មិនចង់ក្លាយជាបន្ទុកក្នុងគ្រួសារ និងចង់ជួយអ្នកពិការដូចគ្នា ទើបកញ្ញា តាក់ ន្និកា បង្កើតកន្លែងម៉ាស្សាដៃទេពឡើង

ជាតិ

បទយកការណ៍ / បទសម្ភាសន៍

មិនចង់ក្លាយជាបន្ទុកក្នុងគ្រួសារ និងចង់ជួយអ្នកពិការដូចគ្នា ទើបកញ្ញា តាក់ ន្និកា បង្កើតកន្លែងម៉ាស្សាដៃទេពឡើង

09, Mar 2019 , 8:59 pm

រូបភាព

អ្នកនាង តាក់ ន្និការ ម្ចាស់ហាងម៉ាស្សា«ន្និការមជ្ឈមណ្ឌលម៉ាស្សាដៃទេពដោយជនពិការភ្នែក

ដោយ: អ៊ូ សុខមាន (OU Sokmean)

ភ្នំពេញ៖ មិនចង់ឱ្យខ្លួនក្លាយជាបន្ទុកនៅក្នុងគ្រួសារ ដោយសារតែខ្លួនជាជនពិការភ្នែកតាំងពីកុមារភាព អ្នកនាង តាក់ ន្និការ បានទៅរៀន និងចាប់យកជំនាញម៉ាស្សាពីអង្គការម៉ារីណល របស់ជប៉ុន និងប្រកបមុខរបរម៉ាស្សានេះ ដោយខ្លួនឯង អស់រយៈពេលជិត២៥ឆ្នាំ កន្លងមកហើយ។ អ្នកនាង តាក់ ន្និការ បាននិយាយថា ការបើកមជ្ឈមណ្ឌលម៉ាស្សាដៃទេពនេះឡើង គឺដើម្បីបង្កើតជំនាញមួយឱ្យច្បាស់លាស់សម្រាប់ខ្លួនឯង ដែលជាជនពិការភ្នែក និងផ្តល់ឱកាសដល់អ្នកពិការភ្នែកដូចគ្នា មានជំនាញពិតប្រាកដមួយ សម្រាប់រកចំណូលប្រចាំថ្ងៃផ្គត់ផ្គង់ជីវិត។

ជាកូនស្រីពៅក្នុងចំណោមខ្ញុំប្អូន៥នាក់ ដែលមានគ្រួសារមានជីវភាពរស់នៅសមរម្យ នៅក្នុងរាជធានីភ្នំពេញ ដោយមានឪពុក-ម្តាយ ខ្ញុំប្អូនស្រលាញ់ ថ្នាក់ថ្នូរ មិនឱ្យស្ត្រីពិការភ្នែករូបនេះលំបាកអ្វីច្រើន ដូចអ្នកពិការឯទៀតឡើយ។ ថ្វីដ្បិត កញ្ញា ន្និការ ទទួលបានក្តីស្រលាញ់ពេញលេញពីគ្រួសាររបស់ខ្លួនក៏ពិតមែន ប៉ុន្តែស្ត្រីពិការភ្នែករូបនេះតែងតែយល់ឃើញថា អ្នកពិការ មិនថាពិការភ្នែក ពិការដៃជើង និងពិការអ្វីទេ គឺសុទ្ធតែជាបន្ទុកគ្រួសារ។ ការយល់ឃើញដូច្នេះ បូកផ្សំជាមួយឆន្ទៈ ដែលចង់រៀនជំនាញម៉ាស្សាពីមជ្ឈមណ្ឌលស្តារលទ្ធភាពជនពីការភ្នែក(ម៉ារីណល)ផងនោះ ស្ត្រីពិការភ្នែកដោយសារជំងឺកញ្ជ្រឹលរូបនេះ បានចូលរៀនជំនាញនេះ នៅក្នុងវ័យ១៨ឆ្នាំ។

អ្នកនាង តាក់ ន្និការ បាននិយាយប្រាប់សារព័ត៌មានថ្មីៗដូច្នេះ « បានជាខ្ញុំទទួលបានវគ្គបណ្តុះបណ្តាលនេះ តាមពិតទៅខ្ញុំលួចទៅរៀនទេ ព្រោះឪពុក-ម្តាយមិនឱ្យខ្ញុំទៅរៀន ដោយសារយើងពិការភ្នែកអ៊ីចឹងខ្លាចគេធ្វើបាប។ ប៉ុន្តែដោយសារខ្ញុំស្រលាញ់ការរៀនសូត្រ ហើយមានឆន្ទៈចង់រៀន ចង់អភិវឌ្ឍខ្លួនឯង និងគិតថាយើងពិការភ្នែកបែបនេះ មិនដឹងថានៅផ្ទះធ្វើអ្វី ក៏បានជាខ្ញុំសម្រេចចិត្តទៅរៀនទៅ »។

