ខ្សែបម្រើ Dusan Tadic ថា Zinedine Zidane បានជួយជំរុញខ្លួន ក្នុងការបង្ហាញទម្រង់លេងដ៏អស្ចារ្យ នាការប្រកួតដែល Ajax ទម្លាក់ម្ចាស់ការពារតំណែងជើងឯក Real Madrid នៅវគ្គ១៦ក្រុម នៃជំនួបជើងទី២ ដើម្បីឈានទៅកាន់វគ្គ១/៤ផ្តាច់ព្រ័ត្រពានរង្វាន់ UEFA Champions League នៅរាត្រីថ្ងៃទី៥ ខែមីនា។
ខ្សែបម្រើសញ្ជាតិស៊ែប៊ី វ័យ៣០ឆ្នាំរូបនេះ ជាអ្នកបញ្ជូនបាល់យ៉ាងល្អ (Assists) ទៅឲ្យមិត្តរួមក្រុម Hakim Ziyech និង David Neres សម្រេចទីម្នាក់១គ្រាប់ និងថែមទាំងស៊ុតខ្លួនឯងមួយគ្រាប់ទៀតក្នុងជ័យជម្នះ ៤-១ លើម្ចាស់ផ្ទះ Real នៅទឹកដី Bernabeu។