ជាតិ
សិស្សជាង៣ពាន់នាក់បានសិក្សានៅ«សាសារៀនជំនាន់ថ្មី» ក្នុងឆ្នាំ២០១៨-២០១៩
×![]()
ភ្នំពេញ៖ សិស្សចំនួន៣,១៣៧នាក់ បានសិក្សាក្នុងសាលារៀនជំនាន់ថ្មីទាំង៧កន្លែង នៅកម្ពុជា។ ចំនួននេះបានកើនឡើងជិត៩០០នាក់ បើធៀបទៅនឹងសិក្សាឆ្នាំ២០១៧-២០១៨។ សាលារៀនជំនាន់ថ្មី ជាសាលាដែលបានអនុវត្តន៍កម្មវិធីសិក្សាតាមបែបសិស្សចល័តទៅតាមបន្ទប់មុខវិជ្ជានីមួយៗ ដែលមានបន្ទប់ពិសោធន៍ បន្ទប់កុំព្យូទ័រ បណ្ណាល័យសតវត្សទី២១ ដោយផ្តោតសំខាន់លើមុខវិជា្ជវិទ្យាសាស្ត្រ បច្ចេកទេស វិស្វកម្ម និងគណិតវិទ្យា(STEM)។
យោងតាមរបាយការណ៍បូកសរុបលទ្ធផលការងាររបស់ក្រសួងអប់រំក្នុងទិសដៅសិក្សាឆ្នាំ២០១៨-២០១៩ សាលារៀនទាំង៧កន្លែងនោះមាននៅរាជធានីភ្នំពេញ៣កន្លែង គឺវិទ្យាល័យព្រះស៊ីសុវត្ថិ, វិទ្យាល័យព្រះយុគន្ធរ និងវិទ្យាល័យ ហ៊ុនសែន ព្រែកលៀប។ មាន២កន្លែងនៅខេត្តកំពង់ចាម គឺវិទ្យាល័យ ហ៊ុនសែន កំពង់ចាម, វិទ្យាល័យ ហ៊ុន សែន ពាមជីកង។ វិទ្យាល័យ សម្តេចអគ្គមហាធម្មពោធិសាល ជា ស៊ីម ព្រែកអញ្ចាញ ខេត្តកណ្តាល និងអនុវិទ្យាល័យ គោកព្រីង ខេត្តស្វាយរៀង។
សាលារៀនជំនាន់ថ្មី ត្រូវបានក្រសួងជ្រើសរើសជាសាលាអនុវត្ត សម្រាប់បណ្តុះបណ្តាលគ្រូ កែលម្អវិធីសាស្ត្របង្រៀន ការពង្រឹងការគ្រប់គ្រងសាលារៀន និងជាសាលារៀនគំរូ សម្រាប់គ្រឹះស្ថានសិក្សាផ្សេងៗទៀតរៀនសូត្រតាមគោលដៅអប់រំសិស្សានុសិស្សឱ្យមានវិជ្ជាសម្បទា បំណិនសម្បទា ចរិយាសម្បទា ជាពលរដ្ឋល្អ ដើម្បីឆ្លើយតបទៅនឹងតម្រូវការនៃការអភិវឌ្ឍសេដ្ឋកិច្ច-សង្គម ក្នុងសតវត្សទី២១។ ជាមួយគ្នានេះ ក្រសួងអប់រំមានគោលដៅនឹងបង្កើតសាលាគំរូ តាមបែបសាលារៀនជំនាន់ថ្មីឱ្យមាន១០០សាលា នាពេលខាងមុខ សម្រាប់ធ្វើបំណែកចែកកម្មវិធីសិក្សា ដើម្បីបំពេញគម្លាតសមត្ថភាព ននិងកែលម្អវិធីសាស្ត្របង្រៀនរបស់គ្រូ៕
Tag:
អប់រំ
សិស្ស
សាលារៀនជំនាន់ថ្មី
© រក្សាសិទ្ធិដោយ thmeythmey.com
