អន្តរជាតិ
ប្រមុខការពារជាតិហ្វីលីពីន៖ ហ្វីលីពីនអាចធ្វើសង្គ្រាមជាមួយចិនដោយសារសកម្មភាពអាមេរិក
× រដ្ឋមន្ត្រីការពារជាតិហ្វីលីពីន Delfin Lorenzana នៅថ្ងៃទី៥ ខែមីនា និយាយថា សកម្មភាពអាមេរិកនៅសមុទ្រចិនខាងត្បូង អាចអូសទាញហ្វីលីពីនឲ្យធ្លាក់ចូលក្នុងសង្គ្រាមជាមួយចិន។ លោក Lorenzana និយាយបែបនេះ ដោយយោងលើសន្ធិសញ្ញាទ្វេភាគីរវាងអាមេរិក និងហ្វីលីពីនដែលចែងពីការជួយគ្នាទៅវិញទៅមកក្នុងពេលមានវិបត្តិ។ រដ្ឋមន្ត្រីការពារជាតិហ្វីលីពីនចង់ឲ្យមានការបកស្រាយឲ្យច្បាស់ពីចំណុចដើម្បីកុំឲ្យមានការយល់ច្រឡំពេលក្រោយ។
នៅសមុទ្រចិនខាងត្បូងដែលកំពុងប្រទាញប្រទង់គ្នារវាងចិន និងប្រទេសបួនទៀត យោធាអាមេរិកបានធ្វើសកម្មភាពនាវាចរណ៍របស់ខ្លួនដោយមិនក្រែងចិត្តចិនឡើយ។ លោក Delfin Lorenzana រដ្ឋមន្ត្រីការពារជាតិហ្វីលីពីន ដែលជាភាគីជម្លោះមួយដែរនោះ ព្រមានថា ការប៉ះទង្គិចដោយអាវុធអាចនឹងកើតឡើងដោយចៀសមិនផុត បើអាមេរិកនៅតែធ្វើសកម្មភាពយោធាក្រោមហេតុផលសេរីភាពនាវាចរណ៍ក្រោមច្បាប់អន្តរជាតិទៀតនោះ។
អ្វីដែលប្រមុខការពារជាតិរូបនេះហ្វីលីពីនបារម្ភខ្លាំងនោះ គឺហ្វីលីពីនអាចធ្វើសង្គ្រាមជាមួយចិនដោយសារតែទង្វើរបស់អាមេរិកនៅសមុទ្រចិនខាងត្បូងតែម្ដង។ លោក Lorenzana លើកឡើងថា បើអាមេរិកប៉ះទង្គិចជាមួយចិននៅសមុទ្រចិនខាងត្បូង ហ្វីលីពីននឹងត្រូវជាប់ពាក់ព័ន្ធដោយស្វ័យប្រវត្តិ ព្រោះបើតាមសន្ធិសញ្ញាការពារទៅវិញទៅមក ហ្វីលីពីនមិនអាចឈរឱបដៃបានឡើយ ទោះវាជាសង្គ្រាមដែលហ្វីលីពីនមិនចង់បានក៏ដោយ។
សន្ធិសញ្ញាការពារវិញទៅមក ជាកិច្ចព្រមព្រៀងទ្វេភាគីរវាងអាមេរិក និងហ្វីលីពីនដែលជាសម្ព័ន្ធមិត្តចាស់ជាងគេមួយនៅអាស៊ី។ ក្រោមសន្ធិសញ្ញានេះ អាមេរិក និងហ្វីលីពីនត្រូវជួយគ្នាទៅវិញទៅមក បើមានការវាយប្រហារពីកម្លាំងខាងក្រៅលើប្រទេសណាមួយ។ នៅអតីតកាល ហ្វីលីពីនធ្លាប់សួរអាមេរិកពីវិសាលភាពនៃសន្ធិសញ្ញានេះថា គ្របដណ្ដប់លើសមុទ្រចិនខាងត្បូងឬយ៉ាងណា បើយោធាហ្វីលីពីនរងការវាយប្រហារនៅតំបន់នោះ។
ជុំវិញនេះ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ ធានាច្បាស់ៗរួចហើយ គឺអាមេរិកនឹងជួយ បើហ្វីលីពីនជួបបញ្ហានៅសមុទ្រចិនខាងត្បូង។ អំឡុងពេលទស្សនកិច្ចនៅរដ្ឋធានីម៉ានីលកាលពីសប្ដាហ៍មុន ប្រមុខការទូតអាមេរិកក៏ប្រកាសពីការប្ដេជ្ញាចិត្តរបស់អាមេរិកក្នុងការធ្វើឲ្យសមុទ្រចិនខាងត្បូងបើកចំហសម្រាប់រាល់សកម្មភាពនាវាចរណ៍ទាំងអស់ ពិសេសធានាថា អាមេរិកមិនបង្កការគំរាមដល់ថ្នាក់មានការបិទចរាចរណ៍ឡើយ។
អាមេរិក មិនមែនភាគីជម្លោះក្នុងសំណុំរឿងសមុទ្រចិនខាងត្បូងឡើយ តែមហាអំណាចមួយនេះធ្វើសកម្មភាពយ៉ាងសកម្មក្នុងដែនទឹកដែលចិនទាមទារជាមួយហ្វីលីពីន ម៉ាឡេស៊ី ឥណ្ឌូណេស៊ី តៃវ៉ាន់ និងព្រុយណេជាដើម។ ជារឿយៗ អាមេរិកបញ្ជូននាវារបស់ខ្លួនទៅកៀកកោះដែលចិនគ្រប់គ្រងក្រោមហេតុផលសេរីភាពនាវាចរណ៍ ហើយវាក៏ដុតកម្ដៅជម្លោះកាន់តែខ្លាំង ព្រោះចិនមិនសប្បាយចិត្តបន្តិចសោះឡើយ៕
Tag:
ហ្វីលីពីន
អាមេរិក
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com