ជាតិ
សម្ដេច ហ៊ុន សែន៖ «ខ្ញុំគិតថា ដល់ពេលវេលាអប់រំគុណធម៌ដល់កងកម្លាំងប្រដាប់អាវុធ និងមន្ត្រីរាជការ»
× ភ្នំពេញ៖ ក្រៅពីសិស្ស និស្សិត ដែលត្រូវការពង្រឹងផ្នែកគុណធម៌ និងសីលធម៌នោះ មន្ត្រីរាជការ និងកងកម្លាំងប្រដាប់អាវុធ ក៏ត្រូវយកអប់រំចំណុចនេះដែរ។ នេះជាការលើកឡើងរបស់ប្រមុខរដ្ឋាភិបាល។
សម្ដេចនាយករដ្ឋមន្ត្រី ហ៊ុន សែន បានសង្កត់ធ្ងន់ថា បញ្ហាគុណធម៌ និងសីលធម៌ គឺជារឿងសំខាន់មួយ ដែលត្រូវយកចិត្តទុកដាក់ពង្រឹងលើការអប់រំ ដើម្បីលើកកម្ពស់ការគោរព និងឲ្យតម្លៃសិទ្ធិក្នុងការរស់នៅក្នុងសង្គម។ មូលហេតុដែលសម្ដេច ហ៊ុន សែន លើកឡើងបែបនេះ បន្ទាប់ពីមានករណីកូនអ្នកមានអំណាចប្រើប្រាស់បុណ្យស័ក្តិឪពុកខ្លួន ដោយយកកាំភ្លើងប្រព្រឹត្តិអំពើហិង្សា និងបាញ់សម្លាប់អ្នកដទៃ ក្រោមហេតុផលផ្សេងៗ។ ទង្វើបែបនេះ ត្រូវបានសម្ដេច ហ៊ុន សែន ចាត់ទុកជាសកម្មភាពខ្វះការអប់រំ គ្មានគុណធម៌ និងសីលធម៌ក្នុងខ្លួនឡើយ ដែលទាមទារឲ្យមានការកែតម្រូវជាបន្ទាន់។
សូមស្តាប់សំឡេង៖
ថ្លែងក្នុងពិធីចែកសញ្ញាបត្រដល់គរុសិស្ស គរុនិស្សិត នៅព្រឹកថ្ងៃទី ២៧ មីនានេះ លោកនាយករដ្ឋមន្ត្រី បាននិយាយដូច្នេះថា៖«ឥឡូវខ្ញុំគិតថា វាដល់ពេលវេលាមិនមែនគ្រាន់តែអប់រំ(គុណធម៌)ត្រឹមតែកូនសិស្សទេ ផ្ទៃក្នុងកងកម្លាំងប្រដាប់អាវុធ និងមន្ត្រីរាជការក៏ត្រូវតែធ្វើដែរ។ គ្រាន់តែ២ ទៅ៣ថ្ងៃសោះ កើតមិនដឹងប៉ុន្មានរឿងទេ។ ប៉ុន្តែជាការល្អហើយ ដែលមេបេអឹមខេត្តក្រចេះនោះ បានឲ្យកូនចេញមកទទួលទោសកំហុសក្នុងពេលយកអាវុធទៅភ្ជង់គូរជម្លោះ ហើយនៅករណីបាញ់សម្លាប់ ដែលចោទទុកគេថាចោរនោះ ក៏ត្រូវបានឪពុកលើកទឹកចិត្តឲ្យមកសារភាពទាំងអស់។ ប៉ុន្តែបទល្មើសនៅតែមាន វាបណ្ដាលមកពីអី គឺមកពីក្នុងខ្លួនអត់មានគុណធម៌»។
ក្រៅពីករណីអំពើហិង្សា និងប្រើប្រាស់អំណាចខុសច្បាប់នេះ សម្ដេច ហ៊ុន សែន ក៏លើកយកបញ្ហាគ្រោះថ្នាក់ចរាចរណ៍មកនិយាយថា ការបង្កហេតុនេះ ក៏កើតចេញពីការខ្វះសីលធម៌ និងគុណធម៌ក្នុងការគោរពច្បាប់ចរាចរណ៍ និងគោរពសិទ្ធិអ្នកដទៃក្នុងពេលបើកបរ ទើបបង្កឲ្យមានគ្រោះថ្នាក់កើតឡើងនេះ៕
Tag:
ហ៊ុន សែន
គុណធម៌
សីលធម៌
© រក្សាសិទ្ធិដោយ thmeythmey.com