កីឡាអន្តរជាតិ
អន្តរជាតិ
Ranieri ទំនងឡើងជាគ្រូ Roma ជំនួសលោក Di Francesco ដែលទើបបញ្ចប់តំណែង
× Roma បានបញ្ចប់លោក Eusebio di Francesco ពីតំណែងគ្រូបង្វឹក ក្រោយដឹកនាំក្រុមធ្លាក់ចេញពីក្របខណ្ឌ Champions League វគ្គ១៦ក្រុមចុងក្រោយ និងបង្ហាញខ្លួនមិនបានល្អសម្រាប់ការប្រកួតលីគក្នុងស្រុករដូវកាលនេះ។ អតីតគ្រូ Leicester City និង Fulham លោក Claudio Ranieri មានភាគរយខ្ពស់ជាងគេដើម្បីជំនួសតំណែងនេះ។
ក្រុមពីអ៊ីតាលីបានចាញ់ក្រុម FC Porto ក្នុងលទ្ធផលទាំងពីរជើង ៤-៣ ខណៈដែលជើងទីមួយពួកគេឈ្នះ ២-១។ សម្រាប់ការបង្ហាញខ្លួនក្នុងលីគ Serie A រដូវកាលនេះ Roma ស្ថិតនៅចំណាត់ថ្នាក់ទី៥ មាន៤៤ពិន្ទុក្នុងចំណោម២៦ប្រកួត និងថែមទាំងចាញ់ Lazio ដល់ទៅ ៣-០ កាលពីសប្តាហ៍មុន។
លោក Di Francesco មានសញ្ជាតិអ៊ីតាលី វ័យ៤៩ឆ្នាំបានចូលកាន់តំណែងនេះកាលពីខែមិថុនា ឆ្នាំ២០១៧ និងបាននាំ Roma ឈានដល់វគ្គពាក់កណ្តាលផ្តាច់ព្រ័ត្រ Champions League រដូវកាលមុនផងដែរ។
សម្រាប់តំណែងដែលនៅទំនេរ ប្រធានក្លិប Roma លោក Jim Pallotta កំពុងមានការទាក់ទងលោក Claudio Ranieri ដែលទើបត្រូវបាន Fulham បញ្ចប់តំណែង កាលសប្តាហ៍មុន ដើម្បីទៅជំនួសកៅអីលោក Di Francesco។
គ្រូបង្វឹកជើងចាស់សញ្ជាតិអ៊ីតាលីរូបនេះធ្លាប់ជួយ Leicester ឈ្នះពាន Premier League ក្នុងឆ្នាំ ២០១៦ មុនក្លិបរហស្សនាមកញ្ជ្រោងបណ្តេញលោកនៅរដូវកាលបន្ទាប់។
Ranieri ក៏ធ្លាប់ជាអ្នកចាត់ការក្រុមដែលមានមូលដ្ឋានក្នុងក្រុង Rome នេះដែរក្នុងចន្លោះពីឆ្នាំ២០០៩-២០១១ និងទទួលបានចំណាត់ថ្នាក់ទី២ក្នុងលីគ Serie A នៅឆ្នាំ ២០១០ ម្តងដែរ៕
Tag:
បាល់ទាត់
Roma
Eusebio di Francesco
Claudio Ranieri
© រក្សាសិទ្ធិដោយ thmeythmey.com