អន្តរជាតិ
កូរ៉េខាងជើង ចាប់ផ្តើមសកម្មភាពទាក់ទងមីស៊ីលឡើងវិញ ក្រោយជំនួបនៅវៀតណាមបរាជ័យ ទាហានកូរ៉េខាងជើងឈរនៅឯស្ថានីយ៍បាញ់ផ្ការណប Sohae នៅ Dongchang-ri ។ (រូបភាព AFP)
× កូរ៉េខាងជើង ទំនងជាកំពុងធ្វើសកម្មភាពរបស់ខ្លួនទាក់ទងមីស៊ីលឡើងវិញ បន្ទាប់ជំនួបនៅវៀតណាមបរាជ័យ។ កាលពីថ្ងៃទី៥ ខែមីនា មន្ត្រីចារកម្មកូរ៉េខាងត្បូងប្រាប់សមាជិកសភាថា កូរ៉េខាងជើងបានសកម្មភាពថ្មីៗនៅឯរោងចក្រផលិតមីស៊ីលអន្តរទ្វីប ហើយបន្តប្រតិបត្តិការរោងចក្រចម្រាញ់សារធាតុអ៊ុយរ៉ានីញ៉ូមទៀតផង។ លើសពីនោះ ក្រុងព្យុងយ៉ាងក៏សាងសង់ឡើងវិញផ្នែកខ្លះនៅឯស្ថានីយ៍បាញ់ផ្កាយរណបទៅទៀត។ ប៉ុន្តែលោក ដូណាល់ ត្រាំ មិនទាន់ជឿជាក់លើព័ត៌មានទាំងនេះឡើយ។
ក្រោយជំនួបរវាងប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន នៅវៀតណាម គ្មានបានផល គេឃើញមានរបាយការណ៍ជាច្រើនលេចឡើងទាក់ទងសកម្មភាពរបស់កូរ៉េខាងជើងជុំវិញកម្មវិធីមីស៊ីលរបស់ខ្លួន។ ព័ត៌មានដំបូងផ្ដើមចេញពីការបញ្ចេញរូបថតតាមអវកាសរបស់មជ្ឈមណ្ឌលសម្រាប់ការសិក្សាយុទ្ធសាស្ត្រអន្តរជាតិ (CSIS) និងរបាយការណ៍របស់អង្គភាពចារកម្មកូរ៉េខាងត្បូងនៅថ្ងៃទី៥ ខែមីនាពីសកម្មភាពរបស់កូរ៉េខាងជើងនៅឯទីតាំង Dongchang-ri ។
បើតាមរូបថត គេឃើញមានសកម្មភាពសាងសង់ផ្នែកខ្លះឡើងវិញនៅស្ថានីយ៍បាញ់ផ្កាយរណប Sohae ហើយសមកម្មភាពខ្លះកើតឡើងមុនជំនួបនៅវៀតណាមទៅទៀត។ ប៉ុន្តែគេមិនទាន់អាចតម្លៃបានថា សកម្មភាពទាំងនោះទាក់ទងនឹងការត្រៀមបាញ់មីស៊ីលឡើយ។ នៅអាមេរិកឯណោះ លោក ដូណាល់ ត្រាំ មិនទាន់ប្រតិកម្មខ្លាំងនឹងព័ត៌មាននេះឡើយ ហើយរង់ចាំមើលសិន។ លោកឆ្លៀតព្រមានថា លោកនឹងខកចិត្ត បើកូរ៉េខាងជើងក្បត់សម្ដី។
ទីតាំង Dongchang-ri នេះហើយដែលលោក គីម ជុងអ៊ុន សន្យាបោះបង់ចោល។ កូរ៉េខាងជើងបានធ្វើសកម្មភាពបំផ្លាញផ្នែកជាច្រើននៃស្ថានីយ៍ Sohae កាលពីឆ្នាំ២០១៨ ឲ្យស្របនឹងការប្ដេជ្ញាចិត្តរបស់លោក គីម ដែលចង់រំសាយនុយក្លេអ៊ែរ។
បន្ទាប់មកនៅថ្ងៃទី៧ ខែមីនា ទីភ្នាក់ងារព័ត៌មាន Yonhap បានស្រង់សម្ដីប្រធានអង្គភាពចារកម្មកូរ៉េខាងត្បូង Suh Hoon ថា កូរ៉េខាងជើងក៏មានសកម្មភាពនៅឯរោងចក្រ Sanumdong ផងដែរ។ បើតាមទីភ្នាក់ងារព័ត៌មានកូរ៉េខាងត្បូង គេឃើញមានការចល័តរថយន្តដឹកជញ្ជូននៅរោងចក្រ Sanumdong ក្នុងរដ្ឋធានីព្យុងយ៉ាង ជាទីតាំងដែលកូរ៉េខាងជើងផលិតមីស៊ីលអន្តរទ្វីប Hwasong-15 ចំនួនពីដើម។
មីស៊ីលបាលីស្ទិកប្រភេទនេះ អាចហោះដល់គោលដៅចម្ងាយ១៣ពាន់គីឡូម៉ែត្រ គឺរត់ដល់ទឹកដីអាមេរិកតែម្ដង។ ក្នុងកិច្ចប្រជុំជាមួយសមាជិកសភា លោក Suh Hoon ចាត់ទុកសកម្មភាពថ្មីៗនេះ ជាសកម្មភាពដែលទាក់ទងនឹងមីស៊ីល។
ជាងនេះទៅទៀត កូរ៉េខាងជើងក៏ត្រូវរាយការណ៍ថា ដំណើរការកន្លែងចម្រាញ់អ៊ុយរ៉ានីញ៉ូមនៅរោងចក្រនុយក្លេអ៊ែរ Yongbyon ផង។ លោក Suh និយាយថា ដំណើរការនៅកន្លែងចម្រាញ់នោះ មានតាំងមុនជំនួបនៅវៀតណាមក៏ថាបាន។ រោងចក្រ Yongbyon ហើយនេះ ជាចំណុចខ្ទាស់មួយរវាងអាមេរិក និងកូរ៉េខាងជើងក្នុងការចរចានៅក្រុងហាណូយ។ កូរ៉េខាងជើងស្នើបោះបង់ផ្នែកខ្លះនៃទីតាំងនេះជាថ្នូរការលើកលែងទណ្ឌកម្ម តែអាមេរិកចង់បានការកម្ទេចនៅទីតាំងសម្ងាត់ផ្សេងទៀត។
Tag:
កូរ៉េខាងជើង
អាមេរិក
នុយក្លេអ៊ែរ
© រក្សាសិទ្ធិដោយ thmeythmey.com