ក្រោយការធ្លាក់នៃយន្តហោះក្រុមហ៊ុនអាកាសចរណ៍អេត្យូពីកាលពីយប់ថ្ងៃអាទិត្យចុងសប្តាហ៍មុនដោយសម្លាប់មនុស្សអស់ ១៥៧នាក់ ក្រុមហ៊ុនអាកាសចរណ៍នៅប្រទេសជាច្រើនបន្តផ្អាកប្រើប្រាស់យន្តហោះប៊ូអ៊ីង ៧៣៧ MAX 8 បណ្តោះអាសន្នសិន។ ការបន្តហាមហោះហើរយន្តហោះប៊ូអ៊ីងស៊េរីថ្មីនេះកំពុងធ្វើឲ្យក្រុមហ៊ុនអាមេរិក ប៊ូអ៊ីង នេះបាក់មុខលើឆាកអន្តរជាតិ ហើយនឹងអាចខាតបង់ហិរញ្ញវត្ថុខ្លាំងថែមទៀតផងនៅពេលខាងមុខ។
ក្នុងរយៈពេលមិនដល់កន្លះឆ្នាំស្រួលបួលផង យន្តហោះប៊ូអ៊ីងប្រភេទ ៧៣៧ MAX 8 ធ្លាក់ពីរដង។ ករណីធ្លាក់លើកទីមួយកើតឡើងនៅខែតុលាឆ្នាំមុន ពេលយន្តហោះក្រុមហ៊ុន Lion Air ធ្លាក់ក្នុងសមុទ្រជ្វាក្រោយហោះឡើងបានប៉ុន្មាននាទីប៉ុណ្ណោះ។ អ្នកដំណើរ ១៨៩នាក់បានស្លាប់ក្នុងឧប្បទ្ទវហេតុនេះ។
ដល់កើតមានករណីធ្លាក់យន្តហោះដដែលជាលើកទីពីរ ក្រុមហ៊ុនអាកាសចរណ៍ និងបណ្តាប្រទេសជាច្រើនបានសម្រេចដាក់ចេញវិធានការហាមហោះហើរយន្តហោះប្រភេទនេះ ថ្វីបើបើការស៊ើបអង្កេតបន្តទៅមុខ និងមិនទាន់មានការរកឃើញបញ្ហាបច្ចេកទេសក្នុងយន្តហោះនេះក៏ដោយ។
បើតាមទីភ្នាក់ងារព័ត៌មាន AFP ប្រទេសមិនតិចជាងដប់ឡើយដែលដាក់ចេញវិធានការផ្អាកការហោះហើរយន្តហោះ ៧៣៧ MAX 8 ហើយក្រុមហ៊ុនខ្លះចាត់វិធានការខ្លួនឯងដើម្បីត្រួតពិនិត្យឡើងវិញ និងធានាពីសុវត្ថិភាពនៃការហោះហើរ។ រដ្ឋទាំនោះមានពីអាស៊ី អាមេរិក អឺរ៉ុប អាហ្វ្រិកផងសុទ្ធតែដាក់ចេញវិធានការហាមហោះហើរយន្តហោះនេះបណ្តោះអាសន្នសិនដើម្បីធានាសុវត្ថិភាព។
ប៉ុន្តែប្រទេសមួយចំនួនដូចជា សិង្ហបុរី, អូស្ត្រាលី, អូម៉ង់, អង់គ្លេស, ន័រវែស, អៀកឡង់បារាំង និងតួកគី នាំគ្នាផ្អាកហោះហើរាល់ប្រភេទយន្តហោះប៊ូអ៊ីងម៉ូដែល ៧៣៧ MAX ទាំងអស់មិនត្រឹមតែ ៧៣៧ MAX 8ឡើយ។
ថ្វីបើដូច្នេះក្តី ភ្នាកងារសុវត្ថិភាពអាកាសចរណ៍អាមេរិក និងសេតវិមានអាមេរិកក្តីបានព្យាយាមសម្រួលស្ថានការណ៍ ដោយបដិសេធចេញវិធានការដូចប្រទេសដទៃដើម្បីផ្អាកហោះហើរយន្តហោះប៊ូអ៊ីងម៉ូដែលខាងលើឡើយ។ កាលពីថ្ងៃអង្គារទី ១២ ខែមីនា ទីភ្នាក់ងារអាកាសចរណ៍អាមេរិក និងអ្នកនាំពាក្យសេតវិមានបានបកស្រាយថា វាចាំបាច់ត្រូវបន្តការបន្តការហោះហើរយន្តហោះប៊ូអ៊ីង ៧៣៧ Max 8 ហើយរាល់ការប្រញាប់ប្រញាល់សន្និដ្ឋាន ឬចាត់វិធានការភ្លាមនោះជារឿងមិនសមហេតុផលឡើយ។
ឯក្រសួងដឹកជញ្ជូនអាមេរិកវិញបានប្រកាសថា វាមិនទាន់មានការរកឃើញនៅឡើយទេពីបញ្ហាទាក់ទងនឹងដំណើរការយន្តហោះនេះ។ ប៉ុន្តែបើក្នុងករណីដែលមានការរកឃើញបញ្ហាបច្ចេកទេសណាមួយមែន ការអនុវត្តចំណាត់ការនឹងត្រូវធ្វើភ្លាមៗដែរ។
