អន្តរជាតិ
អាមេរិក លក់ឧទ្ធម្ភាគចក្រប្រឆាំងនាវាមុជទឹក២៤គ្រឿងតម្លៃ២,៦ពាន់លានដុល្លារឲ្យឥណ្ឌា ឧទ្ទម្ភាគចក្រ MH-60R (រូបភាព navy.gov.au)
× ក្រសួងការបរទេសអាមេរិក នៅថ្ងៃទី២ ខែមេសា បានផ្ដល់ខៀវដល់គម្រោងលក់ឧទ្ធម្ភាគចក្រ២៤គ្រឿងទៅឲ្យឥណ្ឌាដែលមានតម្លៃដល់ទៅ២,៦ពាន់លានដុល្លារ។ ឧទ្ធម្ភាគចក្រធុន MH-60R មានសមត្ថភាពប្រមាញ់នាវាមុជទឹក ហើយក៏អាចចូលរួមប្រតិបត្តិការសង្គ្រោះផងដែរ។ ឧទ្ធម្ភាគចក្រនេះ នឹងជួយពង្រឹងសមត្ថភាពយោធាឥណ្ឌា ស្របពេលដែលនាវាចិនបានបង្កើនវត្តមានយ៉ាងញឹកញាប់ក្នុងមហាសមុទ្រក្បែររបងផ្ទះឥណ្ឌា។
ជាការឆ្លើយតបដ៏លឿនមួយ អាមេរិកបានយល់ព្រមដល់ការលក់ឧទ្ធម្ភាគចក្រ MH-60R ២៤គ្រឿងតម្លៃ២,៦ពាន់លានដុល្លារទៅឲ្យសម្ព័ន្ធមិត្តអាស៊ីខាងត្បូងរបស់ខ្លួន គឺឥណ្ឌា។ ក្រសួងការបរទេសអាមេរិកប្រាប់សភានៅថ្ងៃទី២ ខែមេសា ខ្លួនបានឯកភាពលើសំណើទិញឧទ្ធម្ភាគចក្រនេះដែលត្រូវបានឥណ្ឌាលើកស្នើកាលពីឆ្នាំ២០១៨ ។
ក្រសួងការបរទេសអាមេរិកលើកឡើងថា គម្រោងលក់នេះ នឹងជួយគាំទ្រគោលនយោបាយការបរទេស និងសន្តិសុខជាតិអាមេរិកតាមរយៈការជួយពង្រឹងភាពជាដៃគូយុទ្ធសាស្ត្រអាមេរិក-ឥណ្ឌា ក៏ដូចជាជំរុញសន្តិសុខរបស់ដៃគូដ៏សំខាន់របស់អាមេរិកផង។ ឥណ្ឌាបានក្លាយជាម៉ូយដុំអាវុធអាមេរិកមួយ ស្របពេលមហាអំណាចទាំងពីរមានការព្រួយបារម្ភដូចគ្នា គឺការងើបឡើងយ៉ាងឆាប់រហ័សរបស់មហាយក្សចិននៅអាស៊ី។
មានរហស្សនាមថា Romeo ឧទ្ធម្ភាគចក្រ MH-60R ជាផលិតផលរបស់ក្រុមហ៊ុន Lockheed Martin និងមានជំនាញពិសេសខាងតាមចាប់នាវាមុជទឹក និងកប៉ាល់ផង។ លើសពីនោះ ឧទ្ធម្ភាគចក្រដ៏មានឥទ្ធិពលនេះ ក៏អាចធ្វើប្រតិបត្តិការរុករកនិងជួយសង្គ្រោះផងដែរ។
ជាមួយនឹងវត្តមានឧទ្ធម្ភាគចក្រថ្មីនៅពេលខាងមុខ ឥណ្ឌារំពឹងថា នឹងអាចតាមដានសកម្មភាពរបស់យោធាចិននៅមហាសមុទ្រឥណ្ឌា ចំពេលដែលចិនបានវិវត្តខ្លួនទៅជាមហាអំណាចជើងទឹកមួយទៅហើយដែរ។ ក្រុងវ៉ាស៊ីនតោនចាត់ទុកក្រុងញូវដេលី ជាដៃគូផ្នែកវិស័យការពារជាតិដ៏សំខាន់ដែលមានតួនាទីសំខាន់ក្នុងការរក្សាស្ថិរភាពនយោបាយ សន្តិភាព និងដំណើរការសេដ្ឋកិច្ចក្នុងតំបន់ឥណ្ឌូ-ប៉ាស៊ីហ្វិក និងអាស៊ីខាងត្បូង។
នៅតំបន់ដែលគេចាត់ទុកជាខ្សែគជ់ មហាមុទ្រឥណ្ឌាក្លាយជាទីតាំងនៃកំពង់ដែលនាវាចម្បាំងចិនអាចចូលចតបានដូចជានៅស្រីលង្កា និងនៅកំពង់ផែ Gwadar នៅប៉ាគីស្ថានដែលជាសត្រូវសួពូជរបស់ឥណ្ឌាផង។ ក្រៅជាចំណុចយុទ្ធសាស្ត្រសំខាន់ មហាសមុទ្រឥណ្ឌាដែលគិតពីច្រកសមុទ្រ Hormuz ដល់ជ្រោយ Malacca ជាផ្លូវធ្វើដំណើរ និងដឹកជញ្ជូនដ៏សំខាន់របស់ពិភពលោកដែលភ្ជាប់អាស៊ីខាងកើត អាស៊ីអាគ្នេយ៍ទៅមជ្ឈិមបូព៌ា អឺរ៉ុប និងអាហ្វ្រិកផង៕
© រក្សាសិទ្ធិដោយ thmeythmey.com