អន្តរជាតិ
WB ចង់ចែករំលែកបទពិសោធន៍សេដ្ឋកិច្ចជោគជ័យវៀតណាមដល់ប្រទេសដទៃ នាយករដ្ឋមន្ត្រីវៀតណាម Nguyễn Xuân Phúc (ស្តាំ) ចាប់ដៃជាមួយ អនុប្រធានទទួលបន្ទុកផ្នែកហេដ្ឋារចនាសម្ព័ន្ធនៃធនាគារពិភពលោក នៅរដ្ឋធានីហាណូយ ប្រទេសវៀតណាម កាលពីថ្ងៃទី ២១ ខែកុម្ភៈ ឆ្នាំ២០១៩
× ធនាគារពិភពលោក ចង់យកបទពិសោធន៍ជោគជ័យខាងការអភិវឌ្ឍន៍សេដ្ឋកិច្ចរបស់វៀតណាមទៅចែករំលែកជាមួយបណ្តាប្រទេសផ្សេងទៀតនៅក្នុងតំបន់។ នេះបើតាមការបញ្ជាក់របស់លោក Makhtar Diop អនុប្រធានទទួលបន្ទុកផ្នែកហេដ្ឋារចនាសម្ព័ន្ធនៃធនាគារពិភពលោក ដោយសង្កត់ធ្ងន់ថា ខ្លួនប្តេជ្ញាជួយគាំទ្រក្នុងការអភិវឌ្ឍន៍ហេដ្ឋារចនាសម្ព័ន្ធជាមួយវៀតណាមថែមទៀតផង។
អំឡុងជំនួបជាមួយនាយករដ្ឋមន្ត្រីវៀតណាម លោក Nguyễn Xuân Phúc នៅថ្ងៃព្រហស្បតិ៍ទី២១ ខែកុម្ភៈ នាទីក្រុងហាណូយ លោក Makhtar បានអបអរសាទរចំពោះសមិទ្ធផលដ៏អស្ចារ្យរបស់វៀតណាមក្នុងកំណើនសេដ្ឋកិច្ច និងសុខមាលភាពសង្គម។ នេះបើតាមការចុះផ្សាយរបស់សារព័ត៌មាន Vietnam News ។
ប្រទេសជាច្រើនអាចរៀនសូត្រពីបទពិសោធន៍របស់វៀតណាមក្នុងការប្រែក្លាយពីប្រទេសមានប្រាក់ចំណូលទាបទៅកាន់ប្រទេសមានប្រាក់ចំណូលមធ្យម ខណៈធានាបាននូវស្ថិរភាពសង្គមនិងម៉ាក្រូសេដ្ឋកិច្ចថែមទៀតផង។ នេះបើតាមការបញ្ជាក់របស់ Makhtar ដោយសង្ឃឹមថា វៀតណាមក៏នឹងបន្តដើរតួយ៉ាងសំខាន់ក្នុងការអភិវឌ្ឍតំបន់និងអនុតំបន់ផងដែរ។
ទន្ទឹមនឹងនេះ លោកនាយករដ្ឋមន្ត្រីវៀតណាមបានអរគុណធនាគារពិភពលោកសម្រាប់ការគាំទ្រដល់ការអភិវឌ្ឍវៀតណាមក្នុងរយៈពេលជាច្រើនឆ្នាំចុងក្រោយនេះ ជាពិសេសក្នុងការកាត់បន្ថយភាពក្រីក្រ, ការអភិវឌ្ឍហេដ្ឋារចនាសម្ព័ន្ធ និងថាមពលជាដើម។ លោកថា វៀតណាមប្តេជ្ញានឹងបំពេញតាមរាល់កិច្ចព្រមព្រៀងដែលខ្លួនមាន ជាមួយធនាគារពិភពលោក។
បើតាមលោក Phúc បច្ចុប្បន្ននេះវៀតណាមត្រូវការទុនវិនិយោគច្រើនសម្រាប់ការអភិវឌ្ឍ។ ត្រង់នេះ លោកស្នើសុំជំនួយពីធនាគារពិភពលោកក្នុងការសម្រេចគោលដៅអភិវឌ្ឍវិស័យចម្បងៗរួមមាន ថាមពលបៃតង,ហេដ្ឋារចនាសម្ព័ន្ធ និងពង្រឹងស្ថាប័នដែលស្ថិតក្រោមទម្រង់វិនិយោគភាពជាដៃគូរដ្ឋ-ឯកជន។ បន្ថែមពីនេះ មេដឹកនាំវៀតណាមរូបនេះសង្ឃឹមថា ធនាគារពិភពលោកនឹងធ្វើការយ៉ាងជិតស្និទ្ធជាមួយប្រទេសលោក ដើម្បីផ្តល់នូវជំនួយផ្នែកបច្ចេកទេស និងជំនួយឥតសំណងជាដើមអំឡុងការអភិវឌ្ឍរបស់ខ្លួន៕
Tag:
វៀតណាម
សេដ្ឋកិច្ច
ធនាគារពិភពលោក
© រក្សាសិទ្ធិដោយ thmeythmey.com