យ៉ាងណាមិញ សមាជិកព្រឹទ្ធសភាដូចជាលោក Ted Cruz និងលោកស្រី Elizabeth Warren ក៏បានចេញមុខដាស់តឿនឲ្យអាជ្ញាធរអាកាសចរណ៍អាមេរិកដាក់វិធានការដូចប្រទេសដទៃដែរ ដោយបក្ស្រាយថា វាជារឿងចាំបាច់ដើម្បីធានាសុវត្ថិភាព ទម្រាំមានការបញ្ជាក់ច្បាស់ថាការហោះហើរយន្តហោះមានសុវត្ថិភាពមែន។
-ករណីធ្លាក់យន្តហោះប៊ូអ៊ីង ៧៣៦ MAX8 ធ្វើឲ្យប៊ូអ៊ីងបាក់មុខ និងប្រឈមវិបត្តិ
ការហាមហោះហើរយន្តហោះប្រភេទថ្មីរបស់ក្រុមយក្ស «ផលិតយន្តហោះ»របស់អាមេរិកនេះកំពុងក្លាយជារឿងចម្រូងចម្រាសដែលប៉ះពាល់ដល់កិត្តិយស និងមុខមាត់ក្រុមហ៊ុនខ្លាំង។ ត្រង់ន័យនេះ គេអាចនិយាយបានថា បាក់មុខក្រុមហ៊ុនដ៏ធំនេះក៏មិនខុសពីបាក់មុខប្រជាជាតិអាមេរិកទាំងមូលដែរ ដ្បិតជាធម្មតាប៊ូអ៊ីងតំណាងឲ្យអាមេរិកទាំងមូល។
ក្រុមហ៊ុនប៊ូអ៊ីងទើបតែប្រារព្ធខួប ១០០ឆ្នាំកាលពីឆ្នាំ ២០១៦ ប៉ុន្តែបើគេរកឃើញថា ករណីធ្លាក់នេះពិតជាពាក់ព័ន្ធនឹងបច្ចេកវិទ្យាយន្តហោះមែន ប៊ូអ៊ីងអស់ប្រជាប្រិយភាព និងបាត់បង់អតិថិជនច្រើនមិនខានឡើយ។
លើសពីកិត្តិយស វាក៏អាចប៉ះពាល់ដល់ប្រភពចំណូលរបស់ក្រុមហ៊ុនដែលរំពឹងកន្លងមកថា កើនឡើងព្រោះកាក់កបដោយលក់យន្តហោះស៊េរីថ្មីនេះបានច្រើនផង។ បើតាមទីភ្នាក់ងារព័ត៌មាន AFP យន្តហោះស៊េរីប៊ូអ៊ីង ៧៣៧ MAX8 នេះប្រហែល៣៥០គ្រឿងរួចហើយកំពុងហោះហើរនៅទូទាំងពិភពលោក ហើយយន្តហោះនេះជិត ៥០០០គ្រឿងត្រូវបានបញ្ជាទិញទូទាំងពិភពលោកផង។ ដូចឃើញស្រាប់ថ្មីនេះ វៀតណាមក៏បានបញ្ជាទិញយន្តហោះប៊ូអ៊ីង ៧៣៧ MAX8 ចំនួន ១០០គ្រឿងដែរ។
បច្ចុប្បន្ន ក្រុមហ៊ុនប៊ូអ៊ីងផលិតយន្តហោះនេះបាន ៥២គ្រឿងរៀងរាល់ខែ ហើយក្រុមហ៊ុននេះមានផែនការបង្កើនការផលិតឲ្យដល់ ៥៧គ្រឿងក្នុងមួយខែក្នុងឆ្នាំនេះដើម្បីអាចផ្គត់ផ្គង់ឲ្យទីផ្សារបានចន្លោះពី ៨៩៥ដល់ ៩០៥គ្រឿងក្នុងឆ្នាំ ២០១៩នេះដែរ។ ជាមធ្យម យន្តហោះប្រភេទនេះមួយគ្រឿងមានតម្លៃជិត ១២២លានដុល្លារអាមេរិកឯណោះ។
បញ្ហាដែលកំពុងកើតឡើងនេះអាចនឹងនាំឲ្យមានការលុបចោលការកុម្ម៉ង់ទិញយន្តហោះពីក្រុមហ៊ុនអាកាសចរណ៍នានាទូទាំងពិភពលោក។ ប៉ុន្តែនៅដំណាក់កាលបច្ចុប្បន្ន មិនទាន់មានក្រុមហ៊ុនណាមួយសម្រេចលុបចោលការបញ្ជាទិញយន្តហោះប៊ូអ៊ីងស៊េរី ៧៣៧ MAX ជាផ្លូវការឡើយ។ ប៉ុន្តែមានការផ្សព្វផ្សាយថា ក្រុមហ៊ុន Lion Air ឥណ្ឌូណេស៊ីចាប់ផ្តើមងាកទៅរកទិញយន្តហោះក្រុមហ៊ុន Airbus របស់អឺរ៉ុបមកជំនួសយន្តហោះអាមេរិកហើយ។
ដោយសារបញ្ហាទាំងនោះធ្ងន់ធ្ងរ ថ្មីៗនេះប្រធានាធិបតី ដូណាល់ ត្រាំ បានជជែកតាមទូរសព្ទជាមួយនាយកប្រតិបត្តិការក្រុមហ៊ុនប៊ូអ៊ីងផងដើម្បីពិភាក្សាពីដំណោះស្រាយសមស្របឆ្លើយតបនឹងបញ្ហានេះ។ អ្នកជំនាញជាច្រើនបានផ្តល់យោបល់ថា ក្រុមហ៊ុនអាមេរិកនេះគួរបន្តសហការឲ្យអស់ពីលទ្ធភាពជាមួយក្រុមស៊ើបអង្កេត ក៏ដូចជាអតិថិជនដែរដើម្បីស្វែងរកបញ្ហាពាក់ព័ន្ធនឹងដំណើរការយន្តហោះប៊ូអ៊ីង ៧៣៧ MAX និងធានាកុំឲ្យមានការភាន់ច្រឡំ៕