អន្តរជាតិ
នៅអូស្ត្រាលី បុរសម្នាក់ត្រូវជាប់គុកមួយជីវិត ក្រោយបើកឡានបុករះស្លាប់មនុស្ស៦នាក់ ជនបង្កនោះ មានឈ្មោះថា James Gargasoulas អាយុ ២៩ឆ្នាំ (រូបថត៖ AFP)
× បុរសជនជាតិអូស្ត្រាលីម្នាក់ដែលបានបើករថយន្តបុករះចូលទៅផ្លូវក្នុងទីប្រជុំជនមួយកន្លែងនៅកណ្តាលក្រុង Melbourne កាលពីឆ្នាំ២០១៧ និងសម្លាប់មនុស្ស៦នាក់ផងនោះ ត្រូវបានតុលាការ សម្រេចឲ្យជាប់ពន្ធធនាគារអស់មួយជីវិត។ នេះបើតាមការបញ្ជាក់របស់តុលាការកំពូលរដ្ឋ Victorian នៅថ្ងៃសុក្រទី២២ ខែកុម្ភៈ។
ជនបង្កនោះ មានឈ្មោះថា James Gargasoulas អាយុ ២៩ឆ្នាំ ត្រូវបានតុលាការសម្រេចដាក់ពន្ធធនាគារអស់មួយជីវិតពីបទមនុស្សឃាត ក្នុងហេតុការណ៍បុករះកាលពី២ឆ្នាំមុន។ ហើយក្នុងចំណោមអ្នកបាត់បង់ជីវិតទាំង៦នាក់ក្នុងហេតុការណ៍ដ៏អាក្រក់ខាងលើ ក៏មានទារកនិងក្មេងស្រីអាយុ១០ឆ្នាំម្នាក់ផងដែរ។
បើតាមការចុះផ្សាយរបស់ទីភ្នាក់ងារព័ត៌មាន Reuters លោកចៅក្រុម Mark Weinberg នៃតុលាការកំពូលអូស្ត្រាលី បាននិយាយថា៖«នេះគឺករណីឃាតកម្មដ៏អាក្រក់បំផុតមួយនៅក្នុងប្រវត្តិសាស្ត្រអូស្ត្រាលី»។
លោក Weinberg បានប្រាប់ទៅកាន់បុរសជាជនបង្កនោះ នៅពេលប្រកាសសាលក្រមថា រឿងដ៏រន្ធត់ដែលអ្នកបានបង្កឡើង វានឹងជះឥទ្ធិពលដល់ជីវិតប្រជាជនជាច្រើននាក់ដែលមានវត្តមាននៅក្នុងហេតុការណ៍គ្រោះថ្នាក់នោះ រួមទាំងអ្នកដែលមើលឃើញសកម្មភាពរបស់អ្នក និងលទ្ធផលដ៏អាក្រក់ក្រោយហេតុការណ៍នេះផងដែរ។
ទាក់ទិននឹងរឿងនេះ សមត្ថកិច្ចបាននិយាយថា ឧបទ្ទវហេតុបុករះនេះគឺមិនពាក់ព័ន្ធនឹងរឿងភេរវកម្មនោះទេ។ សមត្ថកិច្ច បន្តទៀតថា ជនបង្កធ្លាប់មានប្រវត្តិប្រព្រឹត្តបទល្មើសដែលរួមមានអំពើហិង្សាក្នុងគ្រួសារ។ ម្យ៉ាងវិញទៀតបុរសរូបនេះបានសេពគ្រឿងញៀនផងដែរ។
សូមបញ្ជាក់ថា ហេតុការណ៍បុករះខាងលើនេះគឺជាការសម្លាប់ទ្រង់ទ្រាយធំដ៏អាក្រក់បំផុតមួយក្នុងប្រវត្តិសាស្ត្រអូស្ត្រាលី គិតចាប់ពីឆ្នាំ១៩៩៦មក ពោលគឺហេតុការណ៍សម្លាប់រង្គាលនៅទីតាំងប្រវត្តិសាស្ត្រ Port Arthur ភាគខាងត្បូងនៃទីក្រុង Tasmania ។ ក្នុងហេតុការណ៍នេះ មនុស្សចំនួន ៣៥នាក់ត្រូវបានគេបាញ់សម្លាប់៕
Tag:
អូស្ត្រាលី
គ្រោះថ្នាក់ចរាចរណ៍
© រក្សាសិទ្ធិដោយ thmeythmey.com