ជាតិ
លោក ពេជ្រ ស្រស់ ប្ដឹង លោក ផែង វណ្ណៈ ទៅ ACU លើករណីយកថវិកាពីគ្រួសារជនបង្កទៅគ្រួសាររងគ្រោះ
× ភ្នំពេញ៖ ក្រោយផ្ទុះពាក្យសម្តីឌឺដងដាក់គ្នាតាមបណ្ដាញសង្គមហ្វេសប៊ុកនោះ លោក ពេជ្រ ស្រស់ សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ បានដាក់ពាក្យបណ្ដឹងទៅអង្គភាពប្រឆាំងអំពើពុករលួយ ដើម្បីឲ្យស៊ើបអង្កេតលើលោក ផែង វណ្ណៈ អតីតមន្ត្រីជាន់ខ្ពស់ក្រសួងមហាផ្ទៃ លើករណីយកថវិកា៥០០០ដុល្លារ ទៅជូនគ្រួសារសពកញ្ញា ឌុំ រីដា។
លិខិតដែលលោក ពេជ្រ ស្រស់ ដាក់ស្នើទៅអង្គភាពប្រឆាំងអំពើរលួយនោះ បើកការស៊ើបអង្កេតលើលោក ផែង វណ្ណៈ នេះ ក្រោមហេតុផលសង្ស័យថា បុគ្គលរូបនេះ មានការជាប់ពាក់ព័ន្ធជាមួយនឹងជនបង្កហេតុគ្រោះថ្នាក់ចរាចរណ៍លើកញ្ញា ឌុំ រីដា ដែលអាចមានការប្រព្រឹត្តអំពើពុករលួយជាប្រព័ន្ធ ជាមួយជនបង្ក។
ក្នុងន័យនេះប្រធានគណបក្សយុវជនកម្ពុជារូបនេះ បានសង្កត់ធ្ងន់ដូច្នេះថា៖«បើតាមពិនិត្យផ្លូវច្បាប់បុគ្គល ផែង វណ្ណៈ មិនមែនជាមេធាវី ឬក្រុមបម្រើសេវាកម្មផ្លូវច្បាប់ ដែលអាចជាតំណាងឲ្យក្រុមណាមួយទេ ។ ប៉ុន្តែមានរឿងគួរឲ្យភ្ញាក់ផ្អើលកើតឡើង គឺនៅថ្ងៃទី២៧ មីនា ស្រាប់តែឃើញបុគ្គល ផែង វណ្ណៈ នេះប្រកាសខ្លួនថា ជាអ្នកតំណាងឲ្យក្រុមបង្កគ្រោះថ្នាក់ចរាចរណ៍លើសពនិស្សិត ឌុំ រីដា ស្របពេលសមត្ថកិច្ចមិនទាន់ចាប់បានជនបង្កមកផ្តន្ទាទោសតាមផ្លូវច្បាប់នៅឡើយទេ ។ ហើយអ្វីដែលគួរឲ្យសង្ស័យបំផុតនោះ គឺថាកើតមានក្តីព្រួយបារម្ភខ្លាច មានការឃុបឃិតប្រព្រឹត្តអំពើពុករលួយជាប្រព័ន្ធ ដើម្បីសម្របសម្រួលបន្ធូបន្ថយបទចោទប្រកាន់ណាមួយ តាមរយៈការយកលុយទៅលោងលោម ឬបញ្ចុះបញ្ចូលក្រុមគ្រួសារជនរងគ្រោះតាមរយៈបុគ្គល ផែង វណ្ណៈ»។
ដោយសារបញ្ហានេះហើយទើប សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ ដែលមានឋានៈស្មើទេសរដ្ឋមន្ត្រីរូបនេះ ដាក់ពាក្យប្ដឹងទៅអង្គភាពប្រឆាំងអំពើពុករលួយ ដោយអះអាងថា ពាក្យបណ្ដឹងខ្លួននេះ គឺមានគោលបំណងទប់ស្កាត់ និងលុបបំបាត់អំពើពុករលួយ ហើយចង់រកយុត្តិធម៌ជូនគ្រួសារសពកញ្ញា ឌុំ រីដា ក្នុងករណីគ្រោះថ្នាក់ចរាចរណ៍នេះ។ ជាពិសេសគឺការលុបបំបាត់នូវវប្បធម៌អន្តរាគមន៍ខុសច្បាប់ ឬបុកគេស្លាប់ហើយ យកលុយទៅលួងលោមគ្រួសារជនរងគ្រោះជាដើម។
ទាក់ទងនឹងពាក្យបណ្ដឹងនេះ លោក ផែង វណ្ណៈ អតីតមន្ត្រីជាន់ខ្ពស់ក្រសួងមហាផ្ទៃ ហាក់គ្មានភាពតក់ស្លុតអ្វីឡើយ។ មុនពេលលោក ពេជ្រ ស្រស់ ប្ដឹងមួយថ្ងៃនេះ លោក ផែង វណ្ណៈ បានចេញផ្សាយវីដេអូតាមរយៈបណ្ដាញសង្គមហ្វេសប៊ុក កាលពីយប់ថ្ងៃទី២៧ មីនា ដោយពន្យុះឲ្យប្រធានគណបក្សយុវជនកម្ពុជារូបនេះ ដាក់ពាក្យប្ដឹងលោកទៀតផង។ មូលហេតុលោក ផែង វណ្ណៈ ដែលជាអ្នកមានភាពលេចធ្លោរក្នុងបណ្ដាញសង្គមរូបនេះ ផ្គើនលោក ពេជ្រ ស្រស់ នោះ ដោយលោកអះអាងថា ខ្លួនមិនបានប្រព្រឹត្តទង្វើអ្វីមួយខុសឡើយ ហើយលោក ពេជ្រ ស្រស់ ក៏គ្មានភស្តុតាងអ្វីដែលអាចចោទប្រកាន់ខ្លួនដែរ៕
Tag:
ពេជ្រ ស្រស់
ផែង វណ្ណៈ
ACU
អំពើពុករលួយ
© រក្សាសិទ្ធិដោយ thmeythmey.com