អន្តរជាតិ
តំណាងចរចានុយក្លេអ៊ែរអាមេរិក ទៅកូរ៉េខាងជើងដើម្បីជជែកការរៀបចំជំនួបមេដឹកនាំលើកទីពីរ
លោក Stephen Biegun ពេលទៅដល់កូរ៉េខាងត្បូង (រូបភាព AFP)
×![]()
ដោយ: តន ចាន់រិទ្ធារ៉ា
តំណាងចរចានុយក្លេអ៊ែរអាមេរិក Stephen Biegun នឹងធ្វើដំណើរទៅកាន់កូរ៉េខាងជើងនៅថ្ងៃទី៦ ខែកុម្ភៈ ដើម្បីជជែកពីការរៀបចំជំនួបមេដឹកនាំលើកទីពីរ និងការអនុវត្តកិច្ចព្រមព្រៀងនៅសិង្ហបុរី។ លោក Biegun នឹងជួបជាមួយសមភាគីកូរ៉េខាងជើង Kim Hyok-chol ជាលើកដំបូង ស្របពេលដែលគម្រោងនៃជំនួបមេដឹកនាំកាន់តែខិតជិតដល់ទៅហើយ។ កាលបរិច្ឆេទ និងទីតាំងផ្លូវការ នឹងត្រូវប្រកាសក្នុងសប្ដាហ៍នេះ។
អាមេរិក និងកូរ៉េខាងជើង នឹងរៀបចំជំនួបថ្នាក់ក្រុមការងារមួយនៅថ្ងៃទី៦ ខែកុម្ភៈ ដើម្បីរៀបចំជំនួបរវាងប្រធានាធិបតី ដូណាល់ ត្រាំ និងមេដឹកនាំកំពូល គីម ជុងអ៊ុន។ លោក Stephen Biegun ដែលជាប្រេសិតពិសេសទទួលបន្ទុកកិច្ចការកូរ៉េខាងជើង នឹងធ្វើដំណើរទៅកាន់រដ្ឋធានីព្យុងយ៉ាងដើម្បីជួបតទល់ជាមួយមន្ត្រីកូរ៉េខាងជើង Kim Hyok-chol ដែលទទួលបន្ទុកការងារជាមួយអាមេរិក។
លោក Biegun បានទៅដល់រដ្ឋធានីសេអ៊ូលកាលពីថ្ងៃទី៣ ខែកុម្ភៈ និងបានជួបជាមួយមន្ត្រីកូរ៉េខាងត្បូងលើបញ្ហានុយក្លេអ៊ែរកូរ៉េខាងជើង។ បើតាមការប្រកាសរបស់ក្រសួងការបរទេសអាមេរិក ក្រៅពីការពិភាក្សាលើជំនួបមេដឹកនាំកំពូល លោក Biegun ក៏នឹងជជែកពីវឌ្ឍនភាពនៃការអនុវត្តកិច្ចព្រមព្រៀងនៅសិង្ហបុរីដែលលោក ត្រាំ និងលោក គីម ឯកភាពគ្នារំសាយនុយក្លេអ៊ែរកូរ៉េខាងជើងទាំងស្រុង បង្កើតសន្តិភាពយូរអង្វែងនៅឧបទ្វីបកូរ៉េ និងបង្កើតចំណងការទូតទ្វេភាគីផង។
ក្នុងដំណើរទស្សនកិច្ចលើកទីពីរនៅកូរ៉េខាងជើង មន្ត្រីការទូតអាមេរិករូបនេះ ក៏ត្រូវបានរំពឹងថា ជជែកពីកិច្ចព្រមព្រៀងមួយជុំវិញចំណាត់ការតបវិញរបស់អាមេរិកទៅនឹងសកម្មភាពកូរ៉េខាងជើងនាពេលកន្លងមក។ ត្រង់ចំណុចនេះ លោក Biegun ធ្លាប់និយាយរួចហើយថា អាមេរិកត្រៀមខ្លួនចរចាជាមួយកូរ៉េខាងជើង ប៉ុន្តែការដាក់ទណ្ឌកម្មនឹងនៅតែមានជាធរមានបន្តទៀតរហូតដល់ការរំសាយនុយក្លេអ៊ែរត្រូវបញ្ចប់ទាំងស្រុង។
កាលពីសប្ដាហ៍មុន តំណាងចរចានុយក្លេអ៊ែររបស់ក្រុងវ៉ាស៊ីនតោនដដែលនេះ ក៏បង្ហើបដែរថា លោក ត្រាំ បើកទ្វារដល់ការប្រកាសបញ្ចប់សង្គ្រាមកូរ៉េឆ្នាំ១៩៥០-១៩៥៣ ជាផ្លូវការផង។ ការបញ្ចប់សង្គ្រាមនេះ ជាការទាមទារដ៏ធំមួយរបស់ក្រុងព្យុងយ៉ាង តែអាមេរិកហាក់ស្ទាក់ស្ទើរនៅឡើយ។ បើតាមលោក Biegun ការប្រកាសបញ្ចប់សង្គ្រាមផ្លូវនេះ គឺជាការលុបចោលអរិភាពដែលជាឧបសគ្គក្នុងទំនាក់ទំនងគូសត្រូវទាំងពីសង្គ្រាមកូរ៉េមក។
ងាកទៅប្រធានបទជំនួបត្រាំ-គីមវិញ ទីតាំង និងពេលវេលាជាក់ស្ដែងនឹងត្រូវប្រកាសនៅមុន ឬអំឡុងពេលលោក ត្រាំ ថ្លែងក្នុងកិច្ចប្រជុំសភារួមនៅថ្ងៃទី៥ ខែកុម្ភៈនេះ ខណៈអ្វីៗបានកំណត់រួចអស់ហើយ។ វៀតណាម ទំនងជាធ្វើម្ចាស់ផ្ទះជំនួបចរចារវាងប្រធានាធិបតីអាមេរិក និងប្រមុខដឹកនាំកូរ៉េខាងជើងនៅចុងខែកុម្ភៈនេះ៕
Tag:
អាមេរិក
កូរ៉េខាងជើង
© រក្សាសិទ្ធិដោយ thmeythmey.com
