អន្តរជាតិ
សភាអង់គ្លេស បោះឆ្នោតប្រឆាំងកិច្ចព្រមព្រៀង Brexit ជាលើកទីបី
× ការចាកចេញរបស់ចក្រភពអង់គ្លេសពីសហភាពអឺរ៉ុបនៅតែរកពន្លឺមិនទាន់ឃើញនៅឡើយ។ សភាអង់គ្លេស នៅថ្ងៃទី២៩ ខែមីនា បានបោះឆ្នោតជំទាស់កិច្ចព្រមព្រៀងចាកចេញពីសហភាពអឺរ៉ុប ដែលជាការបោះឆ្នោតប្រឆាំងលើកទីបីហើយលើកិច្ចព្រមព្រៀងដែលស្នើដោយរដ្ឋាភិបាលនាយករដ្ឋមន្ត្រី ថេរ៉េសា ម៉េយ៍ ។ សហភាពអឺរ៉ុបឯណោះវិញ កំពុងខ្វាយខ្វល់ខ្លាំងពីរឿងនេះ ហើយត្រៀមជួបគ្នានៅខែមេសាខាងមុខដើម្បីរកផ្លូវចេញ។
សភាអង់គ្លេស នៅតែមិនពេញចិត្តកិច្ចព្រមព្រៀងចាកចេញពីសហភាពអឺរ៉ុប។ នាកិច្ចប្រជុំវិសាមញ្ញថ្ងៃទី២៩ ខែមីនា សមាជិកសភាអង់គ្លេសចំនួន៣៤៤ បានបោះឆ្នោតប្រឆាំងកិច្ចព្រមព្រៀងនេះ ខណៈសមាជិកចំនួន២៨៦ ទៀតគាំទ្រ។ នេះជាបរាជ័យលើកទីបីសម្រាប់រដ្ឋាភិបាលនាយករដ្ឋមន្ត្រី ថេរ៉េសា ម៉េយ៍ ដែលប្រឹងប្រែងដឹកនាំអង់គ្លេសឲ្យចាកចេញពីអង់គ្លេសតាមសម្រួល តែសភាមិនយល់ស្របតាមជំហររដ្ឋាភិបាលឡើយ។
តាមពិតទៅ អង់គ្លេស ត្រូវចាកចេញពីសហភាពអឺរ៉ុបនៅថ្ងៃទី២៩ ខែមីនាតែម្ដង ដែលអ្នកគាំទ្រការចាកចេញចាត់ទុកជាថ្ងៃឯករាជ្យទៀតផង។ យ៉ាងណាមិញ ដំណើរការនេះ បែរជាកកស្ទះត្រឹមដំណាក់កាលសភាទៅវិញ។ ម្ដងជាពីរដង សមាជិកសភាអង់គ្លេសរាប់ទាំងសមាជិកសភាមកពីបក្សអភិរក្សរបស់លោកស្រី ម៉េយ៍ ផងនោះ តែងជំទាស់សំណើរបស់រដ្ឋាភិបាលរហូត។ ជំទាស់ចុះឡើង កាលបរិច្ឆេទចាកចេញក៏ត្រូវពន្យារពេលតែម្ដង។
លទ្ធផលខាងលើ កំពុងធ្វើឲ្យលោកស្រី ម៉េយ៍ ឈឺក្បាលខ្លាំង ព្រោះដល់ថ្នាក់ភ្នាល់តំណែងនាយករដ្ឋមន្ត្រីទៅហើយ ក៏សភាមិនយល់ព្រមលើកិច្ចព្រមព្រៀងទៀត។ ជំហានបន្ទាប់ ប្រមុខរដ្ឋាភិបាលអង់គ្លេសរូបនេះ ត្រូវពន្យល់សហភាពអឺរ៉ុបវិញម្ដងពីអ្វីដែលអង់គ្លេសត្រូវធ្វើ។ មេដឹកនាំអឺរ៉ុប នឹងជួបគ្នានៅថ្ងៃទី១០ ខែមេសា តាមការកោះអញ្ជើញរបស់ប្រធានក្រុមប្រឹក្សាអឺរ៉ុប ដូណាល់ ទូស ។ អឺរ៉ុបនឹងសម្រេចថា អង់គ្លេសចាកចេញដោយគ្មានកិច្ចព្រមព្រៀង ឬពន្យារពេលចាកចេញទៀត។
បារាំង និងអាល្លឺម៉ង់ បានព្រមានពីហានិភ័យដែលអង់គ្លេសអាចដើរចេញដោយគ្មានកិច្ចព្រមព្រៀង។ រដ្ឋមន្ត្រីការបរទេសអាល្លឺម៉ង់ Heiko Maas និយាយថា ពេលវេលាកាន់តែអស់ដើម្បីបញ្ចៀសការចាកចេញដោយគ្មានកិច្ចព្រមព្រៀង ហើយប្រជាជនអង់គ្លេសត្រូវសម្រេចចិត្តឲ្យមុនថ្ងៃទី១២ ខែមេសា ពីអ្វីដែលត្រូវធ្វើបន្ទាប់ទៀត។ ឯវិមានប្រធានាធិបតីបារាំងឯណោះវិញ ក៏អះអាងថា លទ្ធភាពដែលសហភាពអឺរ៉ុប និងអង់គ្លេសចែកផ្លូវទាំងមិនដាច់ស្រេច មានកាន់តែខ្ពស់។
ភាពមិនដាច់ស្រេចក្នុងសភាអង់គ្លេស ប៉ះពាល់យ៉ាងខ្លាំងដល់ការរស់នៅរបស់ប្រជាជនអង់គ្លេស និងក្រុមហ៊ុនជាច្រើនផង ខណៈតម្លៃលុយផោនបានធ្លាក់ចុះជាថ្មី។ ខណៈរដ្ឋាភិបាលទម្លាក់កំហុសលើសភាជុំវិញការជាប់គាំងនេះ មេបក្សប្រឆាំង Jeremy Corbyn ចោទលោកស្រី ម៉េយ៍ វិញថា មិនព្រមផ្លាស់ប្ដូរចំណុចដែលសមាជិកសភាជំទាស់។ លោក Corbyn ថែមទាំងជំរុញឲ្យលោកស្រី ម៉េយ៍ លាលែងពីតំណែងទៅ បើមិនព្រមធ្វើតាមសភា៕
Tag:
Brexit
អឺរ៉ុប
Theresa May
© រក្សាសិទ្ធិដោយ thmeythmey.com