ជាតិ
សេដ្ឋកិច្ច
កម្ពុជាអនុម័តគម្រោងវិនិយោគ៧៣ ក្នុងទឹកប្រាក់ជាង២ពាន់លានដុល្លារដើមឆ្នាំ២០១៩
លោក អូន ព័ន្ធមុនីរ័ត្ឋ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ថ្លែងក្នុងវេទិការាជរដ្ឋាភិបាល-ផ្នែកឯកជនលើកទី១៨ នៅវិមានសន្តិភាព រាជធានីភ្នំពេញ ថ្ងៃទី២៩មីនា
×![]()
ភ្នំពេញ៖ រយៈពេល២ខែ ដើមឆ្នាំ២០១៩ កម្ពុជាបានអនុម័តការវិនិយោគចំនួន៧៣គម្រោង ដែលមានទំហំទឹកប្រាក់ប្រមាណ២,២ពាន់លានដុល្លារ។ គម្រោងភាគច្រើនជាការបង្កើតរោងចក្រផលិតកាបូប និងកាត់ដេរសម្លៀកបំពាក់។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងក្នុងវេទិការាជរដ្ឋាភិបាល-ផ្នែកឯកជនលើកទី១៨ នៅថ្ងៃទី២៩មីនា ថា គម្រោងដែលកម្ពុជាទទួលបានរយៈពេល២ខែដើមឆ្នាំ២០១៩នេះ មានការកើនឡើងច្រើន បើធៀបទៅនឹងរយៈពេលដូចគ្នា ក្នុងឆ្នាំ២០១៨ ដែលមាន៣៩គម្រោង ហើយមានទុនវិនិយោគត្រឹម៣២៧លានដុលា្លរ។
បើតាមលោក អូន ព័ន្ធមុនីរ័ត្ន ក្នុងរយៈពេល៥ឆ្នាំ ចាប់ពីឆ្នាំ២០១៤-២០១៨ កម្ពុជាទទួលបានគម្រោងវិនិយោគចំនួន៩៥៩គម្រោង ជាមួយនឹងទំហំទឹកប្រាក់ ជាង២៣ពាន់លានដុល្លារ។ គម្រោងវិនិយោគទាំងនេះ បានបង្កើតការងារជាង១លានកន្លែង ដល់ប្រជាពលរដ្ឋក្នុងប្រទេស។
គម្រោងវិនិយោគទាំងនោះមាន គម្រោងដំឡើងរថយន្តនិងម៉ូតូ, គម្រោងផលិតបង្គុំរថយន្ត, គ្រឿងអេឡិចត្រូនិច, គម្រោងផលិតថាមពលអគ្គិសនី ពីពន្លឺព្រះអាទិត្យនិងធ្យូងថ្ម, គម្រោងផលិតសម្ភារៈ និងបរិក្ខាពេទ្យ, គម្រោងឧស្សាហកម្មដែលកែច្នៃផលិតផលពីវិស័យកសិកម្ម និងគម្រោងបង្កើតមជ្ឈមណ្ឌលពាណិជ្ជកម្ម និងផ្សារទំនើបជាដើម។ នេះបើតាមលោក អូន ព័ន្ធមុនីរ័ត្ន៕
Tag:
វិនិយោគ
គម្រោង
© រក្សាសិទ្ធិដោយ thmeythmey.com