មុខនឹងរៀនជំនាញម៉ាស្សាបែបជប៉ុននេះ ស្ត្រីពិការភ្នែកតាំងពីវ័យជំទង់នេះ ក៏បានរៀនភាសាខ្មែរ-អង់គ្លេស តាមរយៈអក្សរស្ទាប បានរយៈពីរឆ្នាំ នៅអង្គការម៉ារីណលនេះ ចាប់តាំងពីឆ្នាំ១៩៩៣។ រហូតដល់ឆ្នាំ១៩៩៥ ទើបចាប់ផ្តើមរៀន និងអនុវត្តជំនាញម៉ាស្សានេះ នៅក្នុងវត្តសារាវ័នតេជោ អស់រយៈពីរឆ្នាំទៀត។ ក្រោយរៀនចប់វគ្គបណ្តុះបណ្តាលជំនាញម៉ាស្សានេះ អង្គការម៉ារីណល បានចងក្រងអ្នកពិការជាក្រុម និងបង្កើតមជ្ឈមណ្ឌលម៉ាស្សាដៃទេព ដែលមានទីតាំងដំបូងនៅជិតក្រសួងកិច្ចការនារី បន្ទាប់មកទៀតបានប្តូរមកទីតាំងថ្មី នៅទល់មុខប្រៃសណីយកម្ពុជា ដែលកំពុងដំណើរការសព្វថ្ងៃ។ នេះបើតាម អ្នកនាង ន្និការ។

ក្នុងអំឡុងឆ្នាំ២០០៦ អ្នកនាង តាក់ ន្និការ បានផ្តាច់ខ្លួនចេញពីក្រុមម៉ាស្សា នៅទួលមុខប្រៃសណីយកម្ពុជា ដោយបានបង្កើតក្រុមម៉ាស្សាថ្មីដោយមានជនពិការភ្នែកសរុប១៤នាក់(បូកទាំង កញ្ញា និ្នការ) ដែលមានទីតាំងនៅម្តុំសាលារៀនទួលស្វាយព្រៃ ក្នុងរាជធានីភ្នំពេញ ប៉ុន្តែក្រុមថ្មីនេះ មិនទាន់គ្រប់គ្រងដោយអ្នកនាង តាក់ ន្និការ ព្រោះតែរវល់។ អស់រយៈពេលជាង៥ឆ្នាំ នៃដំណើរការម៉ាស្សាជាក្រុមនេះ ទើបស្ត្រីពិកាភ្នែករូបនេះ ចូលខ្លួនមកគ្រប់គ្រង អ្នកពិការក្នុងក្រុមរបស់ខ្លួន ក្នុងឆ្នាំ២០១១ ។ ដោយសារមិនចង់ឱ្យខ្លួនក្លាយជាបន្ទុកនៅក្នុងគ្រួសារ និងចង់ជួយដល់អ្នកពិការដូចគ្នាផង ទើបអ្នកនាង តាក់ ន្និការ បង្កើតកន្លែងម៉ាស្សានេះឡើង។

អ្នកនាង តាក់ ន្និការ បាននិយាយយ៉ាងដូច្នេះ៖« ការបង្កើតក្រុមម៉ាស្សានេះឡើង គឺខ្ញុំចង់ផ្តាច់ខ្លួនចេញពីក្រុមម៉ាស្សាពិការភ្នែកដូចគ្នា ដែលអង្គការបានរៀបចំឱ្យ ព្រោះខ្ញុំគិតថាខ្ញុំមានសមត្ថភាព ទាំងផ្នែកហិរញ្ញាវត្ថុ និងជំនាញម៉ាស្សាបានល្អប្រសើរផងដែរ។ អ្វីដែលជំរុញ និងលើកទឹកចិត្តខ្ញុំកាន់តែខ្លាំងក្នុងការផ្តាច់ខ្លួននេះ គឺគំនិត និងឆន្ទៈជួយពិការអ្នកដូចគ្នា ដោយតែងតែគិតថា ប្រសិនបើខ្ញុំនៅតែធ្វើការងារនៅកន្លែងហ្នឹងទៀត គឺខ្ញុំអត់មានឱកាសជួយប្អូនៗពិការភ្នែកជំនាន់ក្រោយៗឱ្យមានប្រភពចំណូលចិញ្ចឹមខ្លួនឯងដោយសេចក្តីថ្លៃថ្នូរ និងត្រឹមត្រូវបានទេ»។

