ជាតិ
សង្គមជាតិ
វៀតណាមឲ្យ២៥លានដុល្លារសង់អគារសភា ក្រោយពីឲ្យ១០លានសង់អគារក្រសួងការពារជាតិ រូបពីហ្វេសប៊ុកសម្ដេច ហ៊ុន សែន
× ភ្នំពេញ៖ កម្ពុជា និងវៀតណាម បានចុះកិច្ចព្រមព្រៀងចំនួន ៥ ក្នុងដំណើរទស្សនកិច្ចរបស់ប្រមុខរដ្ឋសាធារណរដ្ឋសង្គមនិយមវៀតណាមមកកាន់កម្ពុជា។ មួយក្នុងចំណោមនោះគឺជាកិច្ចសន្យាផ្ដល់ហិរញ្ញប្បទានឥតសំណងចំនួន ២៥លានដុល្លារអាមេរិករបស់រដ្ឋាភិបាលវៀតណាមសម្រាប់ស្ថាបនាអគាររដ្ឋបាលនៃរដ្ឋសភារបស់កម្ពុជា។
ក្នុងជំនួបពិភាក្សាទ្វេភាគី នៅថ្ងៃទី២៦ខែកុម្ភៈនេះ ភាគីកម្ពុជា និងវៀតណាមបានចុះហត្ថលេខាលើឯកសារចំនួន៥ ក្រោមអធិបតីរបស់ប្រមុខរដ្ឋាភិបាលសម្ដេច ហ៊ុន សែន និងលោក Nguyen Phu Trong ប្រមុខរដ្ឋវៀតណាម។
ឯកសារទាំងនោះរួមមាន៖ ១, ពិធីសារស្ដីពីវិសោធនកម្មលើពិធីសារសម្រាប់អនុវត្តកិច្ចព្រមព្រៀងកម្ពុជា-វៀតណាមស្ដីពីការដឹកជញ្ជូនផ្លូវគោក ២, សេចក្ដីបន្ថែមស្ដីពីការកែប្រែមាត្រា៦ និងមាត្រា១៧ នៃកិច្ចព្រមព្រៀងកម្ពុជា-វៀតណាមស្ដីពីការដឹកជញ្ជូនផ្លូវទឹក ៣, អនុស្សារណៈនៃការយោគយល់គ្នាស្ដីពីការផ្ដល់ហិរញ្ញប្បទានឥតសំណង ២៥លានដុល្លារអាមេរិកសម្រាប់ការអនុវត្តគម្រោងសាងសង់អគាររដ្ឋបាលរបស់រដ្ឋសភា ៤, ការចុះហត្ថលេខាលើកិច្ចសម្របសម្រួលជំរុញពាណិជ្ជកម្មទ្វេភាគីស្ដីពីការអនុគ្រោះពន្ធសម្រាប់ឆ្នាំ២០១៩-២០២០ និងទី៥, អនុស្សារណៈនៃការយោគយល់គ្នាស្ដីពីកិច្ចសហប្រតិបត្តិការទេសចរណ៍សម្រាប់ឆ្នាំ២០១៩-២០២០១ រវាងក្រសួងទេសចរណ៍កម្ពុជា និងក្រុមហ៊ុនអាកាសចរវៀតណាម។
សូមបញ្ជាក់ថា ប្រមុខរដ្ឋវៀតណាមលោក Nguyen Phu Trong មកទស្សនកិច្ចកម្ពុជាចំនួនពីរថ្ងៃចាប់ពីថ្ងៃទី២៥ ដល់ថ្ងៃទី២៦ ក្នុងគោលដៅពង្រឹងទំនាក់ទំនងប្រទេសទាំងពីរកម្ពុជា និងវៀតណាម។
កាលពីចុងខែធ្នូឆ្នាំ២០១៨ កន្លងទៅ ក្នុងដំណើរទស្សនកិច្ចកម្ពុជារបស់រដ្ឋមន្ត្រីក្រសួងការពារជាតិវៀតណាម រដ្ឋាភិបាលវៀតណាមបានផ្ដល់ថវិកា ១០លានដុល្លារសម្រាប់កសាងអគារក្រសួងការពារជាតិរបស់កម្ពុជា៕
© រក្សាសិទ្ធិដោយ thmeythmey.com