អន្តរជាតិ
លោក ត្រាំ នឹងជួបលោក ស៊ី ដើម្បីចុះហត្ថលេខាលើកិច្ចព្រមព្រៀងបញ្ចប់សង្គ្រាមពាណិជ្ជកម្ម
លោក ស៊ី ជិនភីង និងលោក ដូណាល់ ត្រាំ នាជំនួបនៅអាហ្សង់ទីន (រូបភាព AFP)
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ និយាយនៅថ្ងៃទី២៥ ខែកុម្ភៈ ថា លោកនឹងជួបជាមួយប្រធានាធិបតីចិន ស៊ី ជិនភីង ដើម្បីចុះហត្ថលេខាលើកិច្ចព្រមព្រៀងបញ្ចប់ជម្លោះពាណិជ្ជកម្ម។ លោក ត្រាំ និយាយបែបនេះ ខណៈការចរចារវាងមហាអំណាចសេដ្ឋកិច្ចទាំងពីរមានទទួលបានលទ្ធផលច្រើនគួរឲ្យកត់សម្គាល់ខ្លាំង ក្រោយការចរចាច្រើនជុំទាំងនៅវ៉ាស៊ីនតោន និងនៅប៉េកាំង។
ចាប់តាំងពីជម្លោះពាណិជ្ជកម្មផ្ទុះឡើងនៅខែកក្កដា ឆ្នាំ២០១៨ អាមេរិក និងចិនស្វះស្វែងរកច្រកចេញពីជម្លោះនេះ សំដៅបញ្ចៀសគ្រោះកាចនេះកុំឲ្យរាលដាលកាន់តែខ្លាំង។ មេដឹកនាំអាមេរិក និងចិនក៏ណាត់ជួបគ្នានៅដើមខែធ្នូ ឆ្នាំដដែលនៅក្រៅកិច្ចប្រជុំប្រទេសមានសេដ្ឋកិច្ចរីកចម្រើនទាំង២០ នៅអាហ្សង់ទីន ហើយក៏ព្រមព្រៀងគ្នាផ្អាកការអនុវត្តការដំឡើងពន្ធដាក់ទំនិញគ្នារយៈពេល៩០ថ្ងៃ ដើម្បីទុកពេលចរចារកដំណោះស្រាយ។
ក្រោយៗមកទៀត មន្ត្រីជាន់ខ្ពស់អាមេរិក និងចិនក៏ជួបចរចាគ្នាជាច្រើនលើកទាំងនៅរដ្ឋធានីប៉េកាំង និងវ៉ាស៊ីនតោនផង ក្នុងគោលដៅស្វែងរកចំណុចរួមគ្នា។ ការជជែកគ្នាក៏ទទួលបានលទ្ធផលច្រើនគួរឲ្យកត់សម្គាល់ រហូតដល់លោកប្រធានាធិបតីអាមេរិក ដូណាល់ ត្រាំ ប្រកាសពន្យារពេលអនុវត្តពន្ធ២០ភាគរយលើទំនិញចិនតម្លៃ២០០ពាន់លានដុល្លារ ដែលគ្រោងនឹងអនុវត្តចាប់ពីថ្ងៃទី២ ខែមីនាខាងមុខបណ្ដោះអាសន្នផង។
បន្ទាប់ពីជំនួបចរចាចុងក្រោយនៅឯរដ្ឋធានីវ៉ាស៊ីនតោនដែលចំណាយពេលបួនថ្ងៃកាលពីសប្ដាហ៍មុន លោក ត្រាំ នៅថ្ងៃទី២៥ ខែកុម្ភៈ ក៏លើកឡើងពីលទ្ធភាពដែលលោកនឹងជួបសមភាគីចិន ស៊ី ជិនភីង ដើម្បីចុះហត្ថលេខាលើកិច្ចព្រមព្រៀងបញ្ចប់បញ្ហាតែម្ដង។ លោកក៏រំពឹងថា ការចរចាមួយជុំទៀតនឹងធ្វើឡើងឆាប់ៗនេះដើម្បីដោះស្រាយបញ្ហាសេសសល់។ កាលពីសប្ដាហ៍មុន លោកនិយាយថា ជំនួបជាមួយប្រធានាធិបតីចិនអាចធ្វើនៅរដ្ឋ Florida នៅខែមីនា។
គេមិនដឹងច្បាស់ថា ចិនសុខចិត្តធ្វើតាមលក្ខខណ្ឌអាមេរិកលើចំណុចណាខ្លះឡើយ ខណៈអាមេរិកទាមទារឲ្យចិនចាត់វិធានការច្រើនគួរសមចាប់តាំងពីការការពារកម្មសិទ្ធិបញ្ញា ការបើកចំហទីផ្សារសម្រាប់ក្រុមហ៊ុនអាមេរិក រហូតដល់ការកែទម្រង់រចនាសម្ព័ន្ធសេដ្ឋកិច្ចផងដែរ។ ប៉ុន្តែក្នុងសារតាមរយៈបណ្ដាញសង្គម Twitter ក្នុងដំណើរទៅជួបលោក គីម ជុងអ៊ុន នៅហាណូយ លោក ត្រាំ អះអាងថា កិច្ចព្រមព្រៀងជាមួយចិនឈានដល់ដំណាក់រីកចម្រើនហើយ។
វិបត្តិពាណិជ្ជកម្មរវាងអាមេរិកនិងចិនមានការដំឡើងពន្ធទៅមកអស់៣១០ពាន់លានដុល្លារហើយនោះ ស្ថិតក្រោមការឃ្លាំមើលយ៉ាងយកចិត្តទុកបំផុត ដ្បិតវាអាចធ្វើឲ្យប៉ះពាល់កំណើនសេដ្ឋកិច្ចសាកលមិនខាន បើគ្មានដំណោះស្រាយទេនោះ។ ទោះជាយ៉ាងណា ស្ថានការណ៍ល្អប្រសើរដូចបច្ចុប្បន្ននេះ ជារឿងដែលធ្វើឲ្យអ្នកវិនិយោគជុំវិញពិភពលោកសប្បាយចិត្តខ្លាំង និងរំពឹងថា មហាអំណាចសេដ្ឋកិច្ចទាំងពីរអាចដោះស្រាយបញ្ហាបាន៕
Tag:
អាមេរិក
ចិន
ដូណាល់ ត្រាំ
ស៊ី ជិនភីង
© រក្សាសិទ្ធិដោយ thmeythmey.com
