អន្តរជាតិ
បំណុលអាមេរិកប៉ោងឡើងដល់ ២២ ទ្រីលានដុល្លារជាលើកដំបូងក្នុងប្រវត្តិសាស្ត្រ
× បំណុលជាតិរបស់សហរដ្ឋអាមេរិកបានកើនឡើងដល់ចំនួន ២២ ទ្រីលានដុល្លារជាលើកដំបូងបង្អស់ក្នុងប្រវត្តិសាស្ត្រ។ នេះបើយោងតាមតួលេខប្រចាំថ្ងៃដែលបានចេញផ្សាយ ដោយក្រសួងរតនាគារអាមេរិកកាលពីថ្ងៃចន្ទទី ១២ ខែកុម្ភៈ ។
បំណុលនេះបានប៉ោងឡើងច្រើនជាង ២ ទ្រីលានដុល្លារក្នុងរយៈពេលពីរឆ្នាំចុងក្រោយ ពោលគឺចាប់តាំងពីប្រធានាធិបតីអាមេរិក ដូណាល់ ត្រាំ បានចូលកាន់តំណែងកាលពីខែមករា ឆ្នាំ២០១៧មក។ កាលនោះបំណុលមានត្រឹមតែចំនួន ១៩,៩ ទ្រីលានដុល្លារប៉ុណ្ណោះ។ វាបានកើនដល់ចំនួន ២១ ទ្រីលានកាលពីខែមីនា ឆ្នាំ២០១៨។
យោងតាមការផ្សាយរបស់ទូរទស្សន៍ក្នុងស្រុកអាមេរិក CBS News ក្រោមរដ្ឋបាលរបស់អតីតប្រធានាធិបតីអាមេរិក បារ៉ាក់ អូបាម៉ា បំណុលជាតិអាមេរិកបានកើនឡើងពី ១០,៦ ទ្រីលានដុល្លារ ទៅកាន់ ១៩,៩ ទ្រីលានក្នុងរយៈពេល ៨ ឆ្នាំ។ កំណើនដ៏ច្រើនបែបនេះធ្វើឲ្យរដ្ឋបាលលោកអូបាម៉ាទទួលរងការរិះគន់យ៉ាងចាស់ដៃពីសំណាក់សមាជិកបក្សសាធារណរដ្ឋ។
បរិមាណនៃបំណុលដែលកើនឡើងយ៉ាងឆាប់រហ័សបែបនេះ គឺបណ្តាលមកពីកត្តាធំៗចំនួនពីរ។ ទីមួយគឺ ឱនភាពថវិកាជាតិរបស់អាមេរិកក្នុងឆ្នាំ២០១៨ ស្មើនឹង ៧៧៩ ពាន់លានដុល្លារ។ មួយទៀតគឺច្បាប់ស្តីការកំណែទម្រង់ការបង់ពន្ធថ្មី ដែលនឹងធ្វើឲ្យបរិមាណបំណុលកើនប្រមាណ ១,៥ ទ្រីលានដុល្លារក្នុងរយៈពេល ១០ ឆ្នាំដំបូង ក្រោយពីវាចូលជាធរមាន។
ទាក់ទិននឹងបញ្ហាបំណុលនេះ នាយកប្រតិបត្តិនៃមូលនិធិ Peter G. Peterson លោក Michael Peterson បានបញ្ជាក់នៅក្នុងសេចក្តីថ្លែងការណ៍មួយថា កំណើននៃបំណុលជាតិរបស់អាមេរិកត្រូវលើកមកចោទសួរ ព្រោះវាគំរាមកំហែងដល់អនាគតសេដ្ឋកិច្ចនៃប្រជាជនអាមេរិកគ្រប់គ្នា។ អាមេរិក ចំណាយលុយជាង១ពាន់លានដុល្លារជារៀងរាល់ថ្ងៃសម្រាប់អត្រាការប្រាក់បំណុលជាតិ។ ការបង់ថ្លៃលើអត្រាការប្រាក់នេះនឹងប៉ះពាល់ដល់សេដ្ឋកិច្ចអាមេរិក ព្រមទាំងបង្កជាការលំបាកកាន់តែខ្លាំងសម្រាប់ឲ្យរដ្ឋាភិបាលជួយដល់ការវិនិយោគសំខាន់ៗសម្រាប់អនាគតអាមេរិកផងដែរ៕
Tag:
សហរដ្ឋអាមេរិក
បំណុលជាតិ
ក្រសួងរតនាគារ
© រក្សាសិទ្ធិដោយ thmeythmey.com