អន្តរជាតិ
បោះឆ្នោតថៃ៖ បក្សភឿថៃ និងបក្សកម្លាំងប្រជារាស្ត្រ អន្ទងបក្សផ្សេងដើម្បីបង្កើតរដ្ឋាភិបាលចម្រុះ
រូបភាព The Nation
×![]()
ដោយ: តន ចាន់រិទ្ធារ៉ា
ទោះមានត្រឹមលទ្ធផលមិនផ្លូវការ បក្សភឿថៃ និងបក្សកម្លាំងប្រជារាស្ត្រសុទ្ធតែអះអាងពីជ័យជម្នះរបស់ខ្លួនក្នុងការបោះឆ្នោតថ្ងៃទី២៤ ខែមីនា។ បក្សទាំងពីរនេះ កំពុងស្វះស្វែងរកការគាំទ្រពីបក្សផ្សេងទៀតដែលទទួលបានអាសនៈដើម្បីឈានទៅបង្កើតរដ្ឋាភិបាលចម្រុះ។ បក្សប្រជាធិបតេយ្យដែលទទួលលទ្ធផលខុសការរំពឹងទុក ប្រកាសជាស្រេចថា មិនចូលរួមជាមួយបក្សភឿថៃឡើយ ខណៈបក្សភូមិចៃថៃ ដែលទទួលបានលទ្ធផលអាសនៈលំដាប់ទីបី អាចជាកូនសោរសំខាន់។
លទ្ធផលបោះឆ្នោតលើកដំបូងនៅក្រោយរដ្ឋប្រហារឆ្នាំ ២០១៤ បង្កការភ្ញាក់ផ្អើលយ៉ាងខ្លាំង។ បក្សកម្លាំងប្រជារាស្ត្រដែលគាំទ្រលោក ប្រាយុទ្ធ ចន្ទអូចា ទទួលបានសំឡេងគាំទ្រច្រើនហួសការស្មាន ឯបក្សភឿថៃ ដែលស្និទ្ធអតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ បែរជាមិនអាចទទួលគាំទ្រច្រើនលើសលប់ដូចមុនទៅវិញ។ បក្សប្រជាធិបតេយ្យរបស់អតីតនាយករដ្ឋមន្ត្រី អាប់ភីស៊ីត វIចាជីវ៉ា ស្ថិតនៅលេខរៀងទីប្រាំឯណោះ។
ទាំងបក្សភឿថៃ ទាំងបក្សកម្លាំងប្រជារាស្ត្រសុទ្ធតែបានការគាំទ្រច្រើនដូចគ្នា។ វាជារឿងខុសការរំពឹងទុកដែលបក្សកម្លាំងប្រជារាស្ត្រទើបបង្កើតថ្មី អាចទទួលសំឡេងគាំទ្រច្រើនបែបនេះ។ តាមលទ្ធផលមិនផ្លូវការ បក្សនេះទទួលបានសំឡេងគាំទ្រចំនួន ៧,៩លាននាក់ ខណៈបក្សភឿថៃទទួលបាន៧,៤លាននាក់។ ប៉ុន្តែបើគិតពីចំនួនកៅអីវិញ បក្សកម្លាំងប្រជារាស្ត្រទទួលបានសរុបចំនួន១១៨ ហើយបក្សភឿថៃទទួលបាន១៣៧កៅអីសភា។
អគ្គលេខាធិការបក្សកម្លាំងប្រជារាស្ត្រ Sontirat Sontijirawong និយាយថា បក្សរបស់លោកមានសិទ្ធិបង្កើតរដ្ឋាភិបាលបាន ព្រោះទទួលបានសំឡេងគាំទ្រច្រើនជាបក្សផ្សេងទៀត។ បក្សគាំទ្ររបបយោធានេះ បានទាក់ទងជាមួយដែលទទួលបានសំឡេងឆ្នោត ដើម្បីបង្កើតរដ្ឋាភិបាលចម្រុះ។ លោក Sontirat អះអាងថា បក្សលោកបានចរចាជាមួយបក្សភូមិចៃថៃដែលទទួលបានកៅអីចំនួន៥២ និងបក្សផ្សេងទៀត។
