ប្រមុខការពារជាតិតួកគី៖ ណាតូជួយមិនគ្រប់គ្រាន់ ទើបតួកគីទិញប្រព័ន្ធការពារS-400 ពីរុស្ស៊ី

អន្តរជាតិ

ប្រមុខការពារជាតិតួកគី៖ ណាតូជួយមិនគ្រប់គ្រាន់ ទើបតួកគីទិញប្រព័ន្ធការពារS-400 ពីរុស្ស៊ី

09, Mar 2019 , 3:59 pm

រូបភាព

ប្រព័ន្ធការពារមីស៊ីល S-400 របស់រុស្ស៊ីដែលតួកគីទិញ (រូបភាព Sputnik)

ដោយ: តន ចាន់រិទ្ធារ៉ា

ទោះរងសម្ពាធ និងការព្រមានពីអាមេរិកយ៉ាងណាក្ដី តួកគីមិនបោះបង់គម្រោងទិញប្រព័ន្ធការពារអាកាស S-400 របស់រុស្ស៊ីឡើយ។ រដ្ឋមន្ត្រីការពារជាតិតួកគី Hulusi Akar និយាយថា ការទិញប្រព័ន្ធការពារអាកាសនេះ ជារឿងចំបាច់សម្រាប់តួកគីដើម្បីការពារខ្លួន ខណៈសម្ព័ន្ធយោធាណាតូ មិនបានផ្ដល់ភាពកក់ក្ដៅឲ្យតួកគីឡើយ។ មេដឹកនាំកំពូលរបស់តួកគីក៏បញ្ជាក់ហើយថា តួកគីមានសិទ្ធិទិញអាវុធតាមដែលខ្លួនត្រូវការ។

តួកគី នៅតែមិនញញើតញញើមនឹងការព្រមានរបស់អាមេរិក ហើយបន្តអនុវត្តគម្រោងទិញប្រព័ន្ធការពារអាកាសដ៏មានឥទ្ធិពល S-400 ពីរុស្ស៊ីដដែល។ រដ្ឋមន្ត្រីការពារជាតិតួកគី Hulusi Akar ប្រាប់ទីភ្នាក់ងារព័ត៌មាន Anadolu ថា ការពង្រាយខែលការពារមីស៊ីលនេះ នឹងចាប់ផ្ដើមនៅខែតុលាខាងមុខនេះ ដើម្បីការពារប្រជាជនទាំង៨២លាននាក់របស់តួកគី។

ការព្រមានប្រើធម៌ក្ដៅរបស់ក្រុងវ៉ាស៊ីនតោន មានចាប់តាំងពីការគំរាមដាក់ទណ្ឌកម្មរុស្ស៊ីដែលហ៊ានរកស៊ីជាមួយរុស្ស៊ី ការត្រួតពិនិត្យកិច្ចព្រមព្រៀងទិញយន្តហោះ F-35 ឡើងវិញរហូតដល់ការលើកឡើងថា ប្រព័ន្ធការពាររុស្ស៊ី មិនសមស្របជាមួយស្តង់ដារបស់សម្ព័ន្ធយោធាណាតូទៅទៀត។ យ៉ាងណាមិញ ក្រុងអង់ការ៉ាមិនខ្វល់ខ្វាយច្រើនឡើយ ដោយលោក Akar និយាយផ្លែផ្កាវិញថា តួកគីគោរពតាមកាតព្វកិច្ចជាសមាជិកណាតូ តែណាតូមិនបានជួយការពារតួកគីឲ្យបានគ្រប់គ្រាន់វិញឡើយ ដូចនេះទើបតួកគីរកទិញប្រព័ន្ធការពារពីកន្លែងផ្សេង។

នៅដើមសប្ដាហ៍នេះ អាមេរិកក៏គំរាមតួកគីពីផលវិបាកដ៏ខ្លាំងក្លា បើនៅតែទទួលយក S-400 របស់រុស្ស៊ីទៀត។ តាមពិតទៅ អាមេរិកបារម្ភថា វត្តមានរួមគ្នារបស់យុទ្ធោបករណ៍អាមេរិក និងរុស្ស៊ី នឹងធ្វើឲ្យប៉ះពាល់សមត្ថភាពបច្ចេកវិទ្យារបស់ណាតូ ហើយម្យ៉ាងទៀតអាចមានការបែកធ្លាយការសម្ងាត់របស់អាមេរិកទៅរុស្ស៊ីផង។

ការព្រមានរបស់អាមេរិក មិនធ្វើឲ្យតួកគីព្រឺប៉ុន្មានឡើយ។ ប្រធានាធិបតីតួកគី តៃយីប អ៊ែរដូហ្កាន់ ប្រាប់សារព័ត៌មានក្នុងស្រុកតួកគីនៅថ្ងៃទី៦ ខែមីនា ថា ការតស៊ូរបស់អាមេរិកប្រឆាំងសម្ពាធអាមេរិក នៅតែរឹងដូចថ្ម ព្រោះតួកគីជាប្រទេសឯករាជ្យ ហើយមានសិទ្ធិរកស៊ីជាមួយប្រទេសណាតាមចិត្តចង់របស់ខ្លួន។ មិនមែនត្រឹម S-400 ឡើយ លោក អ៊ែរដូហ្កាន់ ក៏គំរាមដំឡើងសមត្ថភាពទៅរកប្រព័ន្ធការពារមីស៊ីល S-500 ដែលរុស្ស៊ីកំពុងអភិវឌ្ឍផង៕