អន្តរជាតិ
បុរសហ្សាម៉ាអ៊ីកម្នាក់ពាក់មុខខ្មោចពេលទទួលរង្វាន់ឆ្នោតជាង១លានដុល្លារ
× បុរសជនជាតិហ្សាម៉ាអ៊ីកម្នាក់ ត្រូវឆ្នោតរង្វាន់ដ៏ធំប្រចាំតំបន់ការ៉ាអ៊ីប ដែលមានទឹកប្រាក់ ១៥៨ ៤០០ ៤០០ដុល្លារហ្សាម៉ាអ៊ីក (ជិត១,២លានដុល្លារអាមេរិក)។ បើយោងតាមការផ្សាយរបស់ Loop News ដែលជាសារព័ត៌មានដ៏ល្បីនៅតំបន់ការ៉ាអ៊ីប ម្ចាស់រង្វាន់ Super Lotto រូបនោះ បានពាក់មុខខ្មោច ពេលឡើងទទួលរង្វាន់ពីក្រុមហ៊ុន និងស្នើឲ្យលាក់អត្តសញ្ញាណរបស់ខ្លួន។
បន្ទាប់ពីដឹងថាខ្លួនត្រូវរង្វាន់ឆ្នោតដែលមានទឹកប្រាក់ជាង១,២លានដុល្លារអាមេរិក បុរសហ្សាម៉ាអ៊ីក ដែលត្រូវបានគេស្គាល់ឈ្មោះយ៉ាងខ្លីថា Campbell មិនដែលមានអារម្មណ៍ស្រណុកក្នុងចិត្តនោះឡើយ។ គេបានចំណាយពេលរហូតដល់ទៅ៥៤ថ្ងៃ ទើបដាច់ចិត្តទៅទទួលរង្វាន់ ដោយក្រុមហ៊ុន Supreme Ventures Limited រង់ចាំមើលយ៉ាងអន្ទះសារ ប៉ុន្តែវាមិនបានរំលងលក្ខន្តិកៈឡើយ ព្រោះជ័យលាភីមានពេលយ៉ាងយូរ៩០ថ្ងៃ ក្នុងការឡើងទៅទទួលរង្វាន់។
ក្នុងពិធីដែលរៀបចំនៅសណ្ឋាគារ Spanish Court Hotel ក្នុងក្រុង St Andrew លោក Campbell បានពាក់មុខខ្មោចដូចក្នុងរឿង Scream ដើម្បីឡើងទៅទទួលរង្វាន់១៥៨ ៤០០ ៤០០ដុល្លារហ្សាម៉ាអ៊ីក (ជិត១,២លានដុល្លារអាមេរិក)។ អ្នកឈ្នះរូបនេះ មិនបានបញ្ជាក់មូលហេតុច្បាស់លាស់ទាក់ទងនឹងការបិទបាំងមុខនេះឡើយ។
តាមការដកស្រង់របស់ Loop News លោក Campbell បានធ្លាក់ខ្លួនឈឺនៅពេលដែលដឹងថាខ្លួនត្រូវឆ្នោតរង្វាន់ធំ។ លោកបញ្ជាក់ថា៖ «ក្បាលខ្ញុំឈឺអស់បីថ្ងៃ ព្រោះតែខ្ញុំបានគិតច្រើនពេក។ ស្ទើរមិនជឿថា សុបិនមួយនេះក្លាយជាការពិត»។
លោក Campbell គឺជាជនជាតិហ្សាម៉ាអ៊ីកទី១៧ ដែលបានឈ្នះឆ្នោត Super Lotto រង្វាន់ធំ។ អ្វីដែលគិតមុនគេបំផុតនោះ គឺការទិញផ្ទះថ្មីមួយ៕
Tag:
ហ្សាម៉ាអ៊ីក
ឆ្នោត
© រក្សាសិទ្ធិដោយ thmeythmey.com