អន្តរជាតិ
លោក ឌូទើតេ ប្រាប់មន្ត្រីកុំទារគុណសម្បត្តិពីគម្រោងរដ្ឋាភិបាល ព្រោះកើតចេញពីលុយពន្ធរាស្ត្រទេ
× ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ និយាយថា គ្មានអ្នកនយោបាយណាម្នាក់អាចយកគុណសម្បត្តិពីគម្រោងនានាដែលបង្កើតឡើងក្នុងរដ្ឋបាលលោកបានឡើយ។ មេដឹកនាំរូបនេះ លើកឡើងថា គម្រោងទាំងនោះត្រូវសាងសង់ដោយប្រើប្រាស់លុយពន្ធរបស់ពលរដ្ឋ។
«យើងមិនទាមទារគុណសម្បត្តិស្អីនោះទេ…ហើយគ្មានអ្នកណាម្នាក់អាចយកគុណសម្បត្តិជំនួសមុខប្រជាជនបានឡើយ ព្រោះថាវាគឺជាលុយរបស់ពួកគេ។ ខ្ញុំប្រាប់នេះគឺគ្រាន់តែជាការរម្លឹកឲ្យដឹងប៉ុណ្ណោះ»។ លោក រ៉ូឌ្រីហ្គោ ឌូទើតេ និយាយបែបនេះ អំឡុងពិធីសម្ពោធបើកការដ្ឋានគម្រោងធ្វើផ្លូវមួយខ្សែក្នុងទីក្រុង Caloocan កាលពីសប្តាហ៍មុន។
ទន្ទឹមនឹងអរគុណដល់ដៃគូរបស់រដ្ឋាភិបាល និងក្រុមហ៊ុនម៉ៅការ លោក ឌូទើតេ បានសង្កត់ធ្ងន់ថា គម្រោងនេះគួរតែផ្តល់គុណសម្បត្តិដល់លុយពន្ធរបស់ពលរដ្ឋហ្វីលីពីន។ ត្រង់ចំណុចនេះ លោកគូសបញ្ជាក់ថា ៖«រាល់គម្រោងទាំងអស់ដែលយើងកំពុងធ្វើ យើងផ្តល់ការដឹងគុណដល់ក្រុមហ៊ុនសាងសង់, អ្នកម៉ៅការ, ដៃគូរបស់រដ្ឋាភិបាល និងជាពិសេសប្រជាជនហ្វីលីពីនតែម្តង»។
បើតាមការចុះផ្សាយរបស់សារព័ត៌មាន The Philippine Star មេដឹកនាំរូបនេះនិយាយបែបលេងសើចថា ផ្លូវកាន់តែងាយស្រួល មិនត្រឹមតែជួយកាត់បន្ថយពេលវេលាធ្វើដំណើរប៉ុណ្ណោះទេ ប៉ុន្តែវាក៏អាចបញ្ជូនអ្នកបើកបរទៅកាន់ «ឋានសួគ៍» ផងដែរ ប្រសិនបើពួកគេជិះមិនប្រុងប្រយ័ត្ននោះ៕
© រក្សាសិទ្ធិដោយ thmeythmey.com