តន ចាន់រិទ្ធារ៉ា ()
ភ្លើងឆេះព្រៃដ៏ខ្លាំងក្លាមួយ កំពុងរាតត្បាតតំបន់ឆ្នេរភាគខាងកើតរបស់កូរ៉េខាងត្បូងដោយបានបំផ្លាញព្រៃឈើ និងផ្ទះរាប់រយខ្នងឯណោះ។ ខ្យល់បក់ខ្លាំង ត្រូវបានគេជឿថា ជាមូលហេតុដែលធ្វើឲ្យភ្លើងរាលដាលយ៉ាងរហ័ស។ រដ្ឋាភិបាលកូរ៉េខាងត្បូង បានប្រកាសភាពអាសន្ននៅតំបន់រងផលប៉ះពាលល់ ហើយប្រធានាធិបតី មូន ចេអ៊ីន នៅថ្ងៃទី៥ ខែមេសា បានទៅដល់ទីក្រុង Goseong ដែលរងគ្រោះខ្លាំង។ មកទល់ពេលនេះ មនុស្សម្នាក់បានស្លាប់ និងជាង៣០នាក់ទៀតរងរបួស។
កម្លាំងពន្លត់អគ្គីភ័យ និងយោធាជាងមួយម៉ឺនាក់ ព្រមទាំងឧទ្ធម្ភាគចក្រជាច្រើនគ្រឿងទៀត កំពុងតែញាប់ដៃញាប់ជើងក្នុងការគ្រប់គ្រងភ្លើងឆេះដែលរាលដល់តំបន់ភាគខាងកើតកូរ៉េខាងត្បូង។ ភាពងអាសន្នថ្នាក់ជាតិ ត្រូវបានប្រកាសនៅទីតាំងរងគ្រោះ ហើយកម្លាំងទាំងអស់ត្រូវបានប្រមូលទៅកាន់ទីតាំងភ្លើងឆេះ ដើម្បីត្រួតត្រាស្ថានការណ៍។
ក្រុមពន្លត់អគ្គីភ័យដែលមកពីទូទាំងប្រទេស បានតស៊ូនឹងភ្លើងឆេះដែលកើតជាដំបូងនៅតំបន់ភ្នំ Goseong ចម្ងាយ១៦០គីឡូម៉ែត្រពីរដ្ឋធានីសេអ៊ូល។ ប៉ុន្មានម៉ោងក្រោយមក ភ្លើងក៏រាលដាលដល់ទីក្រុងផ្សេងទៀតដែលនៅក្បែរនោះ ដោយសារតែខ្យល់បក់ខ្លាំងពេក។ ជាមួយនឹងការប្រកាសអាសន្ន សម្ភារៈចាំបាច់ និងគ្រឿងជួយសង្គ្រោះត្រូវបានបញ្ជូនទៅកាន់តំបន់រងគ្រោះយ៉ាងលឿនដើម្បីទប់ស្កាត់ការរាលដាលបន្តទៀត។
បើតាមទីភ្នាក់ងារព័ត៌មាន Yonhap គិតត្រឹមថ្ងៃទី៥ ខែមេសា ផ្ទៃដីព្រៃឈើជាង៥០០ហិចតាត្រូវបានឆេះខ្ទេចខ្ទី អាគារ និងផ្ទះជាង៣០០ខ្នងត្រូវបានបំផ្លាញ តែមនុស្សម្នាក់បានបាត់បង់ជីវិតក្នុងហេតុការណ៍នេះ ខណៈច្រើននាក់ទៀតរបួស។ ប្រជាជនប្រមាណ៤២០០នាក់ ត្រូវបានជម្លៀសពីកន្លែងកើតហេតុ ផ្លូវថ្នល់ និងផ្លូវរថភ្លើង៥២ខ្សែត្រូវបានបិទដំណើរ ឯសាលារៀន និងអាគារសាធារណៈជាច្រើនទៀតក៏បិទដូចគ្នាដែរ។
មិនមានមូលហេតុពិតប្រាកដដែលនាំទៅដល់ការឆេះដ៏សន្ធោសន្ធៅនេះនៅឡើយទេ ប៉ុន្តែអាជ្ញាធរកូរ៉េខាងត្បូងកំពុងរកដើមហេតុ។ ដំបូងអាជ្ញាធរសង្ស័យថា ការផ្ទុះឧបករណ៍បំពាក់លើប៉ុស្តិ៍ទូរសព្ទជាដើមហេតុ ព្រោះមានសាក្សីឮសំឡេងផ្ទុះ។ ក្រោយការស៊ើបអង្កេតបឋម ក្រុមហ៊ុនKorea Electric Power Corp អះអាងថា ប៊ូតុងនោះ មិនអាចផ្ទុះឆេះដោយខ្លួនឯងឡើយ តែអាចបណ្ដាលមកពីការឆាបព្រាករវាងខ្សែភ្លើង និងធូលីកដោយសារតែរដូវនេះមានខ្យល់ស្ងួតខ្លាំង។
ប្រធានាធិបតី មូន ចេអ៊ីន បានទៅត្រួតពិនិត្យការងារពន្លត់អគ្គីភ័យដោយផ្ទាល់នៅឯ Goseong ។ លោក បានស្នើឲ្យក្រុមជួយសង្គ្រោះ និងភា្នក់ងារពន្លត់អគ្គីភ័យប្រឹងប្រែងឲ្យអស់ពីសមត្ថភាពដើម្បីស្រោចស្រង់ស្ថានការណ៍។ លោកទទួលស្គាល់ថា ការទប់ស្កាត់ភ្លើងមិនឲ្យរាលដាលជារឿងពិបាកព្រោះខ្យល់បក់ខ្លាំង តែការគ្រប់គ្រងភ្លើងនេះ នឹងធ្វើបានតាមរយៈការប្រឹងប្រែងរបស់មន្ត្រីទាំងអស់។
នេះជាលើកទីមួយក្នុងរយៈពេល១២ឆ្នាំ ដែលការប្រកាសភាពអាសន្នត្រូវបានប្រកាសឡើង។ ការប្រកាសចុងក្រោយ ធ្វើឡើងកាលពីឆ្នាំ២០០៧ ពេលដែលមានករណីធ្លាយប្រេងដ៏អាក្រក់នៅឆ្នេរភាគខាងលិច។ កាលពីឆ្នាំ២០០៥ កូរ៉េខាងត្បូងក៏ប្រកាសភាពអាសន្នម្ដងដែរក្នុងហេតុការណ៍ភ្លើងឆេះព្រៃនៅ Yangyang ៕