អន្តរជាតិ
នាយករដ្ឋមន្ត្រីចិន៖ យុទ្ធនាការ«ចិនូបនីយកម្មសាសនា» បន្តអនុវត្តដោយមិនបន្ធូរដៃ រូបភាព AFP
× នាយករដ្ឋមន្ត្រីចិន លី ខឹឈាំង នៅថ្ងៃទី៥ ខែមីនា បានប្រកាសជំរុញយុទ្ធនាការចិនូបនីយកម្មសាសនា ដើម្បីធ្វើយ៉ាងឲ្យសាសនាទាំងអស់នៅចិនមានលក្ខណៈចិន និងស្របតាមគោលការណ៍បក្សកុម្មុយនីស្តចិនកំពុងដឹកនាំប្រទេស។ ការប្រកាសរបស់លោកនាយករដ្ឋមន្ត្រីចិនដូចនេះ ប្រៀបដូចជាការធ្វើគធ្វើថ្លង់នឹងការអំពាវនាវរបស់សហគមន៍អន្តរជាតិឲ្យមហាអំណាចមួយនេះបន្ធូរដៃក្នុងការបង្ក្រាបលើសាសនាឥស្លាម និងគ្រិស្តសាសនា។
ចិនូបនីយកម្មសាសនា ជាយុទ្ធនាការមួយដាក់ចេញដោយប្រធានាធិបតីចិន ស៊ី ជិនភីង កាលពីឆ្នាំ២០១៥ ។ បក្សកុម្មុយនីស្តចិនដែលប្រកាសខ្លួនជាបក្សមិនគោរពតាមសាសនាណាមួយនោះ ចង់ឲ្យគ្រប់សាសនាទាំងអស់នៅចិនប្រកាន់ឲ្យខ្ជាប់ខ្ជួនតាមគោលការណ៍របស់ខ្លួន និងធានាថា រាល់សាសនាទាំងអស់សុទ្ធតែមានលក្ខណៈចិន។ នាយករដ្ឋមន្ត្រីចិន លី ខឹឈាំង ប្រកាសថា យុទ្ធនាការនេះ នឹងត្រូវអនុវត្តដោយមិនដាក់ដៃឡើយ។
ក្នុងកិច្ចប្រជុំសភាប្រជាជនចិននៅថ្ងៃទី៥ ខែមីនា លោក លី ប្រាប់សមាជិកសភាថា គោលនយោបាយក្របខណ្ឌរបស់បក្សស្ដីពីកិច្ចការសាសនា នឹងត្រូវអនុវត្តឲ្យពេញលេញ ហើយការធ្វើចិនូបនីយកម្មសាសនា ក៏ត្រូវដើរតាមឲ្យដាច់ខាតដែរ។ នេះបើតាមការផ្សាយរបស់កាសែតហុងកុង South China Morning Post ។
យុទ្ធនាការនេះ ធ្វើឡើងស្របពេលដែលក្រុងប៉េកាំងប្រើធម៌ក្ដៅក្នុងការគ្រប់គ្រងការអនុវត្តសាសនានៅទូទាំងប្រទេស។ សាសនាឥស្លាម គ្រិស្តសាសនានិកាយកាតូលិក និងប្រូតេស្តង់ សុទ្ធតែជាគោលដៅរបស់បក្សកុម្មុយនីស្តចិន ព្រោះបក្សកាន់អំណាចនេះបារម្ភថា សាសនាទាំងនេះអាចជាឈ្នាន់ឲ្យក្រុមលោកខាងលិចបង្កបញ្ហានៅចិនដូចជាការងើបតវ៉ា ឬការបំបែកទឹកដីជាដើម។ តំបន់ស្វយ័តស៊ីនជាំង គឺជាទីតាំងសំខាន់ដែលចិនផ្ដោតការអនុវត្តចិនូបនីយកម្មសាសនារបស់ខ្លួន។
បើតាមរបាយការណ៍នានា ជនភាគតិចកាហ្សាក់ និងវីហ្គ័រជាងមួយលាននាក់ត្រូវបានចាប់ឃុំខ្លួនក្នុងមន្ទីរឃុំឃាំងរបស់រដ្ឋាភិបាលចិន។ ពួកគេទាំងនោះ ត្រូវបានរាយការណ៍ថា ត្រូវបង្ខំឲ្យបោះបង់សាសនារបស់ខ្លួន ហើយប្រកាសស្មោះត្រង់នឹងបក្សកុម្មុយនីស្តចិនវិញ។ ពីដំបូង ក្រុងប៉េកាំងបដិសេធថា មិនមានមន្ទីរឃុំខ្លួនអ្វីឡើយ មានតែកន្លែងអប់រំប៉ុណ្ណោះ។ ក្រោយមក ក្រុងប៉េកាំងអះអាងថា កន្លែងឃុំខ្លួនទាំងនោះ ជាវិធីសាស្ត្រសម្អាតគំនិតជ្រុលនិយម និងដើម្បីរក្សាស្ថិរភាពនៅស៊ីនជាំង។
កាលពីឆ្នាំមុន ក្បាលម៉ាស៊ីនដឹកនាំសាសនានានានៅចិនមានប្រូតេស្តង់ កាតូលិក និងឥស្លាមដែលត្រូវបានជ្រើសរើសដោយរដ្ឋាភិបាលនោះ បានដាក់ចេញផែនការប្រាំឆ្នាំរបស់ខ្លួនស្របតាមយុទ្ធនាការចិនូបនីយកម្មសាសនា។ សម្រាប់សាសនាគ្រិស្ត គម្ពីរ Bible ត្រូវបកប្រែជាភាសាចិនឡើងវិញ ហើយការរៀបរាប់ផ្សេងពីសាសនានេះ ក៏ត្រូវសរសេរឡើងវិញដែរ។ លើសពីនោះ អាគារសាសនា សម្លៀកបំពាក់ និងការសូត្រធម៌ជាដើម ក៏ត្រូវបញ្ចូលបែបផែនចិនទាំងអស់៕
© រក្សាសិទ្ធិដោយ thmeythmey.com