ជាតិ
សង្គមជាតិ
បេឡាជាតិចំណាយជាង៦,៥លានដុល្លារលើការឧបត្ថម្ភកម្មការិនីសម្រាលកូនក្នុងឆ្នាំ២០១៨
× បេឡាជាតិរបបសន្តិសុខសង្គម (ប.ស.ស) បានចំណាយប្រាក់ឧបត្ថម្ភ ២៦ ២១៣ ៦០០ ០០០ រៀល (ជាង៦,៥លានដុល្លារអាមេរិក) លើការឧបត្ថម្ភកម្មការិនីសម្រាលកូនរយៈពេល១ឆ្នាំដោយគិតចាប់ពីខែមករា ដល់ខែធ្នូ ឆ្នាំ២០១៨។
ទិន្នន័យរបស់ ប.ស.ស បានបង្ហាញថា ឆ្នាំ២០១៨កន្លងមក កម្មការិនីចំនួន ៦៥ ០៥៤នាក់ បានសម្រាលកូនសរុបចំនួន ៦៥ ៥៣៤នាក់។ ក្នុងចំណោមនោះ ស្ត្រីដែលកើតកូនភ្លោះពីរ មានចំនួន៤៧០នាក់ និងស្ត្រីកូនភ្លោះបី មាន៥នាក់។
តាមគោលការណ៍ កម្មការិនីសម្រាលកូនមួយ ទទួលបានថវិកា ៤០ម៉ឺនរៀល កូនភ្លោះពីរ បាន៨០ម៉ឺនរៀល និងកូនភ្លោះបី បាន១២០ម៉ឺនរៀល និង៥លានរៀលបន្ថែមទៀតពីសម្តេចនាយករដ្ឋមន្ត្រី ហ៊ុន សែន។
កម្មការិនីដែលមានផ្ទៃពោះចាប់ពី២៦សប្តាហ៍ឡើងទៅ អាចទៅបំពេញទម្រង់ «លិខិតស្នើសុំប្រាក់ឧបត្ថម្ភសម្រាប់កម្មករនិយោជិតជាស្ត្រីពេលសម្រាលកូន» នៅអគារបេឡាជាតិរបបសន្តិសុខសង្គមបរិវេណក្រសួងការងារ និងបណ្តុះបណ្តាលវិជ្ជាជីវៈ តាមស្នាក់ការ ប.ស.ស ខណ្ឌ/ខេត្ត ឬអាចទាក់ទងភ្នាក់ងារ ប.ស.ស ដែលប្រចាំការនៅតាមមន្ទីរពេទ្យ ឬមណ្ឌលសុខភាព ដើម្បីទទួលបានប្រាក់ឧបត្ថម្ភបន្ថែមរបស់រាជរដ្ឋាភិបាល ចំនួន ៤០ម៉ឺនរៀល (៤០០ ០០០រៀល)។
ក្រៅពីនេះ កម្មការិនីទាំងនោះ ទទួលបានលក្ខខណ្ឌអនុគ្រោះ និងការឧបត្ថម្ភបន្ថែមផ្សេងៗទៀតពីក្រុមហ៊ុន រោងចក្រ សហគ្រាស ព្រមទាំងរដ្ឋាភិបាលផងដែរ៕
Tag:
បេឡាជាតិ
កម្មការិនី
© រក្សាសិទ្ធិដោយ thmeythmey.com