កីឡាជាតិ
ជាតិ
AFC Cup៖ ណាហ្គាវើលបើកឆាកពូល F ដោយចាញ់ម្ចាស់ផ្ទះ Hanoi FC ១០-០ ក្រុមកីឡាករ Hanoi FC អបអរគ្រាប់បាល់បញ្ចូលទីលើណាហ្គាវើល។ រូបថត AFC
× ម្ចាស់ជើងឯកខេមបូឌានលីគ ណាហ្គាវើល បានរងបរាជ័យយ៉ាងធ្ងន់ធ្ងរនាជំនួបបើកឆាកពូល F នៃវគ្គជម្រុះ AFC Cup ដោយចាញ់ម្ចាស់ផ្ទះ Hanoi FC ១០-០ នៅកីឡដ្ឋាន Hang Day Stadium នាទីក្រុងហាណូយ ល្ងាចថ្ងៃអង្គារ ទី២៦ ខែកុម្ភៈ នេះ។
Hanoi FC ដែលជាម្ចាស់ជើងឯក V.League 1 របស់វៀតណាម រកបាន៤គ្រាប់នៅតង់ទីមួយ និងបន្ថែម៦គ្រាប់ទៀតនៅតង់ទីពីរ។ ខ្សែប្រយុទ្ធនីហ្សេរីយ៉ា Ganiyu Oseni សម្រេចបានតែម្នាក់ឯងចំនួន៤គ្រាប់ ខណៈ Do Duy Manh, Nguyen Van Quyet, Do Hung Dung, Nguyen Van Dung និង Ngan Van Dai ជួយបានម្នាក់១គ្រាប់ រីឯ១គ្រាប់ទៀត ជាគ្រាប់ Own Goal របស់កីឡាករណាហ្គាវើល ឡេង មករា។
ក្នុងការប្រកួតទាំងមូល Hanoi FC មានឱកាសស៊ុតរហូតដល់ទៅ២៨លើក និងចំគោលដៅ១២លើក និងគ្រប់គ្រងការប្រកួតជាង៧០ភាគរយ រីឯណាហ្គាវើល បានស៊ុតតែ៣លើកប៉ុណ្ណោះ ក្នុងនោះ២លើកចំគោលដៅ។
Hanoi FC ឡើងលេខមួយពូល F បណ្តោះអាសន្ន ចំណែក Tampines Rovers របស់សិង្ហបុរី ឈរលេខពីរ ក្រោយពីពួកគេយកឈ្នះម្ចាស់ផ្ទះ Yangon United របស់មីយ៉ាន់ម៉ា ក្នុងលទ្ធផល ៣-១ ។
សម្រាប់ការប្រកួតបន្ទាប់នាថ្ងៃទី១២ ខែមិនា ណាហ្គាវើល យកកីឡដ្ឋានជាតិអូឡាំពិកដើម្បីស្វាគមន៍ Yangon United រីឯ Hanoi FC ធ្វើទៅកាន់កីឡដ្ឋាន Jalan Besar ដើម្បីតទល់ជាមួយ Tampines Rovers៕
© រក្សាសិទ្ធិដោយ thmeythmey.com