អាមេរិក ពិចារណាពីលទ្ធភាពដាក់ទណ្ឌកម្មលើប្រទេសដែលបន្តទទួលស្គាល់របប ម៉ាឌុយរ៉ូ

អន្តរជាតិ

អាមេរិក ពិចារណាពីលទ្ធភាពដាក់ទណ្ឌកម្មលើប្រទេសដែលបន្តទទួលស្គាល់របប ម៉ាឌុយរ៉ូ

06, Mar 2019 , 9:59 pm

រូបភាព

លោក ហ័ន ក្វៃដូ និយាយទៅកាន់អ្នកសារព័ត៌មានក្នុងសន្និសីទមួយថ្ងៃទី ៥ ខែមីនា (AFP)

ដោយ: តន ចាន់រិទ្ធារ៉ា

វិបត្តិនយោបាយនៅវ៉េណេស៊ុយអេឡា មិនមែនតែធ្វើឲ្យប្រទេសនេះបែកបាក់ជាពីរឡើយ សូម្បីតែអន្តរជាតិក៏ត្រូវហែកជាពីររវាងក្រុមម្ខាងប្រធានាធិបតី នីកូឡាស់ ម៉ាឌុយរ៉ូ និងក្រុមម្ខាងទៀតទទួលស្គាល់មេដឹកនាំប្រឆាំង ហ័ន ក្វៃដូ ។ ជារឿយៗ អាមេរិកដែលដឹកនាំប្រទេសជាង៥០ នៅខាងលោក ក្វៃដូ បានស្នើឲ្យប្រទេសផ្សេងគាំទ្រមេដឹកនាំប្រឆាំងរូបនេះ។ ប្រេសិតពិសេសអាមេរិកសម្រាប់កិច្ចការវ៉េណេស៊ុយអេឡា ថែមទាំងព្រមានពីលទ្ធភាពដាក់ទណ្ឌកម្មលើប្រទេសដែលមិនដើរតាមខ្លួនទៅទៀត។

ស្ថានការណ៍នៅរដ្ឋអាមេរិកខាងត្បូងវ៉េណេស៊ុយអេឡា នៅតែមិនទាន់ថមថយកម្ដៅដដែល។ ក្រុមប្រឆាំងដឹកនាំលោក ហ័ន ក្វៃដូ ដែលតាំងខ្លួនជាប្រធានាធិបតីបណ្ដោះអាសន្ន កំពុងដាក់សម្ពាធកាន់តែខ្លាំងលើរបបលោក នីកូឡាស់ ម៉ាឌុយរ៉ូ ។ នៅក្រៅប្រទេសវិញ អាមេរិកដែលទទួលស្គាល់លោក ក្វៃដូ ជាមេដឹកនាំស្របច្បាប់របស់វ៉េណេស៊ុយអេឡា ក៏ប្រឹងអំពាវនាវឲ្យអន្តរជាតិដើរតាមខ្លួនក្នុងការទទួលស្គាល់ក្រុមប្រឆាំងដែរ។

សព្វថ្ងៃ ប្រទេសចំនួន៥៤ បានទទួលស្គាល់លោក ក្វៃដូ ជាមេដឹកនាំពេញច្បាប់របស់វ៉េណេស៊ុយអេឡា ប៉ុន្តែប្រទេសច្រើនទៀតនៅតែបន្តទំនាក់ទំនងជាមួយរដ្ឋាភិបាលលោក ម៉ាឌុយរ៉ូ ដដែល។ ចិន រុស្ស៊ី តួកគី អ៊ីរ៉ង់ និងគុយបា សុទ្ធតែមិនដោះដៃពីមេដឹកនាំសង្គមនិយមមួយនេះ ស្របពេលប្រទេសខ្លះទៀតចង់ឃើញភាគីជម្លោះជួបចរចាគ្នាដោះស្រាយបញ្ហា និងស្នើឲ្យមានការបោះឆ្នោតទូទៅឡើងវិញដើម្បីជ្រើសរើសមេដឹកនាំថ្មី។

ខណៈមានប្រទេសជាច្រើននៅមានចំណងទាក់ទងជាមួយលោក ម៉ាឌុយរ៉ូ តំណាងអាមេរិកសម្រាប់កិច្ចការវ៉េណេស៊ុយអេឡា Elliot Abrams ក៏លើកឡើងពីគំនិតដាក់ទណ្ឌកម្មលើប្រទេសផ្សេងដែលមិនព្រមទទួលស្គាល់លោក ក្វៃដូ ។ ក្នុងសន្និសីទសារព័ត៌មានថ្ងៃទី៥ ខែមីនា មន្ត្រីការទូតដែលមាននិន្នាការប្រើធម៌ក្ដៅដោះស្រាយបញ្ហានោះព្រមានថា៖ «ទណ្ឌកម្មលើប្រទេសផ្សេង ជាលទ្ធភាពដ៏ច្បាស់លាស់ ហើយទណ្ឌកម្មអាចកើតឡើង អាស្រ័យតាមសកម្មភាពរបស់របបលោក ម៉ាឌុយរ៉ូ»។

ការអធិប្បាយរបស់លោក Abrams មានន័យថា រដ្ឋបាលលោក ត្រាំ កំពុងបង្ខំឲ្យប្រទេសនានាជ្រើសរើសផ្លូវមួយក្នុងចំណោមពីរ គឺត្រូវគាំទ្រអាមេរិកដែលកំពុងប្រឹងប្រែងបណ្ដេញលោក ម៉ាឌុយរ៉ូ ពីតំណែងប្រធានាធិបតីវ៉េណេស៊ុយអេឡា ឬត្រូវបន្តទទួលស្គាល់រដ្ឋាភិបាលកាន់អំណាចនៅវ៉េណេស៊ុយអេឡា ដែលអាមេរិកចង់អូសទម្លាក់ពីអំណាចវិញ។

យ៉ាងណាមិញ វាជារឿងលំបាកសម្រាប់អាមេរិកក្នុងការដាក់ទណ្ឌកម្មលើប្រទេសផ្សេង ដោយគ្រាន់តែមិនដើរតាមខ្លួនក្នុងវិបត្តិនយោបាយនៅវ៉េណេស៊ុយអេឡា។ សម្រាប់ស្ថានភាពបច្ចុប្បន្ន ក្រុងវ៉ាស៊ីនតោនមានតែដាក់សម្ពាធកាន់តែថែមទៀតលើរបបលោក ម៉ាឌុយរ៉ូ ដែលនៅតែចចេសមិនព្រមចុះចេញតាមសម្រួល។ ជាមួយវត្តមានលោក ក្វៃដូ ក្រុមប្រឆាំងនៅតែមានលទ្ធភាពតទល់ជាមួយរដ្ឋាភិបាលកាន់អំណាចដើម្បីផ្លាស់ប្ដូររបបដឹកនាំ៕