កីឡាជាតិ
ជាតិ
ក្រុមកីឡាបាល់ទាត់នារី U-19 ប្រកួតមិត្តភាពក្នុងកម្មវិធី Jenesys នៅជប៉ុនរយៈពេល១០ថ្ងៃ
×![]()
ដោយ: ទេព ពិទូរ្យ
ក្រុមកីឡាបាល់ទាត់នារីក្រោមអាយុ១៩ឆ្នាំកម្ពុជា ចំនួន១៨រូប រួមទាំងថ្នាក់ដឹកនាំ៥រូប ចូលរួមក្នុងព្រឹត្តិការណ៍ប្រកួតលក្ខណៈមិត្តភាពអន្តរជាតិ ក្រោមកម្មវិធី «ផ្លាស់ប្តូរយុវជន Jenesys ២០១៨» ដែលចាប់ផ្តើមពីថ្ងៃទី២៦ ខែកុម្ភៈ ដល់ថ្ងៃទី៧ ខែមីនា ឆ្នាំ២០១៩។
បើតាមសេចក្តីប្រកាសព័ត៌មានរបស់ស្ថានទូតជប៉ុនប្រចាំកម្ពុជានៅថ្ងៃទី២៥ ខែកុម្ភៈ ក្រសួងការបរទេសជប៉ុនក៏បានអញ្ជើញក្រុម U-19 នារី ចំនួន៦ក្រុមផ្សេងទៀតពីតំបន់អាស៊ានដែលរួមមាន ឡាវ ម៉ាឡេស៊ី មីយ៉ាន់ម៉ា សិង្ហបុរី ថៃ និងវៀតណាមទៅចូលរួមផងដែរ។
ក្រោមកម្មវិធីបណ្តាញផ្លាស់ប្តូរសិស្ស និស្សិត និងយុវជនជប៉ុន ជាមួយបណ្តាប្រទេសអាស៊ីខាងកើតដែលហៅកាត់ថា Jenesys 2018 ក្នុងរយៈពេល១០ថ្ងៃនេះ កីឡាការិនីប្រតិភូទាំងអស់ នឹងទទួលបានការបណ្តុះបណ្តាល និងផ្លាស់ប្តូរបទពិសោធតាមរយៈការប្រកួតមិត្តភាព ព្រមទាំងស្វែយល់ពីវប្បធម៌ជប៉ុននៅខេត្តអុគីណាវ៉ា។
ជប៉ុន បង្កើតកម្មវិញ Jenesys នេះឡើងគឺដើម្បីជំរុញការយល់ដឹង និងសាងទំនុកចិត្តទៅវិញទៅមករវាងប្រជាជនខ្លួន ជាមួយបណ្តាប្រទេសដែលចូលរួមក្នុងគោលបំណងកសាងមូលដ្ឋានគ្រឹះនៃកិច្ចសហប្រតិបត្តិការ រួមទាំងបង្កើនចំណងមិត្តភាពនាពេលអនាគតផងដែរ។ តាមរយៈកម្មវិធីនម្ចាស់ផ្ទះសង្ឃឹមថា អ្នកចូលរួមទាំងអស់អាចស្គាល់ប្រទេសជប៉ុនកាន់តែម្ចាស់ ដើម្បីត្រលប់មកចែករំលែកបទពិសោធនៅកម្ពុជាវិញ។
ក្រសួងការបរទេសជប៉ុនបានចាប់ផ្តើមធ្វើកម្មវិធី «ផ្លាស់ប្តូរយុវជន Jenesys ២០១៨» នេះតាំងពីឆ្នាំ២០០៧មក ខណៈយុវជនកម្ពុជាជាង២០០០នាក់ធ្លាប់បានចូលរួមកម្មវិធីនេះរួមមកហើយ៕
Tag:
បាល់ទាត់
ជប៉ុន
Jenesys
© រក្សាសិទ្ធិដោយ thmeythmey.com
