខាភិបាល
ផ្តាសាយបក្សី
ពុលចំណី
ពុលស្រា
ចូលឆ្នាំចិន
ចូលឆ្នាំខ្មែរ
© រក្សាសិទ្ធិដោយ thmeythmey.com