ក្នុងដំណើរការមុខរបរម៉ាស្សា នៅទីតាំងទួលស្វាយព្រៃនេះ មានការគាំទ្រច្រើនពីអតិថិនជន ដោយសារភាពប៉ិនប្រសព្វនៃជំនាញរបស់ជនពិការភ្នែកទាំង១៣នាក់ ដោយក្នុងមួយថ្ងៃអាចធ្វើម៉ាស្សាបានពី៧០ទៅ៨០ម៉ោង។

ក្រោយពេលបញ្ចប់កុងត្រានៃការជួលទីតាំងគេនៅទួលស្វាយព្រៃនោះមក អ្នកពិការភ្នែកទាំង១៣នាក់ ដែលបានធា្លប់ធ្វើការជាមួយអ្នកនាង ន្និការ បានចេញទៅធ្វើឱ្យគេនៅកន្លែងម៉ាស្សាជនពិការដទៃរៀងៗខ្លួន។ ចំណែកឯស្រី្តរូបនេះវិញ បានបង្កើតហាងម៉ាស្សាខ្លួនឯង ដោយមានស្លាកយីហោបច្ចុប្បន្នឈ្មោះ«ន្និការមជ្ឈមណ្ឌលម៉ាស្សាដៃទេព»ឡើង នៅថ្ងៃទី២៦ ឧសភា ឆ្នាំ២០១៦ ដែលមានទីតាំងថ្មីផ្ទាល់ខ្លួន នៅសង្កាត់បឹងកេងកង៣ ក្នុងខណ្ឌចំការមន ដោយមានបុគ្គលិកជនពិការភ្នែកជំនាញម៉ាស្សា ៥រូប ដែលបើកសេវាកម្មម៉ាស្សាជូនភ្ញៀវរៀងរាល់ថ្ងៃ ។

ក្នុងចំណោមអ្នកពិការភ្នែកទាំង៥នាក់នេះ គឺមានស្រី២នាក់ បូកទាំងម្ចាស់មជ្ឈមណ្ឌល។ ហើយពួកគាត់សុទ្ធតែមានជំនាញផ្នែកម៉ាស្សាជាច្រើនឆ្នាំ អ្នកខ្លះមានបទពិសោធ ៤-៥ឆ្នាំ និងខ្លះជាង១០ឆ្នាំ ដោយឡែក កញ្ញា តាក់ ន្និការមានបទពិសោធជិត ២៥ ឆ្នាំទៅហើយ។ កញ្ញា បាននិយាយថា« ពួកគាត់ទទួលបានប្រាក់កម្រៃពីកន្លែងខ្ញុំគិតជាភាគរយគឺបាន ៥០ភាគរយ ពីចំនួនភ្ញៀវដែលអញ្ជើញមកម៉ាស្សា។ ចំណែកឯតម្លៃម៉ាស្សាវិញ មួយម៉ោង មានតម្លៃ៥ដុល្លារ សម្រាប់ភ្ញៀវខ្មែរ និង ៧ដុល្លារ សម្រាប់ភ្ញៀវបរទេស។ ហើយក្នុងមួយថ្ងៃយើង អាចទទួលបម្រើសេវាម៉ាស្សាឱ្យអតិថិជន បានតែ២០ ទៅ៣០ម៉ោងប៉ុណ្ណោះ ដោយសារខ្វះកម្លាំងពលកម្ម ព្រោះមានអតិថិជនបានស្គាល់ និងចូលមកទទួលសេវាម៉ាស្សានេះច្រើន មិនថាភ្ញៀវខ្មែរ និងភ្ញៀវបរទេសទេ»។

ដោយសារសន្ទុះភ្ញៀវគាំទ្រច្រើនដល់សេវាកម្មម៉ាស្សានៅកន្លែងខ្លួននោះ ស្ត្រីពិការភ្នែកវ័យ៤២ឆ្នាំរូបនេះ ក៏តែងតែប្រមូល និងជួយដល់អ្នកពិការទាំងក្នុងទីក្រុង និងជនបទ ដែលបាក់ទឹកចិត្ត និងអស់សង្ឃឹម មកបម្រើការងារនៅកន្លែង ដើម្បីផ្តល់ឲ្យពួកគេទទួលបានប្រាក់ខែ និងជំនាញពិតប្រាកដ ដើម្បីជាទុនសម្រាប់អនាគតផងដែរ។ «បច្ចុប្បន្នមជ្ឈមណ្ឌលខ្ញុំ កំពុងប្រមូលអ្នកពិបាកភ្នែកនៅតាមបណ្តាខេត្ត ដែលមិនអស់សង្ឃឹមក្នុងជីវិត និងមានបំណងចង់រៀននូវជំនាញម៉ាស្សាបែបជប៉ុននេះ ខ្ញុំនឹងយកពួកគេមកបណ្តុះបណ្តាលក្នុងមជ្ឃមណ្ឌលនេះផ្ទាល់ ឬអង្គការលើកស្ទួយ និងអភិវឌ្ឍការងារជនពិការកម្ពុជា ដោយមិនយកថវិកាពីពួកគេ។ ហើយនៅពេលដែលពួកគេរៀនចប់វគ្គបណ្តុះបណ្តាលនេះ ពួកគេអាចធ្វើការនៅកន្លែងខ្ញុំ ដោយទទួលបានកម្រៃគិតជាភាគរយ ដូចគេឯងអ៊ីចឹង។ បើពួកគេមិនចង់ធ្វើការកន្លែងខ្ញុំ ពួកគេអាចបប្រើជំនាញដែលចេះពីខ្ញុំ ទៅធ្វើការនៅកន្លែងម៉ាស្សាជនពិការភ្នែកដទៃក៏បានដែរ»។ នេះជាការបញ្ជាក់របស់អ្នកនាង តាក់ ន្និការ។

ដ្បិតជាកន្លែងម៉ាស្សា ប៉ុន្តែក៏មិនមែនជាកន្លែងផ្ដល់សេវាកម្មផ្លូវភេទដែរ។ អ្នកនាង តាក់ ន្និការ ស្នើឲ្យភ្ញៀវដែលចូលរកសេវាកម្មម៉ាស្សា ផលតម្លៃឲ្យជនពិការ និងស្ត្រីបម្រើការងារនៅកន្លែងម៉ាស្សាផងដែរ។ ស្ត្រីពិការភ្នែកវ័យ៤២ឆ្នាំរូបនេះ បាននិយាយដូច្នេះថា៖« សេចក្តីថ្លៃថ្នូរត្រង់នេះ ខ្ញុំចង់បញ្ជាក់ថា មិនថាកន្លែងម៉ាស្សារបស់ខ្ញុំ ឬកន្លែងម៉ាស្សាជនពិការដទៃទេ គឺប្រើនូវជំនាញដែលខ្លួនទទួលបានពីការបណ្តុះបណ្តាលរបស់អង្គការនីមួយៗត្រឹមត្រូវ ជាពិសេសយើងគោរព និងឱ្យតម្លៃខ្លួនឯងច្បាស់។ ឃ្លានេះ មានន័យថា អ្នកដែលមកទទួលសេវាម៉ាស្សានេះ គឺមកតែម៉ាស្សា មិនមែនគិត ឬមកចង់រកសេវាផ្លូវភេទនៅកន្លែងម៉ាស្សាជនពិការនេះទេ។ កុំច្រឡំថាកន្លែងម៉ាស្សាជនពិការ ក៏ជាកន្លែងបម្រើសេវាផ្លូវភេទ ដូចកន្លែងម៉ាស្សាមួយចំនួន»។ ដោយគិតថាខ្លួនឯងមានសមត្ថភាពនៃជំនាញនេះបានល្អប្រសើរ និងមានការគាំទ្រផ្នែកហិរញ្ញាវត្ថុមួយចំនួនពីខ្ញុំស្រីរបស់ខ្លួនផងនោះ ក៏បានចងក្រង និងបង្កើតក្រុមម៉ាស្សា»។

ក្រៅពីបង្កើតកន្លែងម៉ាស្សាជួយជនពិការហើយ អ្នកនាង ន្និការ ក៏បានបង្កើតអង្គការលើកស្ទួយ និងអភិវឌ្ឍការងារជនពិការកម្ពុជា រយៈពេលជាង៣ខែមកហើយ។ ការបង្កើតអង្គការនេះឡើង ក្នុងគោលបំណងបើកវគ្គបណ្តុះបណ្តាលដល់ពិការភ្នែកជាលើកដំបូងរបស់អ្នកនាង ន្និកា ដើម្បីបង្រៀនជំនាញការងារដល់ជនពិការ ទំនាក់ទំនងការងារជូនដល់ជនពិការ និងការពារសិទ្ធិរបស់ជនពិការ៕