សម្ដេច ហ៊ុន សែន សន្យាមិនឲ្យបញ្ហាអគ្គិសនី ប៉ះពាល់ដល់ការវិនិយោគក្នុងស្រុកឡើយ

ជាតិ

សម្ដេច ហ៊ុន សែន សន្យាមិនឲ្យបញ្ហាអគ្គិសនី ប៉ះពាល់ដល់ការវិនិយោគក្នុងស្រុកឡើយ

18, Mar 2019 , 10:19 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ កម្ពុជាខ្វះកម្លាំងអគ្គិសនី៤០០មេហ្គាវ៉ាត់ ទើបឲ្យតំបន់មួយចំនួន មានការរអាក់រអួល ក្នុងការប្រើប្រាស់អគ្គិសនី។ នេះជាការលើកឡើងរបស់សម្ដេច ហ៊ុន សែន ដែលអំពាវនាវឲ្យពលរដ្ឋ យោគយល់លើបញ្ហាអគ្គិសនី មួយរយៈពេលចុងក្រោយនេះ។

ដើម្បីដោះស្រាយបញ្ហានេះ នាយករដ្ឋមន្ត្រី ហ៊ុន សែន បានស្នើទៅរដ្ឋាភិបាលតួកគីឲ្យជួយបញ្ជូននាវាផ្ទុកម៉ាស៊ីនភ្លើងមកកម្ពុជា សម្រាប់ទាញយកកម្លាំងអគ្គិសនីផ្គត់ផ្គង់ក្នុងស្រុក។ ប៉ុន្តែការស្នើសុំរបស់រដ្ឋាភិបាលកម្ពុជានេះ មិនទាន់មានការឆ្លើយតបណាមួយពីភាគីតួកគីនៅឡើយទេ។ ទន្ទឹមនឹងនេះសម្ដេច ហ៊ុន សែន ក៏បានស្នើទៅកាន់រដ្ឋាភិបាលវៀតណាម និងថៃ ឲ្យជួយផ្ដល់កម្លាំងអគ្គិសនីបន្ថែមដល់កម្ពុជា ប៉ុន្តែភាគីទាំងពីរនោះ មិនអាចជួយដោះស្រាយបញ្ហានេះ តាមសំណើរបស់កម្ពុជាបានទេ ដោយសារពួកគេក៏ជួបបញ្ហាកង្វះអគ្គិសនីប្រើប្រាស់ក្នុងស្រុកដែរ ខណៈឡាវអាចមានលទ្ធភាពផ្គត់ផ្គង់អគ្គិសនីដល់កម្ពុជា ប៉ុន្តែកម្ពុជាខ្វះឧបករណ៍តភ្ជាប់។

ជាជម្រើសចុងក្រោយនៃការដោះស្រាយបញ្ហាអគ្គិសនីនេះ សម្ដេច ហ៊ុន សែន ស្នើឲ្យម្ចាស់ក្រុមហ៊ុន និងអាជីវកម្មនៅកម្ពុជា ប្រើប្រាស់ម៉ាស៊ីនភ្លើង ដើម្បីទាញយកកម្លាំងអគ្គិសនីប្រើប្រាស់សិន ទម្រាំតែដំណើរការអគ្គិសនីនេះ វិលមករកធម្មតាវិញ។ ដ្បិតជួបប្រទះបញ្ហាអគ្គិសនីក្តី ក៏សម្ដេច ហ៊ុន សែន សន្យាមិនឲ្យប៉ះពាល់ដល់ការវិនិយោគនៅក្នុងតំបន់ឧស្សាហកម្មនានាឡើយ។ បើតាមនាយករដ្ឋមន្ត្រី ហ៊ុន សែន រដ្ឋាភិបាលនឹងបញ្ជូនអគ្គិសនីទៅតំបន់វិនិយោគទាំងនោះ ឲ្យមានលទ្ធភាពប្រើប្រាស់គ្រប់គ្រាន់ សម្រាប់ចង្វាក់ផលិតកម្ម ដោយមិនឲ្យខ្វះខាតនោះទេ។

សូមស្ដាប់សំឡេងសម្ដេច៖

ថ្លែងក្នុងពិធីចែកសញ្ញាបត្រ ដល់និស្សិតនៃវិទ្យាស្ថានខ្មែរជំនាន់ថ្មី ប្រមុខរដ្ឋាភិបាល បាននិយាយដូច្នេះថា៖«អ៊ីចឹងបញ្ហា(អគ្គិសនី)នេះ ខ្ញុំនៅតែបន្តអំពាវនាវប្រជាពលរដ្ឋរបស់យើងអត់ធ្មត់ ជាមួយសភាពការណ៍ដ៏លំបាកនេះ។ តែវាមិនដល់កម្រិតធ្វើឲ្យប៉ះពាល់ដល់តំបន់ផលិតកម្ម គឺអត់ទេ។ យ៉ាងណាយើងនៅមានភ្លើងជាង១០០០មេហ្គាវ៉ាត់ កំពុងប្រើប្រាស់សព្វថ្ងៃនេះ ហើយបើប្រៀបធៀបនឹងតម្រូវការយើងខ្វះជាង៤០០មេហ្គាវ៉ាត់…»។

ដោយសារតែកម្ពុជាខ្វះអគ្គិសនីជាង៤០០មេហ្គាវ៉ាត់នេះហើយ ទើបឲ្យតំបន់មួយចំនួន មានការរអាក់រអួល ក្នុងការប្រើប្រាស់។ នោះក៏ព្រោះតែខាងអគ្គិសនីកម្ពុជា ត្រូវការរុញអគ្គិសនីពីតំបន់ខ្លះ យកទៅផ្គត់ផ្គង់តំបន់ផ្សេងទៀត ដែលមានតម្រូវការចាំបាច់។ នេះជាការបញ្ជាក់របស់សម្ដេច ហ៊ុន សែន ដែលអះអាងថា បញ្ហាអគ្គិសនីនេះ វាជារឿងចាស់ ដែលតែងតែកើតឡើងម្ដងហើយម្ដងទៀតប៉ុណ្ណោះ។

អត្ថបទទាក់ទង

ខែមេសា និងឧសភា កម្ពុជានឹងក្តៅហួតហែងខ្លាំង ឯកម្តៅអាចឡើងដល់៤២អង្សា

ត្រង់ចំណុចនេះប្រមុខរដ្ឋាភិបាល បានពន្យល់ថា បញ្ហាអគ្គិសនីកើតឡើងនេះ ដោយសារតែអាកាសធាតុក្តៅខ្លាំង ដែលជាមូលហេតុនាំឲ្យខ្វះខាតទឹក ក្នុងការផ្គត់ផ្គង់ដល់វារីអគ្គិសនី បញ្ចេញថាមពលប្រើប្រាស់។

ទាក់ទងនឹងបញ្ហាទឹកដែរ សម្ដេច ហ៊ុន សែន ក៏បានបញ្ជាឲ្យមន្ត្រី និងអាជ្ញាធរចុះដោះស្រាយភ្លាមៗ ដល់ពលរដ្ឋក្នុងតំបន់ និងមូលដ្ឋាននីមួយៗ តាមរយៈការជីកអណ្ដូង ឬប្រឡាយសម្រាប់ពួកគេ ពោលគឺមិនចាំបាច់ដឹកទឹកពីកន្លែងផ្សេងទៅផ្គត់ផ្គង់ ដែលនាំតែមានផលលំបាកនោះឡើយ។

គួរបញ្ជាក់ថា កម្ពុជានឹងរងឥទ្ធិពល El nino ដែលធ្វើឲ្យអាកាសធាតុក្តៅចាប់ពី៤០-៤២អង្សារ ចាប់ពីខែមេសា ដល់ខែឧសភាខាងមុខនេះ៕