ជាតិ
សង្គមជាតិ
ក្រសួងអប់រំ ប្រាប់យុវជនកុំប្រព្រឹត្តខុសប្រពៃណី ដែលនាំឲ្យបាត់បង់តម្លៃខ្លួន នៅថ្ងៃបុណ្យនៃសេចក្តីស្រឡាញ់
× ភ្នំពេញ៖ ក្រសួងអប់រំ យុវជន និងកីឡា បានចាត់វិធានការទប់ស្កាត់សកម្មភាពមិនប្រក្រតី នៅតាមគ្រឹះស្ថានសិក្សាសាធារណៈ និងឯកជន ក្នុងថ្ងៃបុណ្យនៃសេចក្តីស្រឡាញ់ខាងមុខនេះ ។ តាមរយៈការចាត់វិធានការទប់ស្កាត់នេះ ក្រសួងអប់រំមិនចង់ឲ្យយុវជន សិស្ស និងនិស្សិត ភ្លេចការសិក្សា បាត់បង់ភាពថ្លៃថ្នូររបស់ខ្លួន ប្រាសចាកវប្បធម៌ និងប្រពៃណីទំនៀមទម្លាប់ខ្មែរ នៅទិវាបុណ្យនៃសេចក្តីស្រឡាញ់១៤កុម្ភៈឡើយ។
ក្រសួងអប់រំ តែងតែសង្កេតឃើញជារៀងរាល់ឆ្នាំ ថ្ងៃទិវាបុណ្យនៃសេចក្តីស្រឡាញ់(Valentine’s Day) គឺជាឱកាសមួយដែលធ្វើឲ្យសិក្សានុសិស្សយល់ច្រឡំថា ជាថ្ងៃបុណ្យសង្សារ ឬជាថ្ងៃណាត់ជួបគ្នារវាងគូស្នេហ៍។ ការយល់ឃើញរបស់យុវជនបែបនេះ គឺមិនមែនជារឿងត្រឹមត្រូវឡើយ។
ដើម្បីទប់ស្កាត់រាល់សកម្មភាពប្រក្រតីនៅថ្ងៃបុណ្យនៃសេចក្តីស្រឡាញ់ ក្រសួងអប់រំ ណែនាំឲ្យគ្រឹះស្ថានសិក្សាសាធារណៈ ឯកជនអនុវត្តវិធានការ៤ចំណុច រួមមានទី១ ត្រូវផ្សព្វផ្សាយដល់សិស្សានុសិស្សតាមគ្រប់មធ្យោបាយ ដូចជាតាមរយៈគោរពទង់ជាតិ ណែនាំកុំឲ្យការយល់ខុសអំពីអត្ថន័យនៃទិវាបុណ្យនៃសេចក្តីស្រឡាញ់។ ទី២ ត្រូវពង្រឹងការអនុវត្តបទបញ្ជាផ្ទៃក្នុងរបស់គ្រឹះស្ថានសិក្សាសាធារណៈឲ្យបានម៉ឺងម៉ាត់ លើការគ្រប់គ្រងសីលធម៌ និងវិន័យ ដោយតាមដានវត្តមានរបស់សិស្ស។ ទី៣ ត្រូវជំរុញដំណើរការរបស់ក្រុមប្រឹក្សាយុវជន ក្រុមប្រឹក្សាកុមារប្រចាំសាលា ដោយអនុវត្តសកម្មភាព «មិត្តអប់រំមិត្ត»។ ទី៤ ត្រូវមានទំនាក់ទំនងជិតស្និទ្ធជាមួយមាតាបិតា អាណាព្យាបាល សហគមន៍ ដើម្បីផ្តល់ព័ត៌មាននានាដែលពាក់ព័ន្ធសកម្មភាពប្រក្រតីរបស់សិស្សដែលប្រព្រឹត្តខុស ឲ្យទាន់ពេលវេលា។
ក្រៅពីដាក់ចេញវិធានការនេះហើយ ក្រសួងអប់រំអំពាវនាវឲ្យពលរដ្ឋខ្មែរទាំងអស់ ជាពិសេស សិស្ស និស្សិត គួរប្រតិបត្តិឲ្យបានត្រឹមត្រូវ ដើម្បីជៀសវាងការបាត់បង់កត្តិយសរបស់ខ្លួនឯង ក្រុមគ្រួសារ និងប្រាសចាកប្រពៃណីដ៏ផូរផង់របស់ខ្មែរ៕
Tag:
ក្រសួងអប់រំ
បុណ្យនៃសេចក្តីស្រឡាញ់
© រក្សាសិទ្ធិដោយ thmeythmey.com