អន្តរជាតិ
តៃវ៉ាន់ឆេះដុំ ក្រោយយន្តហោះចិនហោះកាត់ខ្សែខណ្ឌចែកទឹកដី យន្តហោះចម្បាំង J-11 របស់ចិនដែលហោះឆ្លងកាត់ខ្សែខណ្ឌចែកទឹកដីនៅច្រកសមុទ្រតៃវ៉ាន់
× កោះតៃវ៉ាន់ នៅថ្ងៃទី៣១ ខែមីនា បានរិះគន់ចិនយ៉ាងខ្លាំង បន្ទាប់ពីយន្តហោះចម្បាំងពីរគ្រឿងនៃកងទ័ពជើងអាកាសចិនហោះកាត់ខ្សែខណ្ឌចែកទឹកដីទាំងពីរខាងលើច្រកសមុទ្រតៃវ៉ាន់។ ក្រុងតៃប៉ិចាត់ទុកសកម្មភាពជាការបង្ករឿងដ៏ព្រហើន។ វត្តមានរបស់យន្តហោះកងទ័ពអាកាសចិន កើតឡើងក្រោយអាមេរិកបញ្ជូននាវាចម្បាំងពីរគ្រឿងបើកកាត់ច្រកសមុទ្រមួយនេះដែលធ្វើឲ្យក្រុងប៉េកាំងក្ដៅស្លឹកត្រចៀកយ៉ាងខ្លាំង។
ក្រសួងការបរទេសតៃវ៉ាន់ បានប្រកាសនៅថ្ងៃទី៣១ ខែមីនា ថា យន្តហោះចម្បាំងពីរគ្រឿងធុន J-11 របស់កងទ័ពជើងអាកាសនៃកងទ័ពរំដោះប្រជាជនចិន បានបំពានកិច្ចព្រមព្រៀងទ្វេភាគីតាមរយៈការហោះឆ្លងកាត់ខ្សែខណ្ឌចែកទឹកដីនៅច្រកសមុទ្រតៃវ៉ាន់។ ក្រសួងការបរទេសតៃវ៉ាន់ហៅទង្វើរបស់កងទ័ពចិន ជាសកម្មភាពដែលធ្វើឡើងដោយមានបំណង ជាគឃ្លើន និងបង្កហេតុ ហើយតៃវ៉ាន់ថ្កោលទោស និងបានជូនដំណឹងនេះទៅកាន់ដៃគូក្នុងតំបន់របស់ខ្លួនរួចហើយ។
ប្រឈមមុខនឹងវត្តមានយន្តហោះចម្បាំងចិន តៃវ៉ាន់ក៏បានបញ្ជូនយន្តហោះចម្បាំងរបស់ខ្លួនទៅកាន់ដែនអាកាសដែលរងការបំពាន និងបានព្រមានយោធាចិនផងដែរ។ នេះបើតាមការប្រកាសរបស់ក្រសួងការពារជាតិតៃវ៉ាន់។
តាមពិតទៅ ការបញ្ជូនយន្តហោះទៅកៀកកោះតៃវ៉ាន់ពីសំណាក់ក្រុងប៉េកាំង មិនមែនជារឿងចម្លែកឡើយ តែការហោះឆ្លងកាត់ខ្សែខណ្ឌចែកទឹកដីបែបនេះ ជារឿងកម្រមួយ។ សារព័ត៌មានតៃវ៉ាន់ផ្សាយថា សកម្មភាពបំពានបែបនេះចុងក្រោយកើតឡើងកាលពីឆ្នាំ២០១១ ។ ជាញឹកញយ ក្រុងប៉េកាំង ដែលគំរាមប្រើទ័ពដើម្បីគ្រប់គ្រងតៃវ៉ាន់នោះ តែងបានបង្ហាញសាច់ដុំយោធារបស់ខ្លួនដើម្បីកំញើញគូប្រជែងរបស់ខ្លួន។
ដ្បិតជាដែនទឹកអន្តរជាតិមែន ច្រកសមុទ្រតៃវ៉ាន់ ក្លាយជាទីតាំងសម្ញែងសាច់ដុំរវាងចិន និងអាមេរិកដែលចាំគាំទ្រតៃវ៉ាន់។ ជាការកត់សម្គាល់ ឲ្យមាននាវាចម្បាំងអាមេរិកបើកកាត់តំបន់នោះ ចិននឹងបញ្ជូនយន្តហោះរបស់ខ្លួនឆ្វែលតាមក្រោយផងដែរ។ មួយសប្ដាហ៍មុន អាមេរិកទើបបញ្ជូននាវាពិឃាតមួយគ្រឿង និងកប៉ាល់មួយគ្រឿងទៀត បើកឆ្លងកាត់ដែនទឹកនេះ ដែលនេះទំនងជាមូលហេតុដែលចិនបញ្ជូន J-11 ទៅកាន់តែកៀកតៃវ៉ាន់វិញ។
ទោះទទួលស្គាល់ចិនមែនពិត អាមេរិកនៅតែបន្តទំនាក់ទំនងជាមួយតៃវ៉ាន់ និងធ្វើជាខ្នងបង្អែកដ៏រឹងមាំរបស់ដែនកោះមួយនេះដែលប្រឈមមុខនឹងការគំរាមរបស់ចិនរាល់ថ្ងៃ។ រដ្ឋបាលអាមេរិករាល់សិបជំនាន់មកហើយដែលបន្តផ្គត់ផ្គងអាវុធយុទ្ធភណ្ឌដល់តៃវ៉ាន់សម្រាប់ទុកការពារខ្លួន។ កាលពីខែដើមខែមីនា តៃវ៉ាន់បានស្នើទិញយន្តហោះចម្បាំងថ្មីៗពីអាមេរិកដើម្បីជំនួសយន្តហោះចាស់ៗរបស់ខ្លួន។ ប្រធានាធិបតីតៃវ៉ាន់ Tsai Ing-wen អះអាងថា អាមេរិកឆ្លើយតបដោយវិជ្ជមាននឹងសំណើនេះ។
គម្រោងផ្លាស់ប្ដូរយន្តហោះនេះ មានជាយូរហើយដែរព្រោះចិនបានប្រឹងប្រែងអភិវឌ្ឍអានុភាពអាកាសរបស់ខ្លួនយ៉ាងខ្លាំងដែរ ប៉ុន្តែអាមេរិកហាក់ស្ទាក់ស្ទើរ។ តាំងពីឆ្នាំ២០០២ ក្រុងវ៉ាស៊ីនតោនបានបដិសេធសំណើរបស់តៃវ៉ាន់រហូត ដោយទំនងបារម្ភពីជំហររបស់ចិន៕
Tag:
តៃវ៉ាន់
ចិន
អាមេរិក
© រក្សាសិទ្ធិដោយ thmeythmey.com