អន្តរជាតិ
អ្នកនាំពាក្យ៖ ការដកខ្លួនពីតុលាការព្រហ្មទណ្ឌអន្តរជាតិ ព្រោះហ្វីលីពីនមានប្រព័ន្ធយុត្តិធម៌រឹងមាំហើយ
រូបភាព៖ Manila Bulletin
×![]()
បន្ទាប់ពីសមាជិកភាពហ្វីលីពីននៅក្នុងតុលាការព្រហ្មទណ្ឌអន្តរជាតិ (ICC) ត្រូវបានបញ្ចប់ជាផ្លូវការរួចហើយមក មានការចោទប្រកាន់ច្រើនលើរដ្ឋបាលដឹកនាំរបស់លោកប្រធានាធិបតីហ្វីលីពីន រ៉ូឌ្រីហ្គោ ឌូទើតេ ថា មិនហ៊ានប្រឈមមុខផ្នែកច្បាប់ ខណៈដែលតុលាការទើបតែចាប់ផ្តើមស៊ើបអង្កេតបឋមលើសំណុំរឿងគ្រឿងញៀនប៉ុណ្ណោះ។ ក៏ប៉ុន្តែរដ្ឋាភិបាលហ្វីលីពីន បានអះអាងថា ការចាកចេញនេះ ក៏ព្រោះតែហ្វីលីពីន មានប្រព័ន្ធយុត្តិធម៌រឹងមាំរួចហើយ។
តាមរយៈសន្និសីទសារព័ត៌មានប្រចាំនៅថ្ងៃ១៩ មីនា អ្នកនាំពាក្យប្រធានាធិបតីហ្វីលីពីនលោក Salvador Panelo បានអះអាងជំហរជាថ្មីថា ហ្វីលីពីន មិនត្រូវការតុលាការព្រហ្មទណ្ឌអន្តរជាតិអ្វីនោះទេ។ លោក បានគូសបញ្ជាក់ថា ហ្វីលីពីន មានប្រព័ន្ធយុត្តិធម៌រឹងមាំ និងប្រសិទ្ធភាពដើម្បីធានាពិនិត្យលើការអនុវត្តរបស់ប្រធានាធិបតី ដែលបំពានអំណាចរួចទៅហើយ។ នេះតាមការចុះផ្សាយរបស់ Inquirer។
តាមប្រភពព័ត៌មានដដែលនោះ លោកអ្នកនាំពាក្យ និងជាប្រធានប្រឹក្សាផ្នែកច្បាប់របស់ប្រធានាធិបតី បានលើកឡើងថា ហ្វីលីពីន បានបង្ហាញពីគំរូទៅកាន់ពិភពលោករួចទៅហើយពាក់ព័ន្ធការចាត់វិធានការទៅលើប្រធានាធិបតីបីរូបកន្លងមកដែលបានបំពាននឹងអំណាចតាមរយៈការបណ្តេញចេញតំណែង ដែលក្នុងនោះរួមមានអតីតប្រធានាធិបតី Macapagal-Arroyo, Joseph Estrada និង Ferdinand Marcos។
គួរជម្រាបផងដែរថា ហ្វីលីពីន គឺជាដ៏រដ្ឋកម្រមួយរបស់អាស៊ាន ដែលបានចូលរួមជាភាគី ឬសមាជិកនៃលក្ខន្តិកៈក្រុងរ៉ូមនៃតុលាការព្រហ្មទណ្ឌអន្តរជាតិនៅក្នុងឆ្នាំ២០១១។ បច្ចុប្បន្ន មានរដ្ឋពីរប៉ុណ្ណោះរបស់អាស៊ានរួមមានកម្ពុជា និងម៉ាឡេស៊ី (ស្ថិតនៅក្នុងដំណាក់រង់ចាំនៃការចូលជាធរមានជាសមាជិក) ដែលជាភាគីនៃលក្ខន្តិកៈក្រុងរ៉ូម។
ក៏ប៉ុន្តែប្រាំបីឆ្នាំក្រោយមក ពោលគឺនៅពេលហ្វីលីពីនស្ថិតក្រោមការដឹកនាំរបស់រដ្ឋបាលលោកប្រធានា ធិបតី រ៉ូឌ្រីហ្គោ ឌូទើតេ ហ្វីលីពីន បានសម្រេចដើរចេញពីតុលាការនេះវិញ បន្ទាប់ពីរដ្ឋអាជ្ញារបស់តុលាការប្រកាសចាប់ផ្តើមវាយតម្លៃបឋមលើស្ថានភាពនៃយុទ្ធនាការគ្រឿងញៀនរបស់លោកប្រធានាធិបតី ថាតើអាចធ្លាក់ក្នុងបទឧក្រិដ្ឋ ដូចមានចែងក្នុងលក្ខន្តិកៈឬយ៉ាងណា។
ជាមួយនឹងការចាកចេញរបស់ហ្វីលីពីននេះដែរ រដ្ឋអាជ្ញារបស់តុលាការព្រហ្មទណ្ឌអន្តរជាតិ ក៏បានថ្លែងបញ្ជាក់ជាថ្មីដូចគ្នាផងដែរថា ទោះបីជាហ្វីលីពីន បានបញ្ចប់សមាជិកពីតុលាការជាផ្លូវការហើយក្តី បណ្តឹងនៃសំណុំរឿងមិនបញ្ចប់ជាមួយឡើយ។ ពោលគឺតុលាការនៅតែបន្តនីតិវិធីដើម្បីពិនិត្យទៅលើយុទ្ធនាការបង្ក្រាបគ្រឿងញៀនរបស់លោក ឌូទើតេ ដែលរបាយការណ៍សិទ្ធិមនុស្សអះអាងថា សម្លាប់មនុស្សជាច្រើនពាក់ព័ន្ធហើយនោះ៕
Tag:
ហ្វីលីពីន
ICC
© រក្សាសិទ្ធិដោយ thmeythmey.com
