លោក ហង់ ជួន ណារ៉ុន៖ វេទិកាយុវជនកម្ពុជា-ឡាវ-វៀតណាម អាចដោះស្រាយបញ្ហាព្រំដែននៃប្រទេសទាំងបី

ជាតិ

សង្គមជាតិ

លោក ហង់ ជួន ណារ៉ុន៖ វេទិកាយុវជនកម្ពុជា-ឡាវ-វៀតណាម អាចដោះស្រាយបញ្ហាព្រំដែននៃប្រទេសទាំងបី

05, Mar 2019 , 9:59 pm

រូបភាព

ដោយ:

ភ្នំពេញ៖ ក្នុងវេទិកាយុវជនតំបន់ត្រីកោណអភិវឌ្ឍកម្ពុជា ឡាវ និងវៀតណាម នៅថ្ងៃទី៥ ខែមីនា ដែលធ្វើឡើងនៅខេត្តក្រចេះ លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា តាមរយៈវេទិកានេះ ប្រទេសទាំងបី នឹងធ្វើកិច្ចការរួមគ្នាចំនួនបីចំណុចសំខាន់ៗ ដូចជា យុវជន និងបច្ចេកវិជ្ជា, យុវជន និងបំណិនសតវត្សទី២១ និងយុវជន និងសហគ្រិនភាព ដើម្បីឲ្យប្រទេសទាំងបី មានភាពរីកចម្រើន។

នៅចំពោះប្រតិភូតឡាវ និងវៀតណាម លោក ហង់ ជួន ណារ៉ុន សម្តែងការជឿជាក់យ៉ាងម៉ុតមាំថា វេទិកានេះ នឹងជួយឲ្យយុវជននៅប្រទេសទាំងបី អាចផ្លាស់ប្តូរបទពិសោធ និងដាក់ចេញនូវផែនការសកម្មភាពរួមគ្នា ក្នុងការបណ្តុះបណ្តាលយុវជនខាងផ្នែកបច្ចេកវិទ្យានៅតាមព្រំដែន ប្រកបដោយប្រសិទ្ធភាព និងជាឱកាសឲ្យយុវជនទទួលបានការងារធ្វើ។ លើសពីនេះទៅទៀត វា ក៏អាចពង្រឹង និងលើកកម្ពស់ការវិនិយោគទុននៅតាមបណ្តាខេត្តនៅជាប់ព្រំដែនរបស់ប្រទេសទាំងបីផងដែរ។

លោករដ្ឋមន្ត្រីរូបនេះ បញ្ជាក់ដូច្នេះថា៖«យើងនឹងខិតខំធ្ចើកិច្ចការរួមគ្នា ដើម្បីឲ្យប្រទេសទាំងបី ទទួលបាននូវការអប់រំមួយឲ្យមានកម្រិតខ្ពស់។ ដូច្នេះ យើង ក៏ត្រូវយកចិត្តទុកដាក់លើការអប់រំយុវជន ពីថ្នាក់មតេយ្យសិក្សា បឋមសិក្សា មធ្យមសិក្សា និងឧត្តមសិក្សា និងបណ្តុះបណ្តាលវិជ្ជាជីវៈ ដើម្បីប្រែតំបន់ត្រីកោណនេះ ឲ្យក្លាយជាតំបន់អភិវឌ្ឍ ឲ្យដូចនឹងតំបន់ផ្សេងទៀតផងដែរ»។

សំឡេងរបស់លោករដ្ឋមន្ត្រី៖

នៅដើមឆ្នាំ២០០០ ថ្នាក់ដឹកនាំនៃប្រទេសទាំងបី បានសម្រេចរៀបចំវេទិកាយុវជនតំបន់ត្រីកោណអភិវឌ្ឍកម្ពុជា ឡាវ និងវៀតណាម ក្នុងគោលដៅពង្រឹងខេត្តព្រំដែននៃបីប្រទេស ឲ្យមានវិសាលភាព។ ភាគីទាំងបី បានរៀបចំវេទិកានេះជាលើកទី៨ហើយ ដែលបង្ហាញពីលទ្ធផលល្អប្រសើរ ដូចជា ការពង្រឹងចំណេះដឹងផ្នែកវិទ្យាជីវៈ ការរកទីផ្សារសម្រាប់កសិករ បង្កើតសហគ្រាស និងប្រើប្រាស់ផ្នែកបច្ចេកវិទ្យា ដើម្បីទៅដោះស្រាយបញ្ហានៅតាមព្រំដែនផងដែរ៕