ម្ចាស់ក្លិប Man City គ្រោងទិញក្លិបនៅឥណ្ឌា និងក្លិបនៅអាស៊ីផ្សេងទៀត

កីឡាអន្តរជាតិ

អន្តរជាតិ

ម្ចាស់ក្លិប Man City គ្រោងទិញក្លិបនៅឥណ្ឌា និងក្លិបនៅអាស៊ីផ្សេងទៀត

05, Mar 2019 , 7:19 pm

រូបភាព

ដោយ: ទេព ពិទូរ្យ

ម្ចាស់ក្លិប Manchester City លោក Mansour bin Zayed Al Nahyan កំពុងពិចារណាទិញក្លិបបាល់ទាត់មួយក្នុងប្រទេសឥណ្ឌា។ នេះបើយោងតាមប្រធានប្រតិបត្តិក្លិបលោក Ferran Soriano។

ក្រុមហ៊ុន City Football Group (CFG) បានបង្កើនការគ្រប់គ្រងក្លិបកីឡាបាល់ទាត់របស់ខ្លួនរហូតដល់ទៅ ៧ នាពេលបច្ចុប្បន្ន បន្ទាប់ពីទិញបានភាគហ៊ុនរបស់ Sichuan Jiuniu FC នៃលីគលំដាប់ទី៣ ចិន កាលពីខែកុម្ភៈកន្លងទៅ។

ក្រៅពីក្លិបធំ Manchester City នៃលីគកំពូលអង់គ្លេស CFG ក៏មានភាគហ៊ុននៅក្លិប New York City (អាមេរិក), Melbourne City (អូស្ត្រាលី), Yokohama F Marinos (ជប៉ុន), Atletico Torque (អ៊ុយរូហ្គាយ) និង Girona (អេស្ប៉ាញ)។

ម្ចាស់ក្លិប Man City លោក Sheikh Mansour (កណ្តាល)

បើទោះមានក្លិបជាច្រើនក្នុងដៃរួចហើយក្តី ប៉ុន្តែមហាសេដ្ឋីជនជាតិអេមីរ៉ាតអារ៉ាប់រួម Mansour bin នៅមិនទាន់បញ្ចប់មហិច្ឆតារបស់ខ្លួនឡើយ ដោយគ្រោងទិញក្លិបនៅឥណ្ឌាបន្ថែមទៀត។

បើតាមការបញ្ជាក់របស់ប្រធានប្រតិបត្តិក្លិបលោក Soriano រៀបរាប់ថា៖«យើងមានចំណាប់អារម្មណ៍ខ្លះនៅក្នុងទីផ្សារ និងប្រទេសមួយចំនួន ដែលមានចំណង់ចំណូលចិត្តខាងកីឡាបាល់ទាត់ពិតប្រាកដ ដូចជាចិន ប៉ុន្តែក៏មានឥណ្ឌាដែរ។ ក្រៅពីនោះឱកាសផ្សេងទៀតនៅអាស៊ីក៏មានដូចគ្នា។ យើងបានសម្លឹងមើលក្លិបនៅឥណ្ឌារយៈពេលជិត២ឆ្នាំមកហើយ ហើយឆ្នាំនេះយើងអាចនឹងវិនិយោគនៅទីនេះ»៕