អន្តរជាតិ
វ៉េណេស៊ុយអេឡាបិទព្រំដែនជាមួយប្រេស៊ីល ដើម្បីទប់ស្កាត់ការដឹកជញ្ជូនជំនួយអាមេរិក រូបភាព AFP
× ប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ បានចេញបញ្ជាបិទព្រំដែនជាមួយប្រេស៊ីល ដែលជាប្រទេសទទួលស្គាល់មេដឹកនាំប្រឆាំង ហ័ន ក្វៃដូ ។ ការបិទព្រំដែននេះ ជាវិធានការទប់ស្កាត់ការដឹកជញ្ជូនជំនួយចូលទឹកដីវ៉េណេស៊ុយអេឡាតាមច្រកព្រំដែនប្រេស៊ីល ខណៈលោក ម៉ាឌុយរ៉ូ អះអាងថា ជំនួយទាំងនោះជាផ្នែកមួយនៃអន្តរាគមន៍យោធាអាមេរិក។ មិនត្រឹមព្រំដែនជាមួយប្រេស៊ីលឡើយ ព្រំដែនជាមួយកូឡុំប៊ី ក៏អាចនឹងបិទដែរ។
ព្រំដែនដែនអាកាស និងសមុទ្រ ត្រូវបិទចាប់ពីថ្ងៃទី២១ ខែកុម្ភៈតទៅរហូតមានបទបញ្ជាថ្មី។ នេះជាបញ្ជារបស់ប្រធានាធិបតីវ៉េណេស៊ុយអេឡាទៅកាន់យោធាប្រទេសនេះ។ ការរឹតត្បិតនេះ ធ្វើឡើងស្របពេលដែលអាមេរិកកំពុងព្យាយាមបញ្ជូនជំនួយមនុស្សទៅកាន់វ៉េណេស៊ុយអេឡាតាមសំណើមេដឹកនាំប្រឆាំង ហ័ន ក្វៃដូ ដែលអះអាងថា ប្រជាជនវ៉េណេស៊ុយអេឡាកំពុងជួបបញ្ហាបន្ទាន់ ប៉ុន្តែលោក ម៉ាឌុយរ៉ូ ថា គ្មានវិបត្តិមនុស្សធម៌នៅប្រទេសលោកឡើយ។
មិនមែនតែប្រេស៊ីលឡើយ លោក ម៉ាឌុយរ៉ូ ក៏លើកឡើងពីលទ្ធភាពក្នុងការបិទព្រំដែនជាមួយកូឡុំប៊ីទាំងស្រុងដែរ ខណៈព្រំដែនត្រូវបានរាំងខ្ទប់ពីសំណាក់យោធាជាស្រេចហើយនោះ។ លោក ក្វៃដូ ដែលតាំងខ្លួនជាប្រធានាធិបតីវ៉េណេស៊ុយអេឡានោះ បានចាកចេញពីរដ្ឋធានីការ៉ាកាស់ក្នុងដំណើរឆ្ពោះទៅកាន់ព្រំដែនជាមួយកូឡុំប៊ីជាទីដែលជំនួយមនុស្សធម៌របស់អាមេរិកជាប់គាំងនៅម្ខាងទៀតនៃព្រំដែន ដើម្បីនាំយកជំនួយបន្ទាន់សម្រាប់ប្រជាជន។
តាមពិតទៅ លោក ម៉ាឌុយរ៉ូ បារម្ភថា អាមេរិកអាចប្រើប្រាស់ក្បូនដឹកជញ្ជូនជំនួយនេះជាលេស ដើម្បីផ្គត់ផ្គង់អាវុធឲ្យក្រុមប្រឆាំង សំដៅផ្ដួលរំលំរដ្ឋាភិបាលរបស់ខ្លួន។ ប្រេសិតពិសេសអាមេរិកប្រចាំវ៉េណេស៊ុយអេឡាដែលទើបតែងតាំង Elliott Abrams ធ្លាប់មានប្រវត្តិប្រើរថយន្តដឹកជំនួយដើម្បីបង្កប់អាវុធក្នុងគោលដៅផ្លាស់ប្ដូររបបដឹកនាំប្រទេសនៅអាមេរិកឡាទីន។ ក្រុងការ៉ាកាស់ជឿថា ក្រុងវ៉ាស៊ីនតោនកំពុងដើរតាមផ្លូវនេះទៀត។
យ៉ាងណាមិញ ក្នុងគោលដៅទាញយកប្រជាប្រិយភាពដូចលោក ក្វៃដូ នោះ លោក ម៉ាឌុយរ៉ូ ក៏បញ្ជាឲ្យដឹកជញ្ជូនអាហារជាច្រើនទៅឲ្យប្រជាជនស្រេកឃ្លាននៅព្រំដែនជាមួយកូឡុំប៊ី។ ប្រកែកមិនទទួលជំនួយរបស់អាមេរិក នៅថ្ងៃទី២១ ខែកុម្ភៈ ប្រធានាធិបតីវ៉េណេស៊ុយអេឡាដដែល ក៏ប្រកាសពីការទទួលជំនួយមនុស្សធម៌ជាថ្នាំសង្កូវប្រមាណ៧,៥តោនពីរុស្ស៊ី ដែលជាសម្ព័ន្ធមិត្តដ៏សំខាន់របស់ខ្លួន។
លោក ម៉ាឌុយរ៉ូ បានអរគុណសម្ព័ន្ធមិត្តរបស់ខ្លួនជាអនេកចំពោះការបញ្ជូនជំនួយនេះ និងថា វាជួយដល់ប្រព័ន្ធនាំចូលរបស់វ៉េណេស៊ុយអេឡាដែលកំពុងរឹតត្បិតដោយអាមេរិក។ មិនត្រឹមរុស្ស៊ី មេដឹកនាំវ៉េណេស៊ុយអេឡារូបនេះបញ្ជាក់ថា ចិន គុយបា ឥណ្ឌា តួកគី និងសូម្បីប៉ាឡេស្ទីនក៏បានផ្ដល់ជំនួយឲ្យរដ្ឋាភិបាលរបស់លោកដែរ៕
Tag:
វ៉េណេស៊ុយអេឡា
ប្រេស៊ីល
កូឡុំប៊ី
នីកូឡាស់ ម៉ាឌុយរ៉ូ
© រក្សាសិទ្ធិដោយ thmeythmey.com