កីឡាអន្តរជាតិ
អន្តរជាតិ
Liverpool បន្តឡើងកៀក Man City ខណៈ Arsenal ចូលតំបន់ Top 4 ក្រោយឈ្នះ Man Utd Mane (ឆ្វេង) រកបានពីរគ្រាប់ឲ្យ Liverpool រីឯ Xhaka អបអរគ្រាប់បញ្ចូលទីពីចម្ងាយរបស់ខ្លួនលើ Man Utd។ រូបថត Premier League
× Liverpool បន្តតាមពីក្រោយក្រុមកំពូលតារាង Manchester City មួយពិន្ទុ ខណៈការប្រកួតឈានដល់សប្តាហ៍ទី៣០។ សម្រាប់តំណែង Top 4, Arsenal តាមពីក្រោយ Tottenham Hotspur មួយពិន្ទុ ក្រោយឈ្នះ Manchester United រីឯ Chelsea ដែលប្រកួតត្រឹមសប្តាហ៍ទី២៩ ក៏មិនមានគម្លាតមិនឆ្ងាយនោះដែរ។
Liverpool បានយកឈ្នះភ្ញៀវ Burnley ៤-២ ដោយ Roberto Firmino និង Sadio Mane រកបានម្នាក់ចំនួន២គ្រាប់ រីឯ២គ្រាប់របស់ Burnley សម្រេចបានដោយ Ashley Westwood និង Johann Gudmundsson។ ជ័យជម្នះនេះ នាំឲ្យ ហង្សក្រហមមាន៧៣ពិន្ទុ តាមពីក្រោយ Manchester City មួយពិន្ទុ។ ក្រុមមេឃខៀវ រក្សាតំណែងកំពូលតារាង ក្រោយឈ្នះ Watford ៣-១ កាលពីថ្ងៃសៅរ៍។
Tottenham Hotspur ខកខានឱកាសនាំមុខដាច់សម្រាប់តំណែងលេខបី បន្ទាប់ពីពួកគេរងនូវការខកចិត្ត ដោយចាញ់ម្ចាស់ផ្ទះ Southampton ២-១ ។ Harry Kane រកបានគ្រាប់បាល់បើកឆាកនៅតង់ទីមួយសម្រាប់ Spurs ប៉ុន្តែ Yann Velery និង James Ward Prowse វាយបកយកឈ្នះសម្រាប់ Southampton នៅតង់ទីពីរ។
ដោយឡែកជំនួបនៅ Emirates Stadium ម្ចាស់ផ្ទះ Arsenal បានយកឈ្នះ Manchester United ២-០ ដែលរកបានដោយ Granit Xhaka និង Pierre-Emerick Aubameyang នៅតង់នីមួយៗ។ នេះជាបរាជ័យលើកដំបូងក្នុង Premier League របស់បិសាចក្រហម ក្រោមការដឹកនាំរបស់លោក Ole Gunnar Solskjaer។ ជ័យជម្នះនាំឲ្យ កាំភ្លើងធំ ដណ្តើមបានលេខ៤ ដោយមាន៦០ពិន្ទុ ពោលគឺតាមពីក្រោយ Spurs មួយពិន្ទុ។
រីឯ Chelsea ដែលទើបប្រកួតបាន២៩សប្តាហ៍ មាន៥៧ពិន្ទុ ឈរនៅចំណាត់ថ្នាក់លេខ៦ ដោយមាន១ពិន្ទុតិចជាង Manchester United។ ក្នុងការប្រកួតលើទឹកដីរបស់ខ្លួន Eden Hazard រកបានគ្រាប់បាល់តាមស្មើនៅនាទីបន្ថែម ក្រោយការនាំមុខរបស់ក្រុមភ្ញៀវ Wolverhampton Wanderers នៅដើមតង់ទីពីរ ដែលសម្រេចបានដោយ Raul Jimenez។
សម្រាប់ការប្រកួតផ្សេងទៀត Brigthton ឈ្នះ Crystal Palace ២-១, Cardiff ឈ្នះ West Ham ២-០, Bournemouth ឈ្នះ Huddersfield ២-០, Leicester City ឈ្នះ Fulham ៣-១ និងNewcastle ឈ្នះ Everton ៣-២។
Fulham និង Huddersfield កាន់តែប្រឈមនឹងការកាត់ចេញ បន្ទាប់ពីពួកគេរកបានត្រឹមតែ ១៧ពិន្ទុ និង១៤ពិន្ទុ ប៉ុណ្ណោះ នាការប្រកួត៣០សប្តាហ៍កន្លងមក៕
© រក្សាសិទ្ធិដោយ thmeythmey.com