អន្តរជាតិ
ធ្លាក់យន្តហោះអេត្បូពី៖ ស្លាប់ទាំង១៥៧នាក់ ដោយជនរងគ្រោះមាន៣៥សញ្ជាតិផ្សេងគ្នា រូបថត AFP
× ករណីធ្លាក់យន្តហោះប៊ូអ៊ីង Ethiopian Airlines ក្នុងដំណើររវាងក្រុង Addis Abeba-Nairobi កាលពីព្រឹកថ្ងៃអាទិត្យ ទី១០ ខែមីនា ត្រូវបានអះអាងជាផ្លូវការថា មនុស្សទាំង១៥៧នាក់ ក្នុងនោះ៨នាក់ជាបុគ្គលិកយន្តហោះ សុទ្ធតែបានទទួលមរណភាព។
តាមរបាយការណ៍របស់ក្រុមហ៊ុន Ethiopian Airlines ផ្ទាល់ អ្នកជិះក្នុងយន្តហោះវ៉ុល ET302 ទាំង១៥៧រូបនោះ មាន៣៥សញ្ជាតិផ្សេងៗគ្នា។ កេនយ៉ា រងគ្រោះច្រើនជាងគេដោយមានរហូតដល់ទៅ៣២នាក់ បន្ទាប់មកមាន កាណាដា ១៨នាក់ អេត្យូពី១៧នាក់ (បុគ្គលិកយន្តហោះទាំង៨នាក់ ត្រូវបានរាយការណ៍ថា សុទ្ធតែជនជាតិអេត្យូពី) ចិន ៨នាក់ អ៊ីតាលី៨នាក់ អាមេរិក៨នាក់ បារាំង៧នាក់ អង់គ្លេស៧នាក់ អេហ្ស៊ីប៦នាក់ អាល្លឺម៉ង់៥នាក់ ឥណ្ឌា៤នាក់ ស្លូវ៉ាគី៤នាក់ អូទ្រីស៣នាក់ រុស្ស៊ី៣នាក់ ស៊ុយអែត៣នាក់ អេស្ប៉ាញ២នាក់ អ៊ីស្រាអែល២នាក់ ម៉ារ៉ុក២នាក់ និងប៉ូឡូញ២នាក់។
រីឯប្រទេសដែលជនជាតិខ្លួនស្លាប់១នាក់រៀងៗខ្លួន រួមមានបែលហ្ស៊ិក ឌីជីប៊ូទី ឥណ្ឌូណេស៊ី អៀរឡង់ មូសំប៊ិក ន័រវេស រវ៉ាន់ដា អារ៉ាប៊ីសាអូឌីត ស៊ូដង់ សូម៉ាលី ស៊ែប៊ី តូហ្គោ អ៊ូហ្គង់ដា យេម៉ែន ណេប៉ាល់ និងនីហ្សេរីយ៉ា។
យន្តហោះវ៉ុល ET302 នោះ ស្ថិតក្នុងដំណើរហោះហើរពីអាកាសយានដ្ឋាន Addis Ababa Bole ទៅកាន់អាកាសយានដ្ឋាន Jomo Kenyatta ក្រុងណៃរ៉ូប៊ី ប្រទេសកេនយ៉ា។ ក្រុមហ៊ុនបានអះអាងថា អ្នកបើកបរ បានដឹងពីស្ថានភាពរបស់យន្តហោះ ហើយបានស្នើសុំបើកត្រឡប់ទៅចុះចតនៅអាកាសយានដ្ឋានក្រុង Addis Abeba វិញ។
ក្រោយបាត់ការទាក់ទង យន្តហោះ បានធ្លាក់នៅក្រុង Bishoffu ចម្ងាយប្រមាណ៦០គីឡូម៉ែត្រពីក្រុងអាឌីសអាបេបា ប្រទេសអេត្យូពី៕
© រក្សាសិទ្ធិដោយ thmeythmey.com