ជាតិ
សេដ្ឋកិច្ច
លោក ឃួង ស្រេង ស្នើឲ្យម្ចាស់រោងចក្រ សហគ្រាស និងយានដ្ឋានជួសជុល ប្តូរទីតាំងទៅជាយក្រុង
រូបភាពពីរដ្ឋបាលរាជធានីភ្នំពេញ
×![]()
ភ្នំពេញ៖ អភិបាលរាជធានីភ្នំពេញ ស្នើឲ្យម្ចាស់រោងចក្រ សហគ្រាស និងយានដ្ឋានជួសជុលរថយន្តធំៗ ប្តូរទីតាំងទៅជាយក្រុង ដើម្បីបញ្ចៀសបញ្ហាស្ទះចរាចរណ៍ និងសណ្ដាប់ធ្នាប់សាធារណៈ។
ខណៈដែលស្ថានភាពកម្ពុជា កំពុងមានការរីកចម្រើន លើវិស័យសេវាដឹកជញ្ជូនសាធារណៈ ហេដ្ឋារចនាសម្ព័ន្ធ និងសំណង់អគារជាច្រើននោះ វាក៏ជះឥទ្ធពលអវិជ្ជមានខ្លះ ដល់ការគ្រប់គ្រងសណ្ដាប់ធ្នាប់សាធារណៈ និងបញ្ហាស្ទះចរាចរណ៍ ដែលជាចំណុចអាទិភាព ក្នុងចំណោមប្រឈមផ្សេងទៀត សម្រាប់អាជ្ញាធររាជធានីភ្នំពេញ ត្រូវដោះស្រាយដែរ។ អភិបាលរាជធានីភ្នំពេញ ក៏បានដឹងពីរឿងនេះ។ ដូច្នេះដើម្បីដោះស្រាយបញ្ហាទាំងនេះ លោក ឃួង ស្រេង ស្នើឲ្យម្ចាស់រោងចក្រ សហគ្រាស និងយានដ្ឋានជួសជុលរថយន្តធំៗ ប្តូរទីតាំងទៅជាយក្រុងវិញ ។
សេចក្តីជូនដំណឹងរបស់រដ្ឋបាលរាជធានីភ្នំពេញ ដែលបានរៀបរាប់ពីការអភិវឌ្ឍរបស់កម្ពុជា ហើយចុះហត្ថលេខាដោយលោក ឃួង ស្រេង បានបញ្ជាក់ដូច្នេះថា៖«ដើម្បីឲ្យរាជធានីភ្នំពេញរក្សាបាននូវសុវត្ថិភាព សណ្ដាប់ធ្នាប់ និងរបៀបរៀបរយសាធារណៈ ព្រមទាំងបញ្ចៀសបានការកកស្ទះចរាចរណ៍ និងកាត់បន្ថយគ្រោះថ្នាក់ចរាចរណ៍ រដ្ឋបាលរាជធានីភ្នំពញ ស្នើសុំប្រជាពលរដ្ឋជាម្ចាស់រោងចក្រ សហគ្រាស ឃ្លាំងស្ដុកទំនិញ និងយានដ្ឋានជួសជុលរថយន្តធំៗ ដែលមានទីតាំងស្ថិតនៅក្នុងតំបន់ទីប្រជុំជនក្នុងរាជធានីភ្នំពេញទាំងអស់ រៀបចំផ្លាស់ប្ដូរទីតាំងអាជីវកម្មរបស់ខ្លួនឲ្យទៅស្ថិតនៅតាមបណ្ដោយផ្លូវក្រវ៉ាត់ក្រុងទី៣ ដែលក្រសួងសាធារណការ និងដឹកជញ្ជូន បានកំពុងស្ថាបនា»។
ទីតាំងដែលសាលារាជធានីភ្នំពេញ ចង់ឲ្យម្ចាស់អាជីវកម្មខាងលើ ផ្លាស់ទីតាំងឈរជើង នោះគឺស្ថិតនៅផ្លូវឆ្លងកាត់រាជធានីភ្នំពេញ និងខេត្តកណ្ដាល ចាប់ពីស្ពានព្រែកព្នៅ មហាវិថីឈ្នះ ឈ្នះ (ផ្លូវកប់ស្រូវ) ផ្លូវជាតិលេខ៤ ត្រង់គីឡូម៉ែត្រលេខ ១៤+១០៥ ទៅភ្ជាប់ផ្លូវជាតិលេខ១ ត្រង់គីឡូម៉ែត្រលេខ២៤+៨៤០ ដោយកាត់ផ្លូវជាតិលេខ៣ ផ្លូវជាតិលេខ២ និងផ្លូវជាតិលេខ២១ ។ គម្រោងផ្លូវក្រវ៉ាត់ក្រុងទី៣នេះ នឹងស្ថាបនារួចរាល់នៅឆ្នាំ២០២១ខាងមុខ ហើយអាជ្ញាធររាជធានីភ្នំពេញ នឹងអនុវត្តវិធានការតឹងរ៉ឹងលើរថយន្តធំ ដែលបើកបរចូលក្រុងតែម្ដង។
អភិបាលរាជធានីភ្នំពេញ បានបញ្ជាក់ដូច្នេះថា៖«ក្រោយពេលផ្លូវក្រវ៉ាត់ក្រុងទី៣នេះ សាងសង់រួចរាល់ រដ្ឋបាលរាជធានីភ្នំពេញ នឹងហាមឃាត់រថយន្តធុនធំគ្រប់ប្រភេទទាំងអស់ មិនអនុញ្ញាតឲ្យចរាចរណ៍ចូលរាជធានីភ្នំពេញទៀតឡើយ»។
កន្លងមករដ្ឋបាលរាជធានីភ្នំពេញ ក៏បានដាក់វិធានការរឹតបន្ដឹងច្បាប់ចរាចរណ៍ ,បំពាក់បរិក្ខារប្រព័ន្ធចរាចរណ៍ និងហាមឃាត់រថយន្តធុនធំចរាចរណ៍ក្នុងក្រុងនៅពេលថ្ងៃក្តី ប៉ុន្តែការកកស្ទះចរាចរណ៍ និងគ្រោះថ្នាក់ចរាចរណ៍ នៅតែមានការកើនឡើងគួរឲ្យកត់សម្គាល់។ ជាពិសេសការចរាចរណ៍រថយន្តធុនធំ នៅក្នុងភូមិសាស្ត្ររាជធានីភ្នំពេញ នៅតែកើតមាន។ ជាក់ស្ដែងកាលពីថ្ងៃទី២៦ កុម្ភៈ រដ្ឋបាលរដ្ឋធានីភ្នំពេញ ក៏បានបញ្ជាឲ្យសមត្ថកិច្ច ឃាត់អ្នកបើកបរ និងរថយន្តមួយគ្រឿង ដែលបានចរាចរណ៍ខុសបម្រាម ហើយបង្កឲ្យខូចខាតទ្រព្យសម្បត្តិសាធារណៈ នៅក្រោមស្ពានស្ទឹងមានជ័យ ។ អ្នកបើកបរ និងរថយន្ត ត្រូវបានសមត្ថកិច្ចបញ្ជូនទៅស្នងការនគរបាលជាតិរាជធានីភ្នំពេញ ដើម្បីដោះស្រាយតាមផ្លូវច្បាប់៕
Tag:
ឃួង ស្រេង
© រក្សាសិទ្ធិដោយ thmeythmey.com
