អន្តរជាតិ
ហុងគ្រី រិះគន់អាមេរិកដែលហាមខ្លួនរកស៊ីជាមួយរុស្ស៊ីនិងចិន រដ្ឋមន្រ្តីការបរទេសអាមេរិក ម៉ៃ ប៉ុមប៉េអូ ក្នុងសន្និសីទសារព័ត៌មានជាមួយសមភាគីហុងគ្រី Peter Szijjarto ។ (រូបភាព AFP)
× រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នៅថ្ងៃទី១១ ខែកុម្ភៈ បានទៅដល់ហុងគ្រីក្នុងដំណើរទស្សនកិច្ចបីប្រទេសនៅអឺរ៉ុបកណ្ដាល។ ជាប្រមុខការទូតអាមេរិកទីមួយជាន់ទឹកដីហុងគ្រីក្នុងពេល៨ឆ្នាំចុងក្រោយ លោក ប៉ុមប៉េអូ ប្រកាសថា ការវិលត្រឡប់របស់អាមេរិក នឹងជួយឲ្យហុងគ្រីគេចឆ្ងាយពីរុស្ស៊ី និងចិន។ ប៉ុន្តែរដ្ឋាភិបាលក្រុងប៊ុយដាប៉ែស មិនទន់ទោរតាមការប្រកាសនេះឡើយ ហើយរិះគន់នយោបាយលាក់ពុតរបស់លោកខាងលិចផង។
ហុងគ្រី ជាគោលដៅទីមួយក្នុងដំណើរទស្សនកិច្ច៥ថ្ងៃនៅអឺរ៉ុបរបស់រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ ។ ទៅដល់រដ្ឋធានីប៊ុយដាប៉ែសនៅថ្ងៃទី១១ ខែកុម្ភៈ លោក ប៉ុមប៉េអូ បានជួបជាមួយតំណាងអង្គការសង្គមស៊ីវិល មុននឹងបន្តជួបនាយករដ្ឋមន្ត្រី Victor Orban ដែលកំពុងមើលមុខគ្នាមិនត្រូវជាមួយសហភាពអឺរ៉ុប។ លោកក៏បានបង្ហាញក្ដីបារម្ភរបស់អាមេរិកចំពោះការពង្រីកឥទ្ធិពលរបស់ចិន និងរុស្ស៊ីចូលក្នុងតំបន់អឺរ៉ុបកណ្ដាល។
ប្រមុខការទូតអាមេរិករូបនេះ ចាត់ទុកការពឹងផ្អែករបស់ហុងគ្រីលើឧស្ម័នរបស់រុស្ស៊ី និងទំនាក់ទំនងទ្វេភាគីដ៏ជិតស្និទ្ធ ជាកត្ដានាំឲ្យមានបញ្ហាដល់ហុងគ្រីផ្ទាល់ និងអឺរ៉ុបទាំងមូលដែរ។ បើតាមទីភ្នាក់ងារព័ត៌មាន AFP លោក ប៉ុមប៉េអូ អះអាងថា អាមេរិកមិនអនុញ្ញាតឲ្យប្រធានាធិបតី វ្ល៉ាឌីមៀ ពូទីន បំបែកបំបាក់សមាជិកណាតូឡើយ ហើយរបបដឹកនាំផ្ដាច់ការលោក ពូទីន នៅរុស្ស៊ី ក៏មិនអាចក្លាយជាមិត្តរបស់ប្រទេសតូចៗដែរ។
មិនមែនតែរុស្ស៊ីឡើយ មន្ត្រីរដ្ឋាភិបាលលោក ដូណាល់ ត្រាំ ដដែលនេះ ក៏ព្រមានហុងគ្រីជុំវិញការរកស៊ីជាមួយចិនដែរ។ ក្នុងសន្និសីទសារព័ត៌មានជាមួយសមភាគីហុងគ្រី Peter Szijjarto លោក ប៉ុមប៉េអូ ក៏ប្រាប់ឲ្យហុងគ្រីប្រយ័ត្នប្រយែងក្នុងការធ្វើជំនួញជាមួយក្រុងប៉េកាំង ព្រោះវាតែងមានចំណងភ្ជាប់មកជាមួយ ហើយហុងគ្រីអាចនឹងជាប់បំណុលទាំងនយោបាយ និងសេដ្ឋកិច្ចផង។
ការព្រមានរបស់អាមេរិកលើការអនុវត្តនយោបាយការបរទេសរបស់ខ្លួន មិនធ្វើឲ្យហុងគ្រីពេញចិត្តឡើយ។ ប្រមុខការទូតហុងគ្រីលោក Szijjarto ចាត់ទុកការណែនាំរបស់អាមេរិកក្នុងទំនាក់ទំនងជាមួយរុស្ស៊ី ជារឿងមិនត្រឹមត្រូវឡើយ ហើយហុងគ្រីដែលមានប្រជាជនត្រឹម១០លាននាក់ ក៏គ្មានទឹកមាត់ប្រៃលើឆាកអន្តរជាតិអ្វីដែរ ខណៈដែលប្រទេសលោកពឹងផ្អែកលើការនាំចូល៌ឧស្ម័នពីរុស្ស៊ីដល់ទៅ៨៥ភាគរយឯណោះ។
ក្នុងសំណុំរឿងជាមួយរុស្ស៊ីនេះ លោក Szijjarto ចាត់ទុកការព្រមានរបស់ក្រុងវ៉ាស៊ីនតោន ជាការលាក់ពុតក្នុងសង្វៀននយោបាយរបស់អឺរ៉ុប ហើយហុងគ្រីក៏ឆ្អែតឆ្អន់នឹងការលាបពណ៌ទំនាក់ទំនងខ្លួនជាមួយរុស្ស៊ីដែរ។ បើតាមរដ្ឋមន្ត្រីការបរទេសហុងគ្រីរូបនេះ ប្រទេសអឺរ៉ុបជាច្រើនកំពុងរកស៊ីជាមួយរុស្ស៊ី ហើយសូម្បីតែប្រធានាធិបតីបារាំង អេម៉ានុយអែល ម៉ាក្រុង ក៏ធ្លាប់ចូលរួមវេទិកាសេដ្ឋកិច្ចនៅទឹកដីរុស្ស៊ីទៅទៀត។
Tag:
អាមេរិក
ហុងគ្រី
រុស្ស៊ី
ចិន
© រក្សាសិទ្ធិដោយ thmeythmey.com