អន្តរជាតិ
ព្រុយណេ នឹងអនុវត្តច្បាប់ឥស្លាមដ៏តឹងរ៉ឹង ស៊ុលតង់ព្រុយណេ Hassanal Bolkiah (រូបភាព AFP)
× រាជាណាចក្រព្រុយណេ នឹងចាប់ផ្ដើមអនុវត្តច្បាប់ព្រហ្មទណ្ឌរបស់ខ្លួននៅសប្ដាហ៍ក្រោយ ដែលដើរតាមការកំណត់របស់ច្បាប់សាសនាឥស្លាម Sharia ។ បទល្មើសដែលផ្ទុយពីបញ្ញត្តិសាសនាឥស្លាមមាន សហាយស្មន់ និងការរួមភេទដូចគ្នា នឹងត្រូវដាក់ទោសប្រហារជីវិត ឯទោសស្រាលដូចជាការលួច នឹងត្រូវដាក់ទោសត្រឹមការកាត់ដៃជើង។ ក្រុមការពារសិទ្ធិមនុស្ស បានរិះគន់យ៉ាងខ្លាំងចំពោះគម្រោងអនុវត្តច្បាប់ដ៏តឹងរ៉ឹងបែបនេះ។
បន្ទាប់ពីផ្អាកការអនុវត្តជាងបួនឆ្នាំមក ព្រុយណេនឹងអនុវត្តក្រមព្រហ្មទណ្ឌរបស់ខ្លួនដែលរងការរិះគន់ខ្លាំងនាពេលកន្លងមក ចាប់ពីថ្ងៃទី៣ ខែមេសាតទៅ។ ដោយសារច្បាប់នេះអនុវត្តច្បាប់សាសនាឥស្លាមដ៏តឹងរ៉ឹង គឺ Sharia អង្គការការពារសិទ្ធិមនុស្សជាច្រើនបានស្នើឲ្យរាជាណាចក្រដ៏តូចមួយនេះ បញ្ឈប់ការអនុវត្តជាបន្ទាន់ ដ្បិតការទោសមានលក្ខណៈឃោរឃៅខ្លាំង បើប្រៀបធៀបទៅនឹងម៉ាឡេស៊ី និងឥណ្ឌូណេស៊ីជាកាន់សាសនាឥស្លាមដូចគ្នា។
ក្រោមច្បាប់ថ្មីដែលប្រកាសតាំងពីឆ្នាំ២០១៤ បុគ្គលដែលរកឃើញថា បានរួមភេទជាមួយភេទដូចគ្នា និងប្រព្រឹត្តអំពើសហាស្មន់ នឹងត្រូវគប់ដុំថ្មរហូតដល់ស្លាប់។ ការស្រឡាញ់ភេទដូចគ្នា ជាអំពើខុសច្បាប់រួចស្រេចទៅហើយក្នុងប្រទេសកាន់សាសនាឥស្លាមដ៏អភិរក្សមួយនេះ ប៉ុន្តែច្បាប់ដែលត្រូវអនុវត្តនេះ ប្រែក្លាយទោសនេះជាទៅជាករណីប្រហារជីវិតតែម្ដង។ យ៉ាងណា ការអនុវត្តធ្វើលើបុគ្គលកាន់ស្លាមឥស្លាមប៉ុណ្ណោះ។
បើតាមទីភ្នាក់ងារព័ត៌មាន AFP ការដាក់ទោសសម្លាប់ករណីលួច គឺកាត់ដៃស្ដាំចោលសម្រាប់កំហុសលើកទីមួយ ហើយបើមិនរាងចាល នឹងកាត់ជើងឆ្វេងមួយទៀតសម្រាប់កំហុសលើកទីពីរ។
មន្ត្រីអង្គការឃ្លាំមើលសិទ្ធិមនុស្ស (HRW) លោក Phil Robertson និយាយថា ការអនុវត្តទោសធ្ងន់ធ្ងរបែបនេះ នឹងប៉ះពាល់ដល់ស្ថានភាពសិទ្ធិមនុស្សក្នុងប្រទេសក្រោមក្រសែភ្នែកអ្នកវិនិយោគទុន ភ្ញៀវទេសចរ និងទីភ្នាក់ងារអន្តរជាតិនានា។ លោកបន្តថា ប្រសិនបើព្រុយណេជម្នះបន្តអនុវត្តតាមផែនការរបស់ខ្លួន ពិភពលោកទាំងមូលនឹងធ្វើពហិការព្រុយណេមិនខាន ហើយព្រុយណេនឹងក្លាយជារដ្ឋអាស៊ីអាគ្នេយ៍តែមួយគត់ដែលដាក់ទោសរបៀបនេះ។
អ្នកនាំពាក្យក្រសួងកិច្ចការសាសនាព្រុយណេ នៅថ្ងៃទី២៧ ខែមីនា និយាយថា មានតែស៊ុលតង់ហាសាណាល់ ប៊ុលគៀ ដែលនឹងប្រកាសពីកាលបរិច្ឆេទនៃការអនុវត្តនៅថ្ងៃទី៣ ខែមេសា។ យ៉ាងណាមកទល់ពេលនេះ ការត្រៀមខ្លួនដើម្បីអនុវត្តក្រមថ្មីនេះ គឺផ្តោតលើការកាត់ដៃក្នុងករណីលួចសិន។
ព្រុយណេដែលមានបានដោយសារធនធានប្រេង បានអនុវត្តច្បាប់ឥស្លាមដ៏តឹងរ៉ឹងកាន់តែខ្លាំងក្នុងរយៈពេលប៉ុន្មានឆ្នាំមកនេះ។ ក្នុងឆ្នាំ២០១៥ ព្រុយណេមិនមានឲ្យការប្រារព្ធបុណ្យ Chritmas របស់សាសនាគ្រិស្តខ្លាំងក្លាឡើយ ព្រោះបារម្ភថា ធ្វើឲ្យប៉ះពាល់ដល់សាសនាឥស្លាមរបស់ប្រទេស៕
© រក្សាសិទ្ធិដោយ thmeythmey.com