មេទ័ពអាមេរិកនៅអឺរ៉ុប សុំនាវាពិឃាតពីរគ្រឿងនិងកងទ័ពបន្ថែមដើម្បីទប់ទល់រុស្ស៊ី

អន្តរជាតិ

មេទ័ពអាមេរិកនៅអឺរ៉ុប សុំនាវាពិឃាតពីរគ្រឿងនិងកងទ័ពបន្ថែមដើម្បីទប់ទល់រុស្ស៊ី

06, Mar 2019 , 7:39 pm

រូបភាព

ឧត្តមសេនីយ Curtis Scaparrotti មេបញ្ជាការទីបញ្ជាការកងទ័ពអាមេរិកប្រចាំអឺរ៉ុប។ (រូបភាព AFP)

ដោយ: តន ចាន់រិទ្ធារ៉ា

មេបញ្ជាការកងទ័ពអាមេរិកប្រចាំទ្វីបអឺរ៉ុប ឧត្តមសេនីយ៍ Curtis Scaparrotti បានព្រមានពីការកើនឡើងការគំរាមកំហែងរបស់រុស្ស៊ីនៅក្នុងតំបន់មួយនេះ។ ក្នុងកិច្ចប្រជុំគណៈកម្មាធិការកិច្ចការយោធានៃព្រឹទ្ធសភាអាមេរិកនៅថ្ងៃទី៥ ខែមីនា លោក Scaparrotti លើកឡើងថា លោកមិនទាន់មានអារម្មណ៍សុខស្រួលឡើយចំពោះអ្វីដែលយោធាអាមេរិកនៅអឺរ៉ុបមានក្នុងដៃសព្វថ្ងៃ ខណៈរុស្ស៊ីប្រឹងពង្រឹងសមត្ថភាពរបស់ខ្លួនឥតឈប់ឈរនោះ។ សម្ភារ និងកងទ័ពបន្ថែម ជារឿងចាំបាច់ដើម្បីទ្រទ្រង់ស្ថានការណ៍។

ចំពោះមុខគណៈកម្មាធិការកិច្ចការយោធានៃព្រឹទ្ធសភាអាមេរិក ឧត្តមសេនីយ៍ Curtis Scaparrotti មេបញ្ជាការទីបញ្ជាការកងទ័ពអាមេរិកប្រចាំអឺរ៉ុប និយាយត្រង់ៗថា កងទ័ពអាមេរិកនៅអឺរ៉ុប ជួបបញ្ហាខ្វះខាតច្រើនទាំងកម្លាំងជើងគោក ជើងទឹក ក៏ដូចជាយុទ្ធោបករណ៍សម្រាប់ការធ្វើចារកម្ម និងការស៊ើបការណ៍ជាដើម។ បញ្ហាទាំងនេះ អាចធ្វើឲ្យអាមេរិកចាញ់ប្រៀបរុស្ស៊ី ដែលកំពុងបង្កើនសមត្ថភាពយោធារបស់ខ្លួនជាលំដាប់។

ទូរទស្សន៍ CNN ផ្សាយថា លោក Scaparrotti ដែលជាមេបញ្ជាការកងទ័ពសម្ព័ន្ធយោធាណាតូដែរនោះ មិនមានអារម្មណ៍កក់ក្ដៅឡើយជាមួយនឹងអានុភាពរបស់យោធាអាមេរិកនៅអឺរ៉ុប និងសមត្ថភាពក្នុងការទប់ទល់រុស្ស៊ីនោះ។ លោកឆ្លើយបែបនេះ ទៅនឹងសំណួររបស់សមាជិកព្រឹទ្ធសភា James Inhofe ដែលជាប្រធានគណៈកម្មាធិការកិច្ចការយោធាជុំវិញសមត្ថភាពរបស់កងទ័ពអាមេរិកដែលប្រឈមមុខផ្ទាល់ជាមួយរុស្ស៊ី។

ដើម្បីបំពេញចន្លោះប្រហោងដែលបង្ហាញសាច់ដុំរបស់ខ្លួននោះ ប្រមុខកងទ័ពអាមេរិករូបនេះ ស្នើឲ្យបង្កើនចំនួនកងទ័ពអាមេរិកនៅអឺរ៉ុបទាំងកម្លាំងចល័ត និងកម្លាំងដែលត្រូវបំពេញមុខងារតាមបទបញ្ជាជាដើម។ ដោយអះអាងពីសមត្ថភាពទ័ពជើងទឹករុស្ស៊ី ឧត្តមសេនីយ៍ផ្កាយបួនដដែលនេះ ក៏ស្នើចំៗថា លោកត្រូវការនាវាពិឃាតចំនួនពីរគ្រឿងបន្ថែមពីនាវាពិឃាតដែលមានស្រាប់ចំនួនបួនកំពុងតាំងនៅអេស្ប៉ាញជាស្រេច។

ការស្នើរបស់មេទ័ពអាមេរិកនៅអឺរ៉ុប ធ្វើឡើងតែប៉ុន្មានថ្ងៃក្រោយប្រមុខកងទ័ពអាមេរិក និងរុស្ស៊ីជួបគ្នាទៅក្រុងវីយែន ប្រទេសអូទ្រីស។ នាយសេនាធិការចម្រុះកងទ័ពអាមេរិក Joseph Dunford និងសមភាគីរុស្ស៊ី Valery Gerasimov បានជួបជជែកគ្នាពីប្រធានបទសន្តិសុខអឺរ៉ុប និងបញ្ហានៅស៊ីរី។ ជំនួបនេះ ទំនងជាការប្រឹងប្រែងសម្រាលស្ថានការណ៍តានតឹងរវាងមហាអំណាចទាំងពីរក្រោយអាមេរិកដើរចេញពីសន្ធិសញ្ញាហាមឃាត់មីស៊ីលនុយក្លេអ៊ែរចម្ងាយធម្យមនៅអឺរ៉ុប។

រុស្ស៊ី ក៏បានដើរចេញពីសន្ធិសញ្ញានេះរួចហើយដែរ បន្ទាប់ប្រឹងឃាត់អាមេរិក តែមិនបានផល។ មហាអំណាចយោធាទាំងពីរ ក៏ចាប់ផ្ដើមសម្ញែងធ្មុងរៀងៗខ្លួនពិសេសការអភិវឌ្ឍមីស៊ីលល្បឿនលឿនតែម្ដង។ ក្រុងមូស្គូបានព្រមានអាមេរិករួចហើយ បើអាមេរិកហ៊ានពង្រាយមីស៊ីលបំពាក់នុយក្លេអ៊ែរនៅអឺរ៉ុប រុស្ស៊ីក៏មិននៅស្ងៀមដែរ គឺនឹងពង្រាយមីស៊ីលដ៏មានឥទ្ធិពលរបស់ខ្លួនក្បែរផ្ទះអាមេរិកតែម្ដង៕