ដោយឡែក បក្សភឿថៃវិញ ក៏បានទាក់ទងជាមួយបក្សដទៃទៀតដែលមានគោលដៅដូចគ្នា គឺទប់ស្កាត់ការបន្តអំណាចរបស់លោក ប្រាយុទ្ធ ។ បក្សនេះលើកឡើងថា ខ្លួនមានសិទ្ធិបង្កើតរដ្ឋាភិបាលព្រោះមានអាសននៅសភាច្រើនជាងគេ។ បក្សភឿថៃនឹងប្រមូលបក្សប្រាំទៀតដែលឈ្នះកៅអីសភាដូចជាបក្សអនាគតឈានមុខ បក្សសេដ្ឋកិច្ចថ្មី បក្សដើម្បីជាតិ បក្សថៃសេរី និងបក្សប្រជាជាតិ។ សំឡេងនៅសភារបស់បក្សទាំង៦ គឺគ្រប់គ្រាន់ដើម្បីបង្កើតរដ្ឋាភិបាល។
យ៉ាងណាមិញ សម្ព័ន្ធភាពរបស់បក្សភឿថៃ នៅខ្វះសំឡេងច្រើនដើម្បីស្នើបេក្ខភាពនាយករដ្ឋមន្ត្រី។ តាមច្បាប់ថៃ ដើម្បីបង្កើតរដ្ឋាភិបាល បក្សនីមួយៗត្រូវមានសំឡេងយ៉ាងតិច២៥១ នៃអាសនៈសរុប៥០០ ហើយដើម្បីក្លាយជានាយករដ្ឋមន្ត្រី ត្រូវបានគាំទ្រយ៉ាងតិច៣៧៦ នៃសមាជិករដ្ឋសភានិងព្រឹទ្ធសភាដែលមាន៧៥០។ យោងតាមការគន់គូរបែបនេះ សម្ព័ន្ធភាពដឹកនាំដោយបក្សភឿថៃ អាចប្រឈមមុខបញ្ហា ហើយត្រូវប្រមូលសំឡេងឲ្យច្រើនតាមតែអាចធ្វើបាន។
បក្សភូមិចៃថៃ ដែលមាននិន្នាការកណ្ដាលនោះ និងបក្សប្រជាធិបតេយ្យ កំពុងស្ថិតក្នុងចំណាប់អារម្មណ៍របស់ក្រុមទាំងពីរ។ អាសនរបស់បក្សទាំងពីរមានចំនួន១០២ ដែលអាចកត្តាកាត់ក្ដីក្នុងការប្រជែងបង្កើតរដ្ឋាភិបាលថ្មី។ ប៉ុន្តែគេមិនទាន់ដឹងជំហរច្បាស់របស់បក្សប្រជាធិបតេយ្យឡើយ ព្រោះបក្សនេះប្រឆាំងរបបដឹកនាំយោធា តែក៏មិនចូលរួមជាមួយបក្សភឿថៃដែរ។
រឿងដែលត្រូវពិចារណាមួយទៀត គឺស្ថិរភាពរដ្ឋាភិបាលចម្រុះ។ បង្កើតរដ្ឋាភិបាលបក្ស៦ អាចជារឿងឈឺក្បាលសម្រាប់បក្សភឿថៃ ខណៈបក្សកម្លាំងប្រជារាស្ត្រងាយស្រួលជាងបន្តិច។ ម្យ៉ាងបើលោក ប្រាយុទ្ធ អាចធ្វើជានាយករដ្ឋមន្ត្រី រដ្ឋាភិបាលរបស់ក៏ត្រូវប្រឈមមុខបសម្ព័ន្ធភាពក្រុមប្រឆាំងក្នុងសភាដែលមានសំឡេងច្រើនជាង ព្រោះក្រោយការបង្កើតរដ្ឋាភិបាលបានហើយ សមាជិកព្រឹទ្ធសភាលែងអាចលូកដៃបានទៀតហើយ៕
Tag:
ថៃ
បក្សភឿថៃ
បក្សកម្លាំងប្រជារាស្ត្រ
© រក្សាសិទ្ធិដោយ thmeythmey.com
