អន្តរជាតិ
វៀតណាម គាំទ្រគម្រោងហាមប្រើម៉ូតូរបស់ទីក្រុងហាណូយដើម្បីបរិស្ថាន រូបថត៖ Vietnam Express
× ក្រសួងដឹកជញ្ជូនវៀតណាម គាំទ្រគម្រោងហាមប្រាមការប្រើប្រាសម៉ូតូរបស់អាជ្ញាធរក្រុងហាណូយ ដោយលើកឡើងថា បញ្ហាផ្សែងពុលនិងចរាចរណ៍របស់ទីក្រុងនេះ ទាមទារដំណោះស្រាយបែបនេះ។
នៅថ្ងៃទី២៨ ខែមីនា អនុរដ្ឋមន្ត្រីក្រសួងដឹកជញ្ជូនវៀតណាម លោក Nguyen Ngoc Dong គូសបញ្ជាក់ថា គម្រោងរបស់រដ្ឋធានីហាណូយក្នុងការកំណត់ចំនួនការប្រើប្រាស់ម៉ូតូ គឺជាផ្នែកមួយនៃកិច្ចប្រឹងប្រែងរបស់រដ្ឋាភិបាលក្នុងការគ្រប់គ្រងបញ្ហាចរាចរណ៍។
បើតាមការចុះផ្សាយរបស់សារព័ត៌មាន Vietnam Express លោក Dong និយាយថា ទីក្រុងហាណូយកំពុងស្រាវជ្រាវ និងវិភាគលើគម្រោងនេះ ក្នុងគោលដៅធានាឲ្យបានថា ប្រជាពលរដ្ឋនឹងមានជម្រើសការដឹកជញ្ជូនសាធារណៈដ៏សមរម្យ ក្រោយពីការហាមប្រាមត្រូវអនុវត្ត។
ទន្ទឹមនឹងគ្នានេះ ប្រធាននាយកដ្ឋានទទួលបន្ទុកការដឹកជញ្ជូននៃក្រសួងដឹកជញ្ជូនវៀតណាម លោក Tran Bao Ngoc បានលើកឡើងថា ការហាមប្រាមម៉ូតូនេះ គឺជាដំណោះស្រាយដ៏ល្អមួយដើម្បីកាត់បន្ថយផ្សែងពុល និងបញ្ហាកកស្ទះចរាចរណ៍។ ក្នុងចំណោមបណ្តាប្រទេសក្នុងអង្គការតំបន់អាស៊ាន មីយ៉ាន់មា់បានអនុវត្តការហាមប្រាមបែបនេះក្នុងរដ្ឋធានីខ្លួន។
យ៉ាងណាមិញ ការហាមប្រាមនេះ ទាមទារឲ្យដើរស្របជាមួយនឹងការអភិវឌ្ឍការតភ្ជាប់និងការដឹកជញ្ជូនសាធារណៈរបស់ទីក្រុង និងផ្នែកផ្សេងៗទៀតនៃការដឹកជញ្ជូន រួមមាន ហេដ្ឋារចនាសម្ព័ន្ធក្នុងទីក្រុងជាដើម។ នេះបើតាមការបញ្ជាក់របស់លោក Ngoc ដោយបន្ថែមថា ទីតាំងចតយានជំនិះគួរតែត្រូវបង្កើតឡើងនៅក្បែរស្ថានីយ៍ឡានក្រុង និងរថភ្លើងក្រោមដី ដូច្នេះប្រជាជនអាចផ្លាស់ប្តូរមធ្យោបាយដឹកជញ្ជូនកាន់តែងាយស្រួល។
សូមបញ្ជាក់ ទីក្រុងហាណូយ កាលពីថ្មីៗនេះ បានពិនិត្យឡើងវិញគម្រោងមួយ ដែលខ្លួនបានអនុម័តកាលពីឆ្នាំ២០១៧កន្លងទៅ។ គម្រោងនោះ គឺហាមប្រាមម៉ូតូក្នុងសង្កាត់ចំនួន៥ ទីដែលកកស្ទះខ្លាំងបំផុត ត្រឹមឆ្នាំ២០៣០ និងរឹតត្បឹតលើចំនួនប្រើប្រាស់យានជំនិះទាំងអស់ក្នុងតំបន់មួយចំនួន ដែលមានបម្រើសេវាកម្មដឹកជញ្ជូនសាធារណៈល្អ។
រដ្ឋធានីហាណូយ ជាមួយប្រជាជនសរុបប្រមាណ ៧,៥លាននាក់ មានម៉ូតូប្រមាណ ៥,៦លានគ្រឿង និងរថយន្តប្រមាណ ៥៥ម៉ឺនគ្រឿង។ ក្រៅពីនេះ ម៉ូតូប្រមាណ ១,២គ្រឿង ត្រូវនាំយកមកពីកន្លែងផ្សេងៗទៀត។ នេះយោងតាមតួលេខពីសមត្ថកិច្ច៕
Tag:
វៀតណាម
ម៉ូតូ
បរិស្ថាន
© រក្សាសិទ្ធិដោយ thmeythmey.com