អន្តរជាតិ
នៅតៃវ៉ាន់ បើកបរក្នុងពេលស្រវឹងហើយបង្កគ្រោះថ្នាក់ដល់ជីវិត អាចជាប់ទោសប្រហារជីវិត
រូបភាព៖ សារព័ត៌មាន Independent
×![]()
តៃវ៉ាន់ គ្រោងបន្ថែមទោសប្រហារជីវិតលើមនុស្សដែលបង្កគ្រោះថ្នាក់ចរាចរណ៍ធ្ងន់ធ្ងរ ដែលឈានដល់មានមនុស្សស្លាប់ ខណៈបើកបរដោយមានផ្ទុកជាតិស្រវឹង។ គម្រោងនេះ ធ្វើឡើងក្រោយតួលេខនៃអ្នកស្លាប់ដោយគ្រោះថ្នាក់ចរាចរណ៍កើនឡើងជាលំដាប់ ដែលបង្កជាការព្រួយបារម្ភដល់មនុស្សទូទៅ។
នៅថ្ងៃ២៨ ខែមីនា គណៈរដ្ឋមន្ត្រីតៃវ៉ាន់ បានអនុម័តសេចក្តីព្រាងវិសោធណកម្មមួយលើក្រមព្រហ្មទណ្ឌ ដែលនឹងដាក់បញ្ចូល ការបង្កឲ្យមនុស្សស្លាប់ដោយសារការបើកបរនៅពេលស្រវឹង ទៅជា «បទល្មើសមនុស្សឃាត» ។ ក្នុងករណីធ្ងន់ធ្ងរ ទោសប្រហារជីវិតនឹងត្រូវអនុវត្ត ប្រសិនបើរកឃើញថា សកម្មភាពនោះត្រូវចាត់ទុកថា បង្កឡើងដោយចេតនា។
សំណើនេះ នឹងត្រូវបញ្ជូនទៅកាន់សភាតៃវ៉ាន់ ដើម្បីត្រួតពិនិត្យ និងអនុម័ត។ យោងតាមការចុះផ្សាយរបស់ទីភ្នាក់ងារព័ត៌មាន AFP ក្រសួងយុត្តិធម៌តៃវ៉ាន់ បានឲ្យដឹងថា ករណីនៃការបើកបរខណៈមានផ្ទុកជាតិស្រវឹង ហើយបង្កគ្រោះថ្នាក់ដល់ស្លាប់ មានចំនួនច្រើន និងពុំត្រូវបានគេយកចិត្តទុកដាក់។
ក្នុងសេចក្តីថ្លែងការណ៍ដដែល ក្រសួងយុត្តិធម៌តៃវ៉ាន់បន្តថា មនុស្សដែលបើកបរខណៈមានផ្ទុកជាតិស្រវឹងក្នុងខ្លួន មានការធ្វេសប្រហែស និងបង្កជាគ្រោះថ្នាក់ចរាចរណ៍ ដែលឆក់យកជីវិតមនុស្ស និងបំផ្លាញគ្រួសារអ្នកដទៃ។ ចុងក្រោយបន្សល់ត្រឹមតែវិប្បដិសារី ដែលពុំអាចជួសជុលបាន។
កាលពីខែមករាកន្លងទៅ ករណីគ្រោះថ្នាក់ចរាចរណ៍ដ៏អាក្រក់មួយបានកើតឡើងនៅតៃវ៉ាន់។ បុរសវ័យ៤០ឆ្នាំម្នាក់ដែលកំពុងបើកបរដោយមានជាតិស្រវឹង បានបើករថយន្តទៅបុករថយន្តតាក់ស៊ីមួយគ្រឿងទៀត ។ ក្នុងហេតុការណ៍នេះ មនុស្ស៣នាក់បានស្លាប់ និង៣នាក់រងរបួស ក្នុងនោះក៏មានបុរសជាជនបង្កផងដែរ។
ជុំវិញរឿងនេះ ក្រុមសិទ្ធិមនុស្សមួយចំនួន រួមមាន សមាគមតៃវ៉ាន់ដើម្បីសិទ្ធិមនុស្ស បានចេញសេចក្តីថ្លែងការណ៍រួមគ្នាមួយ ដោយរិះគន់លើវិសោធណកម្មថ្មីនេះ និងស្នើឲ្យមានការពិចារណាឲ្យច្បាស់លាស់បន្ថែមទៀត។ បើតាមសារព័ត៌មាន AFP សេចក្តីថ្លែងការណ៍រួមនេះ គូសបញ្ជាក់បែបនេះ៖ «យើងឃើញមានកង្វះខាតផ្នែកភស្តុតាង និងការស្រាវជ្រាវ ដែលចង់ឲ្យមានទោសប្រហារជីវិតលើអ្នកបើកបរមានផ្ទុកជាតិស្រវឹង។ ហើយច្បាប់ថ្មីនេះ ក៏មិនប្រាកដថា នឹងអាចការពារទង្វើបែបនេះផងដែរ»។
សូមបញ្ជាក់ថា បច្ចុប្បន្ននេះ នៅតៃវ៉ាន់ ទោសធ្ងន់បំផុតសម្រាប់ករណីបង្កឲ្យមនុស្សស្លាប់ពេលបើកបរដោយមានផ្ទុកជាតិស្រវឹង គឺការជាប់ពន្ធនាគារចំនួន១០ឆ្នាំ។ ម្យ៉ាងវិញទៀត តៃវ៉ាន់ បានសម្រចអនុវត្តឡើងវិញនូវទោសប្រហារជីវិតកាលពីឆ្នាំ២០១០ ក្រោយពីផ្អាករយៈពេល៥ឆ្នាំ ទោះបីជាមានការស្នើពីក្រុមសិទ្ធិមនុស្សទាំងក្នុងស្រុក និងបរទេសឲ្យលុបចោលក៏ដោយក្តី។
ការស្ទង់មតិមួយចំនួននាប៉ុន្មានឆ្នាំចុងក្រោយនេះ បង្ហាញថា ប្រជាជនតៃវ៉ាន់ភាគច្រើនគាំទ្រឲ្យរក្សាទុកទោសប្រហារជីវិត។ ទោសប្រហារនេះ ក៏ត្រូវបានអនុវត្តផងដែរកាលពីថ្មីៗនេះ។ ជាក់ស្តែង អាជ្ញាធរតៃវ៉ាន់ បានដាក់ទោសប្រហារជីវិតលើបុរសម្នាក់ ដែលបានសម្លាប់អតីតប្រពន្ធ និងកូនស្រីរបស់ខ្លួនកាលលពីខែកញ្ញាឆ្នាំ២០១៨។ ហើយការដាក់ប្រហារជីវិតនេះ ត្រូវបានធ្វើឡើងក្រោមអាណត្តិរបស់ប្រធានាធិបតីតៃវ៉ាន់ លោកស្រី Tsai Ing-wen ដែលចូលកាន់អំណាចកាលពីឆ្នាំ២០១៦មក៕
Tag:
តៃវ៉ាន់
ចរាចរណ៍
ច្បាប់
© រក្សាសិទ្ធិដោយ thmeythmey.com
