ប្រធានាធិបតីឥណ្ឌូណេស៊ី ណែនាំកសិករឲ្យងាកទៅដាំទុរេន ក្រោយទីផ្សារដូងប្រេងអឺរ៉ុបកាន់តែចង្អៀត

អន្តរជាតិ

ប្រធានាធិបតីឥណ្ឌូណេស៊ី ណែនាំកសិករឲ្យងាកទៅដាំទុរេន ក្រោយទីផ្សារដូងប្រេងអឺរ៉ុបកាន់តែចង្អៀត

23, Mar 2019 , 7:59 pm

រូបភាព

រូបភាព៖ ការិយាល័យប្រធានាធិបតីឥណ្ឌូណេស៊ី

ដោយ:

រដ្ឋាភិបាលក្រុងហ្សាការតា បានណែនាំឲ្យប្រជាជនដែលជាអ្នកដាំដូងប្រេងនៅក្នុងប្រទេសប្តូរមកដាំទុរេនវិញម្តង។ សេចក្តីណែនាំរបស់ក្រុងហ្សាការតា ធ្វើឡើងស្របពេលដែលទីផ្សារដូងប្រេងរបស់ខ្លួននៅអឺរ៉ុបកាន់តែមានការរឹតត្បិត ខណៈមើលឃើញពីសក្តានុពលរបស់ទីផ្សារទុរេន មិនមានអ្វីគួរឲ្យព្រួយបារម្ភ។

ក្នុងកម្មវិធីសំណេះសំណាលជាមួយសមាគមន៍អ្នកដាំដូងប្រេងនៅថ្ងៃ១៩ មីនាលោកប្រធានាធិបតីឥណ្ឌូណេស៊ី ចូកូ វីដូដូ បានប្រឹក្សាឲ្យអ្នកដាំដូងប្រេងពង្រីកអាជីវកម្មរបស់ខ្លួន ដោយងាកមកដាំដើមទុរេនវិញ ដោយលោក ជឿជាក់ថា ថា ផលិតផលនេះ មានឱកាស និងតម្រូវការច្រើននៅក្នុងទីផ្សារអន្តរជាតិ។ នេះបើយោងតាមការចុះផ្សាយរបស់សារព័ត៌មានឥណ្ឌូណេស៊ី Jakarta Post។

លោកប្រធានាធិបតី បានលើកឡើងថា ឥណ្ឌូណេស៊ី គឺជាប្រភពផលិតផលដូរប្រេងដ៏ធំបំផុតមួយរបស់ពិភពលោករួចទៅហើយ ក៏ប៉ុន្តែមុខទំនិញនេះ បានជួបផលលំបាកនៅក្នុងការពង្រីកទីផ្សារ ព្រោះបណ្តាប្រទេសមួយចំនួន បានភ្ជាប់ជាមួយនឹងបញ្ហាបរិស្ថាន ខណៈប្រទេសមួយចំនួនផ្សេងទៀត បានយកពន្ធខ្ពស់ពេក។

តបនឹងបញ្ហានេះ លោកប្រធានាធិបតី បានផ្តល់ជម្រើស និងអនុសាសន៍មួយ ដោយលោក ជឿជាថា ទុរេន មានសក្តានុពលជាងដូងប្រេង។ លោក សង្កត់ធ្ងន់ថា ចិន មានតម្រូវការខ្ពស់លើផ្លែទុរេន ដែលកន្លងមក ប្រភពនៃការផ្គត់ផ្គង់ មកពីម៉ាឡេស៊ី។ តាមលោកប្រធានាធិបតី ឥណ្ឌូណេស៊ី មានទុរេនល្អ និងចម្រុះប្រភេទ ក៏ប៉ុន្តែ មិនទាន់បានគ្រប់គ្រងបានត្រឹមត្រូវ។

តាម Jakarta Post ក្នុងមួយឆ្នាំ ឥណ្ឌូណេស៊ី ផលិតដូងប្រេងបាន ៤៦ លានតោន។ ក៏ប៉ុន្តែប៉ុន្មានឆ្នាំចុងក្រោយនេះ សហភាពអឺរ៉ុប ដែលជាទីផ្សារដ៏ធំនៃផលិតផលនេះ បានចាប់ផ្តើមរឹតត្បិតតាមរយៈការដំឡើងពន្ធ និងដាក់លក្ខខណ្ឌពាក់ព័ន្ធបរិស្ថានលើការនាំចូល ដែលធ្វើឲ្យមិនត្រឹមតែឥណ្ឌូណេស៊ីប៉ុណ្ណោះទេ តែម៉ាឡេស៊ី ក៏ដូចគ្នាផងដែរ បានប្រតិកម្មខ្លាំង និងសន្យាមានវិធានការត្រឡប់ទៅវិញ